Revelation 7 - Sa Ugud Apudyus

Da Naḻpaan Aḵ Opatpuḻu Ya Opatlibu We Tagun Apudyus

¹ Naabus ḵad, innilaḵ da opate anghel we sumisiḵad atte opate dugyun ni lutae sosondonda opate maḻpuwan ni bibbid ta adi oḵyan mabibbidan luta, baybay ya da ngaimane ḵayu.

² Pun innilaḵ osae anghel we ngumatungatu we naḻpu'tte dumingitan inite oonnana maḻḵae ḵuwan ni matattagu we Apudyus. Pinoḵawana da opate buḻunnae anghel we innattan Apudyus aḵ ḵaḻabbongane anadail si luta ḵan baybay,

³ woḵ ḵanana, “Adiyu yan dadailon luta baḵon nu sa baybay baḵon nu da ḵayu inggana'ḵ maḻḵaanni da ḵiday da nanserserbi si Apudyus taḵu.”

⁴ Pun dingngoḻḵu belang da tagu we namaḻḵaan. Umoye naḻpaan aḵ opatpuḻu ya opatlibu we naḻpuda'tta ganaḵ da nasawaḻan aḵ duwae abeng Israel.

^5-8 Bagil nasawaḻan aḵ duwae libu da namaḻḵaan atta ganaḵ da abeng Israel we da Judah, Reuben, Gad, Asher, Naphtali, Manasseh, Simeon, Levi, Issachar, Zebulun, Joseph ya aḵ Benjamin.

Da Adipun Mabelange Tagu We Nampassilup Aḵ Itaḵ

⁹ Naabus ḵad sadi, innilaḵ os da amoamode tagu we adidapun mabelange naḻpu'tta losane ili ya da losane tribu ya da tagu we nansabasabali gingada ḵan naḻpuwanda. Sumisiḵadda'tte sinagung ni trono ya sa Ubbu we Karnero. Nampassilupda'ḵ itaḵe langgoyod ya nampaḵ-odonda'ḵ tubu we isun di baing ta angipail-anda si layadda.

¹⁰ Indangsoḻdae nampoḵaw woḵ ḵananda, “Sa Anagu ḵan ditaḵu, aḵ Apudyus taḵu we sa tutuḵdu'tte trono ya sa Ubbu we Karnero.”

¹¹ Inninggaw os da losane anghel atte nampaliḵwos si trono ya da angipangpangu ya da opate matattagu we ḵingwam. Nanalluḵuda'tte sinagung ni trono woḵ nandaydayawda ḵan Apudyus,

¹² ḵananda, “Dayawon taḵu, anggappiya taḵu ḵan patgan taḵu'ḵ Apudyus we anserbiyan taḵu ya bigbigon taḵu we siya maḻpuwan ni ḵinadayaw, ḵinalaing ya ḵabooḻan ḵan ḵinapigsa. Amen!”

¹³ Pun ḵanan ni osa'tta angipangpangu we nangimus ḵan saḵon, “Igammum ḵad ain nu ngai da annae nampassilup aḵ itaḵe langgoyod ya nu dinu naḻpuwanda?”

¹⁴ Ḵanaḵ ḵan siya, “Naid, Apu, siḵa angigammu.” Pun ḵanana, “Sana da nallagum atte ampaḵimute ampaḵaḻaman. Pinapoḻḵasda da langgoyodda'tte daḻan ni Ubbu we Karnero ta umitaḵda.

¹⁵ Pun sana gapunae awadda si sinagung ni tronon Apudyus we anserserbi ḵan siya si templona'tte inaḻgaw ya nilabi. Sa awad atte trono, patilayune buḻunna dida ya taltalliḵunana dida.

¹⁶ Adidapun paat ogon mauḻat baḵon nu mauwaw ya adidapun ogon giḵnaon atung ni init ya da udume an-atung.

¹⁷ Te sa Ubbu we Karnero we awad si gaggawan ni trono, siya anangḵon ḵan dida. Ḵad ipuyutna dida'tte bubune maḻpuwan ni danume angitod si biyag. Ḵad punasan os Apudyus losan da luwada.”