Revelation 6 - Sa Ugud Apudyus

Sa Naḻoḵtaan Ni Onome Maḻḵa

¹ Pun innilaḵe niloḵtan ni Ubbu we Karnero osa'tta pitu we maḻḵan ni naḻuḵube ḵopel woḵ dingngoḻḵu isunan ḵiduḻe gingan ni osa'tta opate matattagu we ḵingwam. Ḵanana, “Umaliḵa!”

² Pune sadi innilaḵ itaḵe ḵabayu we sa nangabayu, aangdon aḵ panae sa usaronae maḵagubat. Naittan aḵ korona woḵ daguse nallibbat ta pagatupana oḻgon da ḵabusuḻna.

³ Naabus ḵad, niloḵtan ni Ubbu we Karnero ḵumagwae maḻḵan ni naḻuḵube ḵopel woḵ dingngoḻḵu gingan ni ḵumagwae matattagu we ḵingwame ḵanana, “Umaliḵa!”

⁴ Pun natanoḵwaḻ dilaage ḵabayu. Sa nangabayu ḵad, naittan aḵ ḵaḻabbongane angaan atte uḻnus sina'd luta ta anggugubat ya ampapatoy da tagu. Naittan os atte andu we ispada.

⁵ Pun niloḵtan ḵad ni Ubbu we Karnero ḵumaḵlu we maḻḵan ni naḻuḵube ḵopel, dingngoḻḵu gingan ni ḵumaḵlu we matattagu we ḵingwam. Ḵanana, “Umaliḵa!” Intollongḵu ḵad, innilaḵ ngitite ḵabayu. Sa nangabayu ḵad, aangdon aḵ timbangan.

⁶ Dingngoḻḵu isun di gingae naḻpu si gawan da opate matattagu we ḵingwame ḵanana, “Sa umali ye aḻgaw, awad de inggi. Ḵad sa tangdan ni osae tagu'tte sin-aḻgaw duwan supae wheat baḵon nu gogwan di kilo we arinae barley ye ossaane palata nginana. Yaḵon adim dadailon mantika ya sa bayas.”

⁷ Niloḵtan ḵad ni Ubbu we Karnero ḵumapate maḻḵan ni naḻuḵube ḵopel, dingngoḻḵu gingan ni ḵumapate matattagu we ḵingwame ḵanana, “Umaliḵa!”

⁸ Intollongḵu ḵad, innilaḵ buute ḵabayu. Sa nangabayu ḵad nangngadan aḵ Ḵatoy ya sa ummun-unud ḵan siya nangngadan aḵ Hades we igaw da natoy. Naittanda'ḵ ḵaḻabbongane anadail atte inḵapat da tagu sina'd luta. Gongatonda da udum atte ispada, da udum atte inggi, da udum atte dayang-as ya da udume gongaton da atape ayam sina'd luta.

⁹ Niloḵtan ḵad ni Ubbu we Karnero ḵumalimae maḻḵan ni naḻuḵube ḵopel, innilaḵ atte dugun ni altar da ḵalidodwan da napatoy gapu si nangiwaḻagawaganda si Ugud Apudyus ya sa nanaḵdoḻanda si tuttudun Jesus.

¹⁰ Ḵanandae nangidangsoḻ, “Apudyus we maḵabooḻ atta losan, siḵa gattoḵe nasantuwan ḵan tuttuwa, ḵamaan ni anguwisam ḵan angibaḻosam atta tagu'd lutae namatoy ḵan namapoy-as atta daḻani?”

¹¹ Pun naittan da sadi ye ḵalidodwa si itaḵe langgoyode silup. Ḵad nibaga ḵan didae an-illongda yan aḵ sin-aḵitan inggana'ḵ maganggangput belang da susunudda ḵan Kristu we anserbi ḵan Apudyus we patoyon da tagu we isun os ni napatoyanda.

¹² Niloḵtan ḵad ni Ubbu we Karnero ḵumanome maḻḵan ni naḻuḵube ḵopel, baag-en inninggaw ampigsapigsae lunig. Sa init ḵad, gummiḵbote isun ni ngitite sinnun, sa langngayae soḻag, dummilaage isun di daḻa.

¹³ Da bituwon ḵad os ad langit, naottagda si lutae isun ni bungan ni ḵayu we maduganaḵ daampun maḻ-um nu mayugayug si ampigsae bali.

¹⁴ Sa sadi ye timpu nawawan langite isunan naḻuḵube ḵopel. Ḵad losan ose beleg ya da ili ye niliḵwos ni baybay, naḵaanda'tta igawda.

¹⁵ Ummogyat losan da tagu'd luta. Da ari ya da udume papangat, da pangat da suḻdadu, da babaḵnang ya da udume anna ḵabooḻanda ya da udume musassu baḵon nu daḵampun, losanda nantaḻu'tta liyang ya sa igaw da batbatu si bebbeleg.

¹⁶ Ummadawagda'ḵ ḵadagu'tta bebbeleg ya da danaḵḵoḻe batbatu woḵ ḵananda, “Magday ḵayu ta tab-unanyu diḵani ta adin diḵani ilan atte tumutuḵdu si trono ya mitaḻu ḵani nu dumatong ampaḵimute sangan ni Ubbu we Karnero.

¹⁷ Te dummatong ḵaog-ogyate aḻgaw ni umamdane sangada'tta tagu ya naippun paat angilasat!”