Romans 13 - Sa Ugud Apudyus

Sa Anuttuwaan Taḵu Atta Pangat

¹ Losane tagu ḵasapuḻane tuttuwaonda da angipangat si gubilnu te naippun ḵaḻabbongandae ampangat nu adin Apudyus iyunud. Ḵad losane ampangat, aḵ Apudyus nangisaad ḵan dida.

² Pun ngaimane sumullagi'tta pangat, sumullagi'tte dinutuḵan Apudyus ḵad siya madusa.

³ Ippun maḵimtan da angwa'ḵ ambaḻu'tta pangat yaḵon abus da angwa'ḵ lawweng aḵ maḵimut ḵan dida. Pun nu pionyu we adi maḵimut atta pangat, siya ḵoonyu ustu we sa angidayawanda ḵan diḵayu.

⁴ Te da pangat, dida da anserbi ḵan Apudyus para'tta bumaḻuwanyu ya para'tta madusaan da angwa'ḵ lawweng. Yaḵon nu ḵoonyu lawweng, maḵimut ḵayu oḵyan te anna ḵaḻabbongandae naḻpu ḵan Apudyus we anusa'tta angwa'ḵ lawweng.

⁵ Pun ḵasapuḻane tuttuwaon taḵu dida, daḵampun aḵ abus angiligsiyan taḵu'tta dusan Apudyus mipagapu ḵan dida yaḵon gapu ta igammu taḵu we sanat da ustu we ḵoon taḵu.

⁶ Ḵad sana gapun ni ambayadan taḵu'tta bugis taḵu te da pangat si gubilnu, anserbida ḵan Apudyus si angwaanda'tta ḵewaaḻda.

⁷ Pun ḵasapuḻane bayadan taḵu da bugis taḵu ya bayadan taḵu da utang taḵu ḵan dida. Ḵad ḵasapuḻane patgan taḵu da anna ḵaḻabbonganda'ḵ mapatgan.

Sa An-asiayatan Taḵu

⁸ Bayadan taḵu da utang taḵu. Ḵad an-asiayat taḵu. Te sa angayat si asintataguna, tinuttuwana da Lintog Apudyus.

⁹ Te ḵanan da bilin, “Adiḵa maḵadagdagas, adiḵa pumatoy, adiḵa an-aḵaw ya adim ḵamommodon da ḵuwan da udum” ya da udume bilin sinalimungmung ni ossaane biline ḵanana, “Ayatom da asintatagume isun ni an-aayatnu'tte long-agnu.”

¹⁰ Te nu ayaton taḵu da asintatagu taḵu, adipun maḵwae ḵoon taḵu lawweng ḵan dida. Pun sa angay-ayatan taḵu'tta asintatagu taḵu, sadi bos anuttuwaan taḵu'tte lintog.

¹¹ Ḵasapuḻane ḵoon taḵu losan da anna te igammu taḵu we ampatog timpu we mataguwan taḵu sinsadi. Ḵad sinsadi ye timpu bumangon taḵu we nasuyop te madam-an mataguwan taḵu'ḵ inggana nu sa damu we namatiyan taḵu.

¹² Te sa ḵatuttuwaan, naḻaḵpus labi ya madam-an mabigat. Pun ḵaanon taḵu da ḵoḵoḵḵon taḵu si giḵbot ta iḵabot taḵu aggom ni padda.

¹³ Sa antatagu we ḵasapuḻane unudon taḵu, sa ampoḻḵas ḵan ambaḻu we mibagay atte tagu we awad si padda. Adi taḵu mabartek, adi taḵu maḵadagdagas ya adi taḵu ḵoon da udume ḵaḵaissawan ya ḵababbain ya adi taḵu ansusubog ḵan an-asiapos.

¹⁴ Yaḵon sa ḵoon taḵu oḵyan, unudon taḵu ugalin Apu taḵu we Jesu Kristu ya adi taḵu oḵyan iyunud da pion da long-ag taḵu.