Romans 11 - Sa Ugud Apudyus

Sa Ḵadagun Apudyus Atta Judyu

¹ Pun awad de imusoḵ, indiyan ḵad ain Apudyus da Judyu we taguna? Naid! Te saḵone mismu, osaaḵe ganaḵ Israel we naḻpu si abengnae Benjamin we ganaḵ os Abraham.

² Iḵasinḵu ibagae daḵampun aḵ indiyan Apudyus da gagangaye pinilinae taguna si awe. Adiyupun ḵamman igammu ḵanan ni Ugud Apudyus atte mipanggob ḵan Profeta Elijah? Nalluwaḻu si misullagi'tta ḵailiyanae da ganaḵ Israel,

³ ḵanana, “Apu, gingngatda da profetam ḵad dinadailda da altar we maiggaan da midatun ḵan siḵa. Os-ossaanaḵe nabun-an woḵ pionda bos saḵon gongaton.”

⁴ Pun ngai insongbat Apudyus ḵan siya? Ḵanana, “Awad da pitullibu we buḻunnu we taguḵe adipun nandayaw atta sinan-apudyus we angngadan aḵ Baal.”

⁵ Isuna bose sana, awad da udume buḻunḵu we Judyu we nabun-ane pinilin Apudyus aḵ taguna mipagapu si ḵinabaḻuna.

⁶ Yaḵon nu gapu'tte ḵinabaḻun Apudyus namiliyana ḵan dida, daḵampun ogon atta ambaḻu we ḵingwada. Te nu gapu'tta ambaḻu we ḵingwada namiliyan Apudyus ḵan dida, daḵampun aḵ mipagapu'tte ḵinabaḻuna.

⁷ Pun ngai maawatan taḵu nu? Adimpun da ganaḵ Israel indasan da singsingtonda. Yaḵon abus da pinilin Apudyus aḵ naḵaodas te da ḵaaduwan ḵan dida tummungitong da somsomoḵda.

⁸ Ḵaḵnat ḵanan ni Ugud Apudyus, “Innatod Apudyus ḵan dida naliwonge somsomoḵ ḵad da atada adidapun maḵaila ya da ingada adidapun maḵadongoḻ inggana sinsadi.”

⁹ Ḵad awad os inggilin Ari David si mipanggob ḵan didae ḵanana, “Maaddaganda oḵyan madusae isun di ayame masiluwan baḵon nu mabituwanda si timpu we anggangganasanda.

¹⁰ Maḵuḻabuwan oḵyan da atada ta adida maḵaila ya tiḵungona oḵyan dida'ḵ inggana.”

¹¹ Ḵad awad de imusoḵ, sa sadi ye nisubuḵan da Judyu, piona ḵad ain ugudone adidapun labbong bumangon ḵasin? Naid! Te gapu'tte basuḻdae indiyanda'ḵ Kristu, dummatong nanaguwan Apudyus atta Gentil ta umapos da Judyu ḵan dida.

¹² Nu sa sadi ye naḵabasuḻan da Judyu nambalin aḵ bummaḻuwan da losane tagu si annae lubung, amo simbumaḻu da tagu nu losan da Judyu mibelang aḵ tagun Apudyus.

Sa Mataguwan Da Gentil

¹³ Sinsadi awad de ibagaḵ ḵan diḵayu we Gentil. Gapu ta dinutuḵan Apudyus saḵon aḵ an-apostolna'tta Gentil, ipatpatogḵu annae ḵewaaḻe nitaḻgod ḵan saḵon

¹⁴ ta umaposan oḵyan da udume ḵailiyaḵe Judyu ta amatida ḵan Jesu Kristu ḵad mataguda.

¹⁵ Te gapu si nangidiyanan Apudyus atta Judyu, sadi bos gundaway da udume tagu'tte lubunge mipaḻ-og maḵabuḻbuḻunanda ḵan siya. Ḵad asimbumaḻu nu awaton Apudyus ḵasin didae isuna umuliyan da natoy.

¹⁶ Mipani da Judyu atte tinapay. Te igammu taḵu we nu midatun ummunae partin ni tinapay ḵan Apudyus, da udum ose partin ni tinapay nibelang aḵ ḵuwan Apudyus. Mipani bos atte ḵayu te nu ḵuwan Apudyus lamutna, ḵuwana bos da pangana.

¹⁷ Da Judyu mipanida'tte ḵayu we olive we immuḻan Apudyus. Yaḵon simpaḵ Apudyus da udume pangana. Diḵayu we Gentil, mipani ḵayu'tta pangan ni ḵayu we olive we naippun nangimuḻa. Sa ḵingwan Apudyus, impasanina diḵayu'tta pangan ni ḵayu we immuḻana. Ḵad sinsana, midoga ḵayu maḵabillay atte lutae naḻpu'tte lamut ni sadi ye ḵayu we olive.

¹⁸ Yaḵon diḵayu we Gentil we nipasani ḵan dida, ḵasapuḻane ummanyu ta adiyu amsewon da sadi ye naspaḵe panga, sosomḵonyu oḵyane daḵampun ḵan diḵayu amadaḵoḻ si lamutna yaḵon sa lamut amadaḵoḻ ḵan diḵayu.

¹⁹ Maḵwa ḵananyu we naspaḵ panga ta misugtup ḵani.

²⁰ Tuttuwa sanat. Naspaḵda te adidapun namati yaḵon nipasani ḵayu gapu'tte namatiyanyu. Pun adiyu ipasindayaw yaḵon ummaummanyu.

²¹ Te nu adimpun Apudyus ḵinagagaane nanopaḵ atta Judyu we gagangaye pangana, magaga ḵamman ose anopaḵ ḵan diḵayu we mipani'tta pangae nisugtup?

²² Sadi angil-an taḵu si ḵinabaḻun Apudyus ḵan andudusana. Yaḵon dallu andudusana'tta nan-awid ḵan siya. Yaḵon amod de ḵinabaḻuna ḵan ditaḵu nu pagapagatupan taḵu da pammati taḵu ya adi taḵu an-awidan ḵinabaḻuna. Te nu an-awidan taḵu, sopaḵona ditaḵu.

²³ Ḵad taḵon ay da Judyu we adipun namati, nu ambaliwda ya namatida ipaulin Apudyus dida'tta naspaḵanda te anna ḵabooḻanae angipauli ḵan dida.

²⁴ Te nu maḵwae isugtup diḵayu we Gentil we isun da atape ḵayu ya insugtupna si ustu we muḻana, amo naḻaslasu angisugtupana'tta Judyu we gagangaye pangana.

Sa Ḵumadaguwan Apudyus Atta Losane Tagu

²⁵ Susunudḵu ḵan Kristu, awad de ḵaḵ-ipaigammun Apudyus we pioḵe maawatanyu ta adi ḵayu ampasindayawe ansomsomoḵe nalaing ḵayu. Tummungitong da somsomoḵ da udume ganaḵ Israel gapu si adidapun amatiyan inggana'ḵ wadawad belang da Gentil we amati.

²⁶ Pun sadi anaguwan Apudyus atta losane ganaḵ Israel. Te sa ḵanan ni nigili ye Ugud Apudyus, “Ad Zion maḻpuwan ni Anagu ḵan diḵayu. Ḵad ḵaanona da losane ḵinalaweng da Judyu we ganaḵ Jacob.

²⁷ Ḵad sadi intuḻagḵu ḵan didae pakawanoḵ da basuḻda.”

²⁸ Gapu ta adimpun da Judyu pinati Ambaḻu we Damag, nambalinda'ḵ ḵabusuḻ Apudyus gapu ḵan diḵayu we Gentil. Yaḵon gapu ta pinilin Apudyus dida, ay-ayatona dida gapu'tte inkarina'tta danaḵḵoḻda.

²⁹ Te adipun maḵwae obson Apudyus somsomoḵna si mipanggob atta binindisyunana ya da pinilina.

³⁰ Diḵayu we Gentil, adiyupun aḵ Apudyus tinuttuwa gapu si adiyupun namatiyan atte awe. Yaḵon sinsana, ḵinadaguwana diḵayu gapu'tte adin da Judyu tummuttuwaan.

³¹ Isun os da Judyu, adidapun tinuttuwa gapu si adidapun amatiyan sinsana yaḵon maḵwae ḵadaguwan Apudyus dida gapu'tte ḵadagu we mipaila ḵan diḵayu.

³² Te iyyunud Apudyus we nambalin taḵu losan aḵ musassun ni basuḻ ta ipailana ḵadaguna'tta losan.

Sa Madayawan Apudyus

³³ Naippun miyisuwan ni ḵinabaḵnang, ḵinalaing ya igammun Apudyus! Naippun ḵallamog angipaḵaawat atte inabusna simsimmoḵ! Ḵad ippun os maḵaawat si ḵoona.

³⁴ Isun ni nigili ye Ugudnae ḵanana, “Awad ḵamman tagu'ḵ angigammu si somsomoḵ Apu? Ḵad awad ḵamman ḵallabbong amagbaga ḵan siya?

³⁵ Ḵad awad ḵamman nangitod ḵan Apudyus ta ḵasapuḻane subalitana?”

³⁶ Gapu ta siya nangwa'tta losan, naḵwa da losan mipagapu ḵan siya ya para'tte midayawana! Madayaw aḵ Apudyus aḵ inggainggana. Amen.