Revelation 4 - Sa Ugud Apudyus

Sa Madayawan Apudyus Ad Langit

¹ Naabus ḵad, intapḵu we nabuḵtan sawang ad langit. Dingngoḻḵu bos isun ni dingngoḻḵu we isunan gingan di tangguyube ḵanana ḵan saḵon, “Umaliḵa sina'd langit ta ipailaḵ ḵan siḵa da ḵasapuḻane maḵwa si umali ye aḻgaw.”

² Pun daguse isunan impain-inop ni Ispiritu Santu ḵan saḵon woḵ innilaḵ tronon ni ari'd langite inggawe tutuḵdu.

³ Sa ḵatollongan ḵad ni tutuḵdu, sumelaselape isuna ampatoge batu we ngannonda jasper ya carnelian. Ḵad sa nampaliḵwos atte trono, inninggaw abungaḻe lingsi kolornae isun di batu we ngannonda emerald.

⁴ Sa nampaliḵwos atte trono, inggaw os da duwampuḻu ya opate trono we tummutuḵduwan da duwampuḻu ya opate angipangpangu. Nampassilupda'ḵ itaḵe silup ya nakoronaanda'ḵ buḻawan.

⁵ Sa maḻpu si nanggagawae trono, inninggaw angulḵuliyatyate ḵilat ya sa andangsoḻe ḵiduḻ ya da udume aguduud. Ḵad sa sinagungna, inninggaw da pitu we silawe gumilgillayabe mipail-an da pitu we Ispiritun Apudyus.

⁶ Sa sinagung os ni trono, inninggaw isunan baybaye sa ḵatollongana isun di ampoḻḵase samling ḵan kristal we sumelaselap. Sa adani si opate igid ni trono, inninggaw da opate matattagu we ḵingwanae sa long-agda, pasige ata sinagungda ya siya bos atta odogda.

⁷ Sa ḵatollongan ni ummunae ḵingwana isunan lion, sa ḵumagwa isunan baḵa, sa ḵumaḵlu isunan bosaḻ di tagu ya sa ḵumapat isuna daḵoḻe buḵawe antattayap.

⁸ Ḵad da sanae opate ḵingwana, napayaḵanda bos aḵ sin-oonom ya losan ata long-agda taḵon ay ad daḻom si payaḵda. Inaḻgaw ḵan nilabi, adidapun paat iginoḵe anḵanta. Ḵanandae angiḵanḵanta, “Aḵ Apudyus abus aḵ gattoḵe nasantuwan! Siya maḵabooḻ atta losan. Inninggaw si awe, iinggaw sinsadi ya iinggaw aḵ inggana.”

⁹ Ḵad da annae opate matattagu we ḵingwana andaydayawda, ipatpatogda ya anggappiyada si tutuḵdu'tte trono we sa matattagu'ḵ inggana.

¹⁰ Ḵad umoy da duwampuḻu ya opate angipangpangu analluḵu si sinagung ni tutuḵdu si trono we sa matattagu'ḵ inggana ya andaydayawda bos ḵan siya. Ḵad ibadongda bos da koronada'tte sinagungna ya ḵanandae angiḵanḵanta,

¹¹ “Siḵa Apu we Apudyusni, ḵaḻabbongame awaton dayawni, ḵinapatogni ya bigbigonni ḵabooḻam. Te siḵa nangwa'tta losan. Ḵad gapu'tte panggobnu, naḵwada ya matattaguda.”