Revelation 5 - Sa Ugud Apudyus

Sa Naḻuḵube Ḵopel Ya Sa Ubbu We Karnero

¹ Pun innilaḵ atte dawinane iman ni tutuḵdu'tte trono oonnanae naḻuḵube ḵopele nagiliyan labawna ya sa odogna. Ḵad awad da pitu we isunan maḻḵae nipaḵot si igidna ta adi mauḵayag.

² Innilaḵ os anghel we daḵoḻ ḵabooḻanae iwwaḻagawagna'tte andangsoḻe gingae ḵanana, “Ngai ḵamman awad ḵaḻabbonganae alloḵta'tta sanae maḻḵa ta buḵyagona naḻuḵube ḵopel?”

³ Yaḵon taḵon ay ad langit baḵon nu ad luta baḵon nu ad daḻom atte lutae igaw da natoy, naippun pulus osa'ḵ anna ḵaḻabbonganae amuḵyag atte naḻuḵube ḵopel ta basaona.

⁴ Pun insaḻadḵu we umibiibil te naippun naodasan aḵ ḵallabbong amuḵyag atte naḻuḵube ḵopel.

⁵ Pune sadi ḵanan ni osa ḵan saḵone angipangpangu, “Adiḵa umibiibil te ilam ḵad awad de ngannonda Lion atta ganaḵ Judah ya sa ganaḵ Ari David. Illogna'ḵ Satan pun awad ḵan siya ḵaḻabbongane alloḵta'tta pitu we maḻḵae nipaḵot si naḻuḵube ḵopel ta buḵyagona.”

⁶ Inugudna ḵad sadi, innilaḵ Ubbu we Karnero we sisiḵad si gaggawan da opate matattagu we ḵingwam ya da angipangpangu we niliḵwosda trono. Sa ḵatollongan ḵad ni Ubbu we Karnero isuna ḵatollongan ni napatoy. Pitu sakkudna ya pitu bos atanae dida da pitu we Ispiritu Santu we imbuunna'tta losane ili'd luta.

⁷ Ummoy Ubbu we Karnero atte trono woḵ innaḻana naḻuḵube ḵopel si madawinane iman ni tutuḵdu'tte trono.

⁸ Innaḻana ḵad naḻuḵube ḵopel, ummoy losan da opate ḵingwam ya da duwampuḻu ya opate angipangpangu we nanalluḵu si sinagung ni Ubbu we Karnero. Sin-ossaossa ḵan dida nangdon aḵ arpae sa usarondae andayaw ya sa buḻawane maḻuḵunge napnu'tte incenso we luwaḻun da tagun Apudyus.

⁹ Ḵanandae angiḵanḵanta'tta baru we ḵanta, “Siḵa ḵallabbong angaḻa si naḻuḵube ḵopel ya alloḵta'tte maḻḵa. Te napatoyḵa woḵ sa daḻam nanubutnu'tta tagu ta ambalindae tagun Apudyus. Ḵad maḻpuda'tta losane ili ya da losane tribu ya da tagu we nansabasabali gingada ḵan naḻpuwanda.

¹⁰ Ḵad indogam dida si ampangatam woḵ ḵingwam dida'ḵ papadi ye anserbi si Apudyus taḵu ya midogada ḵan siḵa ampangat sina'd luta.”

¹¹ Nantollongaḵ ḵad ḵasin, dingngoḻḵu gingan da ummamdane anghel we adipun mabelang. Niliḵwosda trono ya da matattagu we ḵingwam ya da angipangpangu.

¹² Ḵanandae nangidangsoḻ, “Sa Ubbu we Karnero we napatoy, ḵaḻabbonganae awaton ḵabooḻan, ḵinabaḵnang, ḵinalaing, ḵinapigsa, ḵinapatog, ḵinadayaw ḵan anggappiyaan.”

¹³ Naabus ḵad, dingngoḻḵu imbagan da losane awad ad langit, ad luta ya ad daḻom atte lutae igaw da natoy ya sa baybay. Losan atta ḵingwan Apudyus, ḵananda, “Ḵan siyae tutuḵdu'tte trono ya sa Ubbu we Karnero, mabindisyunan, mapatgan, madaydayaw ya mabigbig ḵabooḻanda'ḵ inggainggana.”

¹⁴ Pun ḵanan da opate matattagu we ḵingwam, “Amen.” Ḵad da angipangpangu, nanalluḵuda bose nandaydayaw.