Romans 1 - Sa Ugud Apudyus

Sa Lapun Ni Suḻat

¹ Saḵon aḵ Paul we osa'tta sammilun Jesu Kristu. Pinilin Apudyus saḵon aḵ osa'tta apostolna ya dinutuḵana bos saḵon aḵ umoy angiwaḻagawag si Ambaḻu we Damag we naḻpu ḵan Apudyus.

^2-3 Sa annae Ambaḻu we Damag, mipanggob si abengnae inkarina si awe atte impaigilinae ugudna mipagapu'tta profetanae an-uuggudona. Nu mipanggob si ḵinatataguna, naḻpu'tta ganaḵ Ari David.

⁴ Nu mipanggob os si ḵinaapudyusna, impailan Apudyus we siya maḵabooḻe Abengna atte ummuliyana. Siya'ḵ Jesu Kristu we Apu taḵu.

⁵ Mipagapu ḵan Jesu Kristu, impailan Apudyus ḵinabaḻuna ḵan saḵon woḵ nambalinaḵ aḵ apostol ta awisoḵ da tagu'tta losane ili ta tumuttuwada gapu si amatiyanda ḵan Jesus.

⁶ Nidoga ḵayu we iRome we pinilin Apudyus aḵ ambalin aḵ tagun Jesu Kristu.

⁷ Pun anuḻataḵ ḵan diḵayu we annat ad Rome we inay-ayat Apudyus ḵan pinilina'ḵ taguna. Awad oḵyan ḵan diḵayu ḵinabaḻu ḵan lin-awae maḻpu ḵan Apudyus we Ama taḵu ya aḵ Jesu Kristu we Apu taḵu.

Sa Nanggappiyaan Paul Ḵan Apudyus

⁸ Sa umunae pioḵ ibaga, anggappiyaaḵ ḵan Apudyus mipagapu ḵan Jesu Kristu si mipanggob ḵan diḵayu losan. Te nandinongoḻ pammatiyu si intero we lubung.

⁹ Aḵ Apudyus anaḵdoḻe pasigḵu diḵayu iḵagasmoḵ si alluwaḻuwaḵ. Siya anserbiyaḵ atte losane ḵabooḻaḵ atte angiwaḻagawagaḵ si Ambaḻu we Damag mipanggob si Abengna.

¹⁰ Ḵad iluwaḻuḵ ḵan Apudyus we nu piona, awad wayaḵe umali ḵan diḵayu te nabayage ippun wayaḵ.

¹¹ Te pioḵ pagaye ilaḵ diḵayu ta maḵabillayaḵ ḵan diḵayu si bindisyune naḻpu si Ispiritu Santu ta pumigsa pammatiyu.

¹² Sa pioḵ ibaga, an-asisoḻgag taḵu si pammati ta pumigsa pammatiḵ mipagapu'tta pammatiyu ya pumigsa bos pammatiyu gapu si pammatiḵ.

¹³ Susunudḵu ḵan Kristu, pioḵe igammuwonyu nangampigae planuḵe umali ḵan diḵayu yaḵon awad de pasig anupod ḵan saḵon. Pioḵe ilan diḵayu ta awad os da awisoḵe amati ye isun da udume Gentil we inawisḵu'tta udume ili.

¹⁴ Ḵasapuḻane iwaḻagawagḵu Ambaḻu we Damag atta losane tagu, da naadaḻan baḵon nu da ippun adaḻda, da nalaing ya da nadong-og.

¹⁵ Pun pioḵe iwaḻagawag Ambaḻu we Damag ḵan diḵayu bose awad ad Rome.

Sa Ḵabooḻan Ni Ambaḻu We Damag

¹⁶ Adiḵpun ibaine angiwaḻagawag atte Ambaḻu we Damag te siya Ugud Apudyus we maḵabooḻ anagu'tta losane amati, umuna'tta Judyu ya asiyot da Gentil.

¹⁷ Te gapu si Ambaḻu we Damag, impaigammun Apudyus inonae angwa'tta tagu'ḵ maun-unan gapu'tte tuttuwae pammatida ḵan siya. Te ḵanan ni nigili si Ugud Apudyus, “Sa tagu aḵ Apudyus angwa si maun-unana mipagapu'tte pammatina, awad ḵan siya biyag aḵ inggana.”

Sa Ḵinaḻaweng Da Losane Tagu

¹⁸ Te aḵ Apudyus ad langit, impaigammuna sangana'tta adipun andayaw ḵan siya ya da angwa'ḵ lawweng. Te sa ḵinalawengda anupod si mipaigammuwan ni ḵatuttuwaan.

¹⁹ Te sa angigammuwan si mipanggob ḵan Apudyus, mamaḵ-ila te mismu we aḵ Apudyus nangipaila ḵan dida.

²⁰ Te taḵon ay nu adipun maila ḵinaapudyusna ya sa ḵabooḻanae ippun anungusna, mamaḵ-ila'tta ḵingwana inggan ni nangwaana'tte lubung. Pun ippun lasun da tagu we adi amati.

²¹ Te taḵon ay nu iniiggammudae awad aḵ Apudyus, adidapun andayaw ya adidapun os anggappiya ḵan siya. Yaḵon nambalin ippun anun da ansosomsomoḵda ya gummiḵbot somsomoḵda.

²² Ḵanandae nalaingda yaḵon nambalinda'ḵ dong-og.

²³ Te adidapun nandayaw si matattagu we Apudyus. Yaḵon siya dinaydayawda da ḵingwan di tagu we sinan-apudyus, sinantatagu, sinansissiwit, sinan-ayam ya da ḵais-isun da ḵumayam.

²⁴ Gapu'tte ḵinadong-ogda, iwwaḻang Apudyus dida ta ḵoonda da ngaimane lawweng ya ḵaissawe pipionda ya da ḵababbaine maḵwa'tta long-agda.

²⁵ Te pinasantanda ḵatuttuwaan mipanggob ḵan Apudyus atte tinutuli. Ḵad siya dinaydayawda ḵan nanserbiyanda da ḵingwan Apudyus yaḵon daḵampun ḵan Apudyus we nangwa'tta losane siya madaydayaw aḵ inggana. Amen.

²⁶ Sana gapunae iwwaḻang Apudyus dida ta ḵoonda da ḵababbaine pion da long-agda. Te da udume bubai itanungda adaḻugon da asimbubaidae daḵampun oḵyan aḵ maḵwa.

²⁷ Ḵad isuna bos atta laḻaḵi, daḵampun atta bubai adaḻugonda yaḵon siya maawisan ni giḵnada da asillaḻaḵida. Pun aaddi ye awatonda dusae labbongnae maatod ḵan dida te ḵaissaw da ḵooḵoonda.

²⁸ Gapu'tte adidapun namigbigan ḵan Apudyus, iwwaḻangna dida ta iturayan da lawwenge somsomoḵda dida ta ḵoonda da baḻangnae daḵampun oḵyan aḵ maḵwa.

²⁹ Siya awad atta somsomoḵda da losane kalasin da lawweng. Ḵamommodda, maaposda. Pumappatoyda, subboganda, nasiḵapda ya pasige siya sosomḵonda ampaḵaḻamonda da buḻunda ya sungadanda.

³⁰ Alliḵudda'tta asintataguda, sasangngaanda'ḵ Apudyus, am-amsewonda da asintataguda, indaddayawda, ansoḵaḻda, pasig ose ansomsomoḵda'tta udume kalasin di lawweng ya adidapun tuttuwaon da aammada ya da iinnada.

³¹ Nadong-ogda, adidapun mataḻgodan, taḵon ay da ḵabaḻyanda adidapun ayaton ya ippun ḵadaguda'tta udume tagu.

³² Taḵon ay nu igammuda tuttudun Apudyus we labbongdae madusa'ḵ inggana da tagu we angwa'tta ḵatti, sissiyae ḵoonda. Daḵampun aḵ abus ḵoonda nu adi ayunanda bos da udume angwa'tta ḵaḵnat.