Revelation 21 - Sa Ugud Apudyus

Sa Baru We Langit Ya Sa Baru We Luta

¹ Pun innilaḵ baru we langit ya sa baru we luta te sa ummunae langit ya sa ummunae luta, nawawanda ya sa baybay naippun os ogon.

² Innilaḵ os baru we Jerusalem we sa siyudad Apudyus. Sa baru we Jerusalem we maḻpu ḵan Apudyus ad langit. Sa sanae siyudad, naganggangpute nisaganae isuna bubai ye nansilup atte maḵaawise silupe umoy miyabot atte angasawa ḵan siya.

³ Pun inggaw andangsoḻe gingae dingngoḻḵu we naḻpu'tte trono we ḵanana, “Andiya miḵamboḻoyan Apudyus atta tagu ḵad bigbigonae taguna dida ya bigbigon os da tagu we anna ḵan dida Apudyusda.

⁴ Punasana da losane luwada ḵad adidapun ogon matoy. Naippun ogon andomdom ya umibil ya naippun ogon ampaḵaḻam te da sanae inggaw si awe, naiddapun ogone sana.”

⁵ Pun ḵanan ni tummuḵdu'tte trono, “Ilam, pabaruwoḵ da losane awad.” Ḵanana bos ḵan saḵon, “Igilim da annae imbagaḵ te mataḻgodanda ya tuttuwada.”

⁶ Pun ḵanana, “Losan atta anna, nituttuwada. Saḵon nangadanan aḵ Alpha ḵan Omega, piona ḵanan, saḵon laplapu ya anungus ni losan. Ittoḵ atta mauwawe tagu danume naḻpu si bubune angitod si biyag aḵ ingganae ippun bayadna.

⁷ Sa tagu ḵade oḻgona lawweng, allaḵsunna da anna losan. Bigbigona saḵon aḵ Apudyusna ya bigbigoḵ ose abengḵu.

⁸ Yaḵon ampaḵimut maḵwa'tta tagu we adidapun ipapuut pammatida gapu si ogyatda, da naippun pammatida, da lawweng ugalida, da pumappatoy, da angadaḻug atta daḵampun aḵ asawada, da andadawaḵ, da ambubuyun, da anaydayaw atta sinan-apudyus ya da losane tuliyan. Asida umoy inggaw atte igaw ni gumilgillayabe apuy ḵan sulfur. Sana ḵumagwae ḵatoy.”

Sa Baru We Jerusalem

⁹ Pun ummali osa'tta sadi ye pitu we anghel we awad ḵan siya da pitu we maḻuḵunge napnu'tta pitu we anungus da ampaḵapaḵaḻaman. Ḵanana ḵan saḵon, “Umaliḵa ta ipailaḵ ḵan siḵa bubai ye asaw-on ni Ubbu we Karnero.”

¹⁰ Pun isun di impain-inop ni Ispiritu Santu ḵan saḵon woḵ inniyoy ni anghel saḵon atte antaḵnange beleg woḵ impailana baru we Jerusalem we sa siyudad Apudyus. Sa baru we Jerusalem we maḻpu ḵan Apudyus ad langit.

¹¹ Sumilisilinge isuna ḵinapaddan Apudyus we mismu ya sa silingna ḵad, isuna siling ni ḵapatogane batu we ngannonda jasper ya ampatapataḵe isun di kristal.

¹² Sa nalliḵwose ḵabitin ni sadi ye siyudad, antaḵnang ya nagagaaman. Nasawaḻan aḵ duwa lewanganna, ḵad naguwaḻdaan atta nasawaḻan aḵ duwae anghel. Ḵad sa sin-ossae lewangan, nasin-ossa nigili ngadan da nasawaḻan aḵ duwae abeng Israel ya da ganaḵda.

¹³ Awad da tuḻu we lewangan atte ḵapon si dumingitan init, tuḻu bos atte ḵapon si mipisongan init, tuḻu si ḵapon ad lagud ya tuḻu bos atte ḵapon ad daya.

¹⁴ Sa pon-ad ḵad ni ḵabitin ni sadi ye siyudad, inggaw da nasawaḻan aḵ duwae danadanaḵḵoḻe batu ḵad sa sin-ossae batu nasin-ossa nigili ngadan da nasawaḻan aḵ duwae apostol ni Ubbu we Karnero.

¹⁵ Sa anghel we nan-ugud ḵan saḵon, aangdon aḵ buḻawane iisong ta isongona sanae siyudade midoga ḵabiti ya da lewangan.

¹⁶ Sa sanae siyudad napaḻpaḻtong, piona ḵanan an-isu ḵaanduna ḵan ḵaaḻwana. Inisong ḵad ni anghel, duwallibu ya opat gasute kilomitro ḵaanduna, ḵaaḻwana ya ḵataḵnangna.

¹⁷ Pun inisongna bos ḵabitin ni sadi ye siyudad. Sa isongna onompuḻu ya onome mitro. Sa mitro we inusar ni anghel we nan-isong, isuna bos mitro we usaron da tagu.

¹⁸ Napan-ige buḻawan sanae siyudad ya ampoḻḵase isun di samling ḵopyana ya sa ḵabitina jasper ḵopyana.

¹⁹ Da batu ḵade namon-ad atte nisaadana, naam-ammaanda si losane kalasin di ampatoge batu. Sa ummuna ḵad, naam-ammaan atte jasper, sa ḵumagwa ḵad sapphire, sa ḵumaḵlu ḵad agate, sa ḵumapat ḵad emerald,

²⁰ sa ḵumalima ḵad onyx, sa ḵumanom ḵad carnelian, sa ḵumapitu ḵad chrysolite, sa ḵumawaḻu ḵad beryl, sa ḵumasiyam ḵad topaz, sa ḵumasimpuḻu ḵad chrysoprase, sa miḵasawaḻ aḵ ossaan jacinth ya sa miḵasawaḻ aḵ duwa amethyst.

²¹ Da nasawaḻan ḵad aḵ duwae lewangan, sin-ossae perlas ḵopyan ni osae lewangan. Ḵad sa ḵaḻsan ni sadi ye siyudad, napan-ige buḻawan ya ampoḻḵase isun di samling.

²² Naippun innilaḵ aḵ templo'tte sanate siyudad te aḵ Apudyus we Apu we maḵabooḻ atte losan ya sa Ubbu we Karnero, didae mismu templon ni siyudad.

²³ Sa paddan ni init ḵan soḻag, adipun os ḵasapuḻan te sa silaw ni siyudad, sa ḵinapaddan Apudyus ya sa Ubbu we Karnero.

²⁴ Ḵad da tagu'd luta, masilawanda si ḵinapaddana ya an-iyoy da losane ari'tta ḵinabaḵnangda sidi.

²⁵ Da lewangan atte sadi ye siyudad, adidapun paat maomban te pasige aḻgaw ḵad naippun ogon labi.

²⁶ Maiyoy sidi da losane ḵinabaḵnang ya ḵinadayaw da tagu'tta ḵinailin di ili.

²⁷ Yaḵon naippun maḵaḻnoḵ atta ngaimane ibelang Apudyus aḵ ḵaissawe isun da angwa'tta ampabain ya da losane tuliyan yaḵon abus da nigili da ngadanda si iblun ni Ubbu we Karnero we nigiliyan da awad da biyagda'ḵ inggana'ḵ maḵwae lumnoḵ.