Romans 14 - Sa Ugud Apudyus

Sa Adi Taḵu Anellawan Atta Buḻun Taḵu

¹ Awatonyu tagu we anḵuya pammatina yaḵon adi ḵayu maḵasossongbat ḵan siya mipanggob si ḵasomsomḵana.

² Awad da udume namati ye angan atta baḻangnae maḵan. Yaḵon awad da anḵuya pammatida ḵad matipoye abus anidada.

³ Diḵayu we angan atta baḻangnae maḵan, adiyu oḵyan dellawon da angidiyan atta udume maḵan. Ḵad diḵayu bose angidiyan atta udume maḵan, adiyu bos dellawon da angan atta baḻangnae maḵan te inawat Apudyus dida'ḵ taguna.

⁴ Te ngaiḵa ḵammane anguwis atta sammilun da udum? Te sa Apuna asi ḵigade angibaga nu ustu ḵoona baḵon nu adipun. Ḵad sa ḵoḵoḵḵona aaddi ye napanoḵnoḵane ustu te aḵ Apu Jesus maḵwae bumadang ḵan siya.

⁵ Awad da udume ibelangda'ḵ amo napatpatog sin-aḻgaw nu da udume aḻgaw yaḵon ḵanan os da udume an-iisu aḻgaw. Pun ḵasapuḻane awad osa mat-op atte somsomoḵna.

⁶ Sa tagu we patgana osae aḻgaw, ḵoona ḵatti aḵ anayawana ḵan Apudyus. Isun os ni osae angan atta baḻangnae maḵan, ḵanona'ḵ anayawana ḵan Apudyus te anggappiyaana ḵan siya. Ḵad isun os ni adi angan atta baḻangnae maḵan, ḵoona ḵatti'ḵ anayawana ḵan Apudyus te anggappiyaana ḵan siya.

⁷ Te losan ḵan ditaḵu we namati, daḵampun atte madayawan taḵu singsington taḵu si mataguwan taḵu ya taḵon ay matoyan taḵu.

⁸ Nu matagu taḵu, matagu taḵu ta madayawan Apu Jesus ḵad nu matoy taḵu, matoy taḵu bos ta madayawan Apu Jesus. Pun taḵon ay matagu taḵu baḵon nu matoy taḵu, ḵuwan Apu Jesu Kristu ditaḵu.

⁹ Te natoy ya ummuli'ḵ Jesu Kristu ta siya an-Apun da matattagu ya da natoy.

¹⁰ Nu aḵ Jesu Kristu Apu taḵu losan, naippun ḵaḻabbongan taḵu we anguwis ya anellaw atta susunud taḵu ḵan Kristu. Adi taḵu ḵoon ḵatti te nu anungus ni aḻgaw, losan taḵu sumangu maḵuwis ḵan Apudyus.

¹¹ Te awad de nigili si Ugud Apudyus we ḵanana, “Gapu ta matattaguwaḵ: Analluḵu da losane tagu ḵan saḵon ḵad bigbigondae saḵon Apu.”

¹² Pun losan taḵu sumongbat ḵan Apudyus atta losane ḵingwa taḵu.

Sa Gapun Ni Maḵabasuḻan Da Buḻun Taḵu

¹³ Ḵad siya gapunae adi taḵu ogon ḵuwison da udume namati yaḵon ḵasapuḻane pasig taḵu sosomḵone adi taḵu angwa'ḵ ngaimane gapun ni maḵabasuḻan da susunud taḵu ḵan Kristu.

¹⁴ Gapu si nidog-aḵ ḵan Apu Jesus, aaddi ye ippun maḵan aḵ ḵaissaw si antotollong Apudyus. Yaḵon nu ibelang ni osan tagu'ḵ ḵaissaw, ḵaissaw ḵan siya.

¹⁵ Nu sa anganan taḵu gapun ni lumawengan ni somsomoḵ ni sunud taḵu ḵan Kristu, daḵampun aḵ ayat impaila taḵu ḵan siya. Sa anganan taḵu adi taḵu iyunude dadailona pammatin ni sunud taḵu te siya inḵatoy Kristu.

¹⁶ Ilanyu ta da ibelangyu'ḵ ambaḻu, daḵampun oḵyan aḵ lawweng ḵaugudanda.

¹⁷ Te sa ampangatan Apudyus atta taguna, daḵampun aḵ ampatog ḵanon taḵu ḵan inumon taḵu. Yaḵon sa ampatog, ḵoona ditaḵu'ḵ maun-unan, sa allin-awaan taḵu'tta sin-ossaossa ya sa laylayad taḵu we maḻpu si Ispiritu Santu.

¹⁸ Ḵad nu ḵaḵnat inon taḵu we anserbi ḵan Kristu, mas-om aḵ Apudyus ya mapatgan taḵu bos atta asintatagu taḵu.

¹⁹ Pun ḵasapuḻane igga taḵu ḵabooḻan taḵu ta allin-awa maḵabuḻbuḻunan taḵu'tta udum ya ngaimane amapigsa'tta pammati taḵu.

²⁰ Nabaḻbaḻu nu adi taḵu dadailon ḵewaaḻ Apudyus gapu'tte maḵan. Losane maḵan ampoḻḵas yaḵon lawweng nu siya maḵabasuḻan da sunud taḵu gapu'tte anganan taḵu.

²¹ Nabaḻbaḻu nu adi taḵu ḵanon sida baḵon nu uminum si bayas baḵon nu ḵoon da ngaimane siya maḵabasuḻan ni sunud taḵu ḵan Kristu.

²² Ngaimane patiyon ni sin-ossaossa mipanggob si anna, ambaḻu nu abusda ḵan Apudyus aḵ angigammu. Pian tagu we adin ni somsomoḵna ḵuwison long-agnae mismu gapu'tte simsimmoḵnae ustu ḵoona.

²³ Yaḵon sa tagu we anduwaduwa mipanggob atte maḵan, maḵabasuḻ nu ḵanona te sa anganana daḵampun aḵ nibatay si ustu we pinatina. Pun nu ḵoon taḵu da ngaimane patiyon taḵu we daḵampun aḵ ustu, maḵabasuḻ taḵu.