Romans 10 - Sa Ugud Apudyus

Sa Inon Apudyus We Angwa Atta Tagu Aḵ Maun-unan

¹ Susunudḵu ḵan Kristu, isisimoḵḵu we alluwaḻu ḵan Apudyus para'tte mataguwan da ḵailiyaḵe Judyu.

² Mataḵdoḻaḵe isisimoḵdae anserbi ḵan Apudyus yaḵon adidapun igammu ustu we inondae anserbi ḵan siya.

³ Te adidapun igammu inon Apudyus we angwa'tta tagu'ḵ maun-unan. Pinadasdae mismu unudon lintog si maun-unanda woḵ indiyanda inon Apudyus we angwa'tta tagu'ḵ maun-unan.

⁴ Te aḵ Kristu anungus ni lintog ta da losane amati, aḵ Apudyus angwa ḵan dida'ḵ maun-unan atte sinagungna.

Da Losane Tagu Maḵwae Mataguda

⁵ Awad de inggilin Moses mipanggob si maun-unan ni tagu si sinagung Apudyus gapu si anuttuwaanda'tte lintog. Ḵanana, “Ngaimane anuttuwa'tta losane bilin ni lintog matagu gapu'tte sadi ye lintog.”

⁶ Yaḵon sa inon Apudyus we angwa'tte tagu'ḵ maun-unan gapu'tte pammatina, awad de nigili si Ugud Apudyus we amanoḵnoḵe daḵampun aḵ anḵamnut awad pammati ye ḵanana, “Adiyu ḵanan atta somsomoḵyu we ḵasapuḻane awad umoy ad langit.” Sa piona ḵanan an-osog aḵ Jesu Kristu sina'd luta.

⁷ Ḵanan os ni nigili si Ugud Apudyus, “Adiyu bos ḵanan atta somsomoḵyu we ḵasapuḻane awad umoy atte igaw da natoy.” Sa piona ḵanan ta umuli'ḵ Kristu.

⁸ Yaḵon ngai ibagana? Ḵanana, “Adani ḵan siḵa Ugud Apudyus, annat si sungadnu ya sa somsomoḵnu.” Piona ḵanan sa Ugud Apudyus we mipanggob si pammati ye iwaḻagawagni.

⁹ Te nu ibabaggayu we aḵ Jesus an-Apuyu ya patiyonyu'tta pusuyu we siya tinagun Apudyus, matagu ḵayu.

¹⁰ Te gapu'tte sipupusu we amatiyan taḵu ḵan Jesu Kristu aḵ Apudyus angwa ḵan ditaḵu'ḵ maun-unan ḵad sa angibabaggaan taḵu bose aḵ Jesus Apu, sadi mataguwan taḵu.

¹¹ Te awad de nigili ye Ugud Apudyus we ḵanana, “Ngaimane amati ḵan siya adipun paat madismaya.”

¹² Te naippun laḵsigon Apudyus taḵon ay Judyu baḵon nu Gentil te aḵ Jesu Kristu abus aḵ Apu taḵu we amindisyun atta losane anḵodaw aḵ ḵadagu ḵan Apu.

¹³ Te sa ḵanan ni nigili'tte Ugud Apudyus, “Da losane tagu we anḵodaw aḵ ḵadagu ḵan Apu, mataguda.”

¹⁴ Yaḵon ngai inon da tagu we anḵodaw aḵ ḵadagu ḵan Apu nu adida amati ḵan siya? Ḵad ngai inondae amati nu adidapun dingngoḻ? Ḵad ngai inonda bose andongoḻ nu naippun umoy angiwaḻagawag?

¹⁵ Ḵad ngai bos inon da tagu we umoy angiwaḻagawag nu naippun angibuun ḵan dida? Te ḵanan ni nigili ye Ugud Apudyus, “Ambaḻu ta anna da umali ye angiwaḻagawag si Ambaḻu we Damag!”

¹⁶ Yaḵon adimpun da losane tagu tinuttuwa Ambaḻu we Damag. Te ḵanan Profeta Isaiah, “Apu, ngai da namati'tta imbagabagani?”

¹⁷ Pun adipun maḵwae amati da tagu nu adidapun umunae andongoḻ. Ḵad ḵasapuḻane dongngonda Ambaḻu we Damag mipanggob ḵan Kristu.

¹⁸ Yaḵon imusoḵ ud ḵan diḵayu, tuttuwa ḵad aine adimpun da Judyu dingngoḻ mipanggob ḵan Kristu? Dingngoḻda te ḵanan ni nigili ye Ugud Apudyus, “Niwaḻagawag atta ḵinailin di ili ya nandinongoḻ atta losane ili si annae lubung.”

¹⁹ Imusoḵ ḵasin, adimpun ḵad ain da ganaḵ Israel naawatan sadi ye dingngoḻda? Tuttuwae naawatanda te taḵon ay da Gentil naawatanda. Annaya inggilin Moses we Ugud Apudyus atta ganaḵ Israel we ḵanana, “Ḵooḵ maaposanyu'tta tagu we inam-amsewyu. Ḵad ḵooḵ sumang-anyu'tta tagu we imbelangyu'ḵ ippun igammuda mipanggob ḵan saḵon.”

²⁰ Antuḻod os aḵ Profeta Isaiah we nangibaga'tta imbagan Apudyus we ḵanana, “Indasanaḵ atta daḵampun aḵ angngit ḵan saḵon, ḵad nampailaaḵ atta daḵampun aḵ angim-imus mipanggob ḵan saḵon.”

²¹ Yaḵon nu mipanggob atta Judyu we ganaḵ Israel, ḵanan Apudyus, “Inaḻgawe dam-oḵ ayagan da tagu we adipun tumuttuwa gapu si adidapun amatiyan ya summullagida te tummungitongda.”