Revelation 9 - Sa Ugud Apudyus

¹ Naabus ḵad, nanangguyub ḵumalimae anghel woḵ innilaḵ bituwone naottag sina'd lutae naḻpu'd langit. Sa annae bituwon naittan aḵ tuḻbiḵe anuḻbiḵna si onob ni abute ippun patinggan ni ḵaadaḻomna.

² Binuḵtana ḵad sadi ye abut, natanoḵwaḻ asuḵe isunan asuḵ di amode apuy woḵ gummiḵbot init ya sa langit gapu'tte sadi ye asuḵe naḻpu'tte abut.

³ Inninggaw os da dudune naḻpu'tte asuḵ woḵ nan-osogda'd luta. Naittanda'ḵ ḵabooḻane sumilude isun da scorpion.

⁴ Nibilin ḵan didae adida dadailon da lumun, ḵayu ya da udume allilingsi ye muḻa'd luta yaḵon siya abus aḵ dadailonda da tagu we adipun namaḻḵaan da ḵidayda si maḻḵan Apudyus.

⁵ Yaḵon adidapun naittan aḵ ḵabooḻane angongat atta tagu nu adi abuse ampaḵaḻamonda dida'tte unog di limae buḻan. Sa laḵ-amondae ampaḵaḻaman isuna ampaḵaḻaman ni tagu we siludan ni scorpion.

⁶ Pun sa unog ni sanae limae buḻan, piondae matoyda ya padasonda gongaton long-agda yaḵon isunae adidapun matoy.

⁷ Sa ḵatollongan da annae dudun, isuda da ḵabayu we naḵasaganae umoy maḵagubat. Naḻnobda'ḵ isunan koronae buḻawan ya da bosaḻda ḵad isunan bosaḻ di tagu.

⁸ Ḵad da buuḵda isunan buuḵ di bubai ya isunan baban di lion da babada.

⁹ Nataḵupaḻan da baḻuḵungda'tte isunan ḵagae taḵupaḻ. Sa ḵayabḵab ḵad da payaḵda isuna ḵodoḵodog da adu we ḵabayu we amutbut atta kalesae umoy atte gubatan.

¹⁰ Awad da siludda'tta ipusdae isunan silud di scorpione siya igaw ni ḵabooḻandae amaḵaḻam atta tagu si unog ni limae buḻan.

¹¹ Sa arida ḵad, sa anghel we simbiyang si abute ippun patinggan ni ḵaadaḻomna. Sa ngadanna'tte Hinebrew, Abaddon ya Apollyon ngadanna'tte Grineek we sa pionda ugudon, Dumaddadail.

¹² Nagangput ummunae ampaḵimute ampaḵaḻaman. Yaḵon awad de duwae daampun dumatong.

¹³ Pun nanangguyub ḵad miḵanome anghel, dingngoḻḵu gingae naḻpu'tte opate sakkud ni buḻawane altar atte sinagung Apudyus.

¹⁴ Ḵanana'tte ḵumanome anghel we nangdon aḵ tangguyub, “Inḵa uḵasan da opate anghel we nibawod atte igaw ni daḵoḻe tawwang Euphrates.”

¹⁵ Pun ummoyna inuḵasan dida te dida nisagana si ustuustu we tawon ḵan buḻan, aḻgaw ya orase umoyda pumatoy atte inḵaḵlun da tagu.

¹⁶ Nibaga ḵan saḵon iyap da suḻdadu we nangabayu we duwanggasute million.

¹⁷ Sa ḵatollongan da ḵabayu ya da nangabayu, ḵaḵna nipaila ḵan saḵon atte isun di in-inop: Da taḵupaḻ ḵad da baḻuḵungda, tuḻu we kalasi ye kolor. Awad de dilaag, blue ya sa ngela. Sa uḻun ḵad da ḵabayu, isudan uḻun di lion ya maḻpu si sungadda apuy, asuḵ ya sa sulfur.

¹⁸ Nanḵaḵatoy da inḵaḵlun da tagu gapu'tte sadi ye apuy, asuḵ ya sa sulfur we maḻpu'tta sungadda.

¹⁹ Te sa ḵabooḻan da sanae ḵabayu we gumngat, awad atta sungadda ya da ipusda. Te isunan uḻog da ipusdae nauḻuwan ya sana da inusardae amaḵaḻam atta tagu.

²⁰ Yaḵon da nabun-ane tagu we adipun nanḵaḵatoy gapu'tta sanae ampaḵaḻaman, adidapun nambabawi'tta basuḻda ya adidapun iyyagaye angwa. Sissiyae adidapun iyyagaye nanaydayaw atta aḻan ya da sinan-apudyus we naḵwa si buḻawan, palata, gambang, batu ya da ḵayu we ḵingwan di tagu we sinan-apudyus we adidapun maḵaila, maḵadongoḻ ya adidapun maḵataddaḻan.

²¹ Adidapun os imbabawi da udume ḵingwada ya adidapun iyyagaye nangwa, isun ni nangongatanda'tta tagu, sa nangaḻay-abanda'tta aḻan ta ampaḵaḻamonda da tagu ya sa miyadaḻuganda'tta daḵampun aḵ asawada ya sa nan-aḵawanda.