Revelation 20 - Sa Ugud Apudyus

Sa Sillibu We Tawon

¹ Pun innilaḵ anghel we naḻpu'd langite aangdon aḵ daḵoḻe ḵawad ya sa tuḻbiḵe amuḵatna si abute ippun patinggan ni ḵaadaḻomna.

^2-3 Pun dinoḵmaana dragone sa nampailae isun di uḻog atte awe ya sa nangngadan os aḵ Satan. Ḵinawadana woḵ imballuna'tte abute ippun patinggan ni ḵaadaḻomna. Naabus ḵad, intuḻbiḵna sawangna ya pinaḵotana'tte maḻḵa ta sinyale adipun maḵwae mabuḵtan ta ippun ogon inonae angallelaw atta tagu'tta ḵinailin di ili inggana'ḵ magangput sillibu we tawon. Maabus ḵad, ḵasapuḻane mapuḵayan ḵasin yaḵon abuse sin-aḵitan.

⁴ Pun innilaḵ da tummuḵdu'tta trono we naittan aḵ ḵaḻabbongane anḵuwis. Innilaḵ os da ḵalidodwan da nagongat gapu'tte nangitaḵdoḻanda'tte mipanggob ḵan Jesus ya sa nangiwaḻagawaganda si Ugud Apudyus. Dida da adipun nandaydayaw atte ḵaog-ogyate ayam ya sa sinan-ayame ḵais-isuna. Adidapun os impamaḻḵa da ḵidayda baḵon nu da imada. Nataguda bos ḵasin woḵ nidogada ḵan Kristu we nampangat si sillibu we tawon.

⁵ Sana umunae umuliyan da tagu. Da udume nanḵaḵatoy, adidapun umuli inggana'ḵ magangput sadi ye sillibu we tawon.

⁶ Da midogae angipadas atte umunae umuliyan da nanḵaḵatoy, pianda ya dida tagun Apudyus te ippun ogon ḵabooḻan ni ḵumagwae ḵatoy ḵan dida. Yaḵon da sanae pian, dida ambalin aḵ papadi ye anserserbi ḵan Apudyus ya aḵ Kristu. Ḵad midogada si ampangatan Kristu si sillibu we tawon.

Sa Maabaḵan Satan Ya Sa Madusaana

⁷ Nu magangput sillibu we tawon, mapuḵayan aḵ Satan atte nibaḻudana.

⁸ Ḵad umoyna allelawon da ngannonda Gog ya Magog we da tagu'tta ḵinailin di ili'tta opate dugyun ni luta. Dagupona dida ta maḵagubatda. Sa belangda ḵad isuda gallis atte taḻantag ni baybay.

⁹ Ḵad tadtaddaḻanonda aḻwae lutae umoy atte nampaliḵwos atte siyudade pipion Apudyus we sa inggawan da taguna. Yaḵon inggaw apuye naḻpu'd langite nanogob ḵan dida.

¹⁰ Ḵad aḵ Satan we nangallelaw ḵan dida, asi miballu si igaw ni gumilgillayabe apuy ḵan sulfur we sa niballuwan ni ḵaog-ogyate ayam ya sa sinan profeta. Ḵad ampaḵapaḵaḻamda'tte inaḻgaw ya nilabi'ḵ inggainggana.

Sa Anungus Ni Anguwisan Apudyus Atta Tagu

¹¹ Naabus ḵad, innilaḵ daḵodaḵoḻe itaḵe trono ya innilaḵ os tummutuḵdu sidi. Ḵad sa luta ya sa langit, mawawandae isun di umawidda umadayu ḵan siya. Ḵad adidapun ogon maila.

^12-13 Innilaḵ os da natoye nangatu ya nababae summisiḵadda'tte sinagung ni trono. Inninggaw da naḻpu'd Hades we igaw da nanḵaḵatoy ya da nanḵaḵatoy atte baybay. Pun nabuḵyag iblu we nigiliyan da ngadan da awad da biyagda'ḵ inggana. Nabuḵyag os da iblu we nigiliyan da losane ḵingwan da tagu woḵ naḵuwis da sin-ossaossa sigun atta ḵingwadae nigili'tta annae iblu.

¹⁴ Naabus ḵad, sa ḵatoy ya sa gagangaye igaw da natoy ad Hades, niballuda'tte igaw ni gumilgillayabe apuy ḵan sulfur. Sana ḵumagwae ḵatoy.

¹⁵ Ḵad ngaimane adipun nigili ngadanna'tte iblu we nigiliyan da ngadan da awad da biyagda'ḵ inggana, niballuda si igaw ni gumilgillayabe apuy ḵan sulfur.