Revelation 22 - Sa Ugud Apudyus

¹ Pun impailan ni anghel ḵan saḵon tawwange maḻpuwan ni danume angitod si biyag. Sa annae tawwang, sumilisilinge isunan kristal ḵad maḻpu'tte tronon Apudyus ya sa Ubbu we Karnero.

² Ḵad an-ayus atte gaggawan ni ḵaḻsa'tte sadi ye siyudad. Sa nandomang atte sanae tawwang, inggaw da ḵayu we angitod atte biyag. Binuḻane amungada. Ḵad sa tubun da sanae ḵayu, usaronda iyagas atta tagu'tta ḵinailin di ili ta adida masaḵit.

³ Ḵad naippun ogon aḻawage sa isun ni imbagan Apudyus atte awe. Sa tronon Apudyus ya sa Ubbu we Karnero, awad atte sanate siyudad ya da losane anserbi ḵan Apudyus, andaydayawda ḵan siya.

⁴ Ḵad ilanda bosaḻna ya migili ngadanna'tta ḵidayda.

⁵ Ḵad naippun ogon labi, adidapun ogon masapuḻ paddan ni silaw baḵon nu sa init te mismu we aḵ Apudyus we Apu allangḻang ḵan dida. Ḵad maḵapangatda ḵan siya'ḵ inggainggana.

⁶ Pun ḵanan ni anghel ḵan saḵon, “Tuttuwa ya mataḻgodan da losane inugudḵu ḵan diḵayu. Te aḵ Apu we Apudyus angidaḻan atte somsomoḵ da profetana. Siya bos nangibuun atte anghelna ta mipaigammu ḵan diḵayu we anserbi ḵan siya da ḵasapuḻane madam-an maḵwa.”

Sa Ḵasine Umaliyan Jesus

⁷ Pune sadi ḵanan Jesus, “Dongngonyu anna. Madam-an angulinaḵ. Pian tagu we tuttuwaona da ngaimane nipadtu si annae iblu.”

⁸ Saḵon aḵ John we nangngoḻ ya nangitollong atta annae nigili. Sa nangngoḻaḵ ḵan nangitollongaḵ, nanalluḵuwaḵ atte sinagung ni anghel we sa nangipaila ḵan saḵon ta andayawaḵ oḵyan ḵan siya.

⁹ Yaḵon ḵanana ḵan saḵon, “Adipun ḵasapuḻane ḵoom ḵaḵnat! Aḵ Apudyus abus aḵ dayawom! Te anserbiyaḵ os ḵan Apudyus we isuna bos ḵan siḵa ya da susunudnu ḵan Kristu we da profetan Apudyus ya da losane tumuttuwa'tta nigili'tte annae iblu.”

¹⁰ Pun pinagatupana woḵ ḵanana, “Adim ililimod mipanggob atta nipadtu we da nigili'tte annae iblu te madam-an mituttuwaanda.

¹¹ Da dam-on angwa'tta lawweng ya da ḵaissaw, ḵinnuwandae pagatupandae angwa'tta lawweng ya da ḵaissaw. Da dam-on angwa'tta naun-unan ya sa ambaḻu we antatagu, ḵinnuwanda bose pagatupandae angwa'tta naun-unan ya angunud atte ambaḻu we antatagu.”

¹² Ḵanan Jesus, “Dongngonyu anna. Madam-an umaliyaḵ. Ḵad nu umaliyaḵ, idatongḵu gungunae ittoḵ si sin-ossaossae sigun atta ḵingwana.

¹³ Saḵon nangadanan aḵ Alpha ḵan Omega te saḵon ummuna ya anguddidi. Saḵon os laplapu ya anungus da losan.”

¹⁴ “Pian da tagu we anaḵsaḵ atta langgoyode silupda te awad de ḵaḻabbongandae lumnoḵ atte lewangan ni sadi ye siyudad ḵan angan atte bungan ni ḵayu we angitod si biyag.

¹⁵ Yaḵon adipun maḵaḻnoḵ sidi da ngaimane angwa'tta lawweng, da andadawaḵ, da angadaḻug atta daḵampun aḵ asawada, da pumappatoy, da andaydayaw atta sinan-apudyus ya da losane tuliyan ya da ḵapappaila.”

¹⁶ Ḵanana bos, “Saḵon aḵ Jesus we nangibuun si anghelḵu'ḵ anaḵdoḻ si ḵatuttuwaan da anna ḵan diḵayu ta ipaigammuyu'tta gimung da namati. Saḵon ganaḵ Ari David we nipadtu si awe ya nangadanan aḵ ambigattone sa ampigsa silawna.”

¹⁷ Ḵanan ni Ispiritu ya da tagunae mipani si asaw-on ni Ubbu we Karnero, “Awwaynu.” Ḵad ḵanan oḵyan os ni andodongngoḻ, “On, awwaynu.” Ngaimane mauwaw, umali oḵyan ta uminum atte libli ye danume angitod si biyag.

Sa Anungus Ni Annae Suḻat

¹⁸ Annae bagbagaaḵ losan diḵayu we nangngoḻ si nipadtu'tte annae iblu: Nu awad osa'ḵ dog-ana annae nagangpute nigili, dog-an os Apudyus ḵan siya da ampaḵaḻamane nibaga'tte anna.

¹⁹ Nu awad os osa'ḵ ḵaanona udum atta annae nipadtu si annae iblu, ḵaanan os Apudyus ḵaḻabbonganae maḵaḵan atte bungan ni ḵayu we angitod si biyag ya sa ḵaḻabbonganae inggaw atte siyudad Apudyus we nibaga'tte annae iblu.

²⁰ Sa anaḵdoḻe tuttuwa losan da anna ḵanana, “Tuttuwae madam-an umaliyaḵ.” Amen! Awwaynu, Apu Jesus.

²¹ Awad oḵyan ḵan diḵayu we losane tagun Apudyus ḵinabaḻun Apu Jesu Kristu. Amen.