Revelation 8 - Sa Ugud Apudyus

Sa Naḻoḵtaan Ni Ḵumapitu We Maḻḵa

¹ Niloḵtan ḵad ni Ubbu we Karnero ḵumapitu we maḻḵan ni naḻuḵube ḵopel, naippun um-umsiyong ad langit atte gogwan di oras.

² Pun innilaḵ da pitu we anghel we summisiḵad si sinagung Apudyus. Naittanda'ḵ pitu we tangguyub.

³ Dummatong osae anghel we aangdon atte buḻawane iiggaan ni incenso woḵ ummoy summiḵad atte buḻawane altar. Naittan aḵ adu we incenso aḵ midoga'tte luwaḻun da losane tagun Apudyus aḵ masgob ya midatun ḵan Apudyus atte altar we awad atte sinagung ni trono.

⁴ Sa asuḵ ni incenso, nampangatu we nidoga luwaḻun da tagun Apudyus we naḻpu si iman ni anghel we sisiḵad atte sinagung Apudyus.

⁵ Naabus ḵad, innaḻan os ni anghel iiggaan ni incenso woḵ punuwona si bumaḻabaḻae usinge naḻpu si altar woḵ imbintugna'd luta. Pune sadi inninggaw angulḵuliyatyate ḵilat ya sa andangsoḻe ḵiduḻ, da udume aguduud ya nidisan os lunig.

Da Onome Ummunae Tangguyub

⁶ Naabus ḵad, nansagana da pitu we anghel we anangguyub.

⁷ Nanangguyub ḵad ummunae anghel, inninggaw daḻaḻu ya sa apuye naḵamsan aḵ daḻae naottag ad luta woḵ nasgob inḵaḵlun ni annae luta, isuna bos atta ḵayu ya da losane lumun.

⁸ Naabus ḵad, nanangguyub os ḵumagwae anghel, pun inggaw isunan simbelegane umapuapuye niballu'tte baybay woḵ nambalin aḵ daḻa inḵaḵlun ni baybay.

⁹ Pun natoy inḵaḵlun da losane matattagu'tte baybay ya nadadail inḵaḵlun da bapur.

¹⁰ Naabus ḵad, nanangguyub ḵumaḵlu we anghel woḵ naottag daḵoḻane bituwone naḻpu'd langite isunan silawe umapuapuy. Pun naottag atte inḵaḵlun da tawwang ya da bubun.

¹¹ Sa ngadan ni sanate bituwon, Ampait. Pun pummait inḵaḵlun da danum woḵ adu da natoye tagu te ininumda ampaite danum.

¹² Nanangguyub ḵad ḵumapate anghel, nadadail inḵaḵlun ni init, sa soḻag ya da bituwon woḵ gummiḵbot inḵaḵlun ni silawda. Pun gummiḵbot inḵaḵlun ni aḻgaw ya sa labi.

¹³ Pun innilaḵ buḵawe antattayap ad ngatu we indangsoḻna ḵanane, “Ḵaddagu! Ḵaddagu! Ḵaddagu da losane inggaw ad luta nu anangguyub da tuḻu we nabun-ane anghel.”