Revelation 19 - Sa Ugud Apudyus

Sa Nanggangganasan Da Awad Ad Langit

¹ Naabus ḵad, dingngoḻḵu andangsodangsoḻe gingae isunan gingan di ummamdane tagu'd langite ḵanandae angiḵanḵanta, “Madaydayaw aḵ Apudyus taḵu! Bigbigon taḵu we maḵabooḻe nanagu ḵan ditaḵu ya bigbigon taḵu ḵinangatuna.

² Te tuttuwa ḵan naun-unan anḵuḵuwisna. Inḵoddongnae madusa nandindinamage puta te siya nangawis atta tagu'd lutae midoga si ḵaissawe ugalina. Ḵad imbaḻos Apudyus ḵan siya da gingngatnae nanserbi ḵan siya.”

³ Ḵananda bos ḵasine nangidangsoḻ, “Madaydayaw aḵ Apudyus te sa asuḵ ni nasgobe bubai umoyooyon ad ngatu'ḵ inggainggana.”

⁴ Ḵad da duwampuḻu ya opate angipangpangu ya da opate matattagu we ḵingwam, nanalluḵudae nangidaydayaw ḵan Apudyus we tutuḵdu si trono. Ḵananda, “Amen! Madaydayaw aḵ Apudyus!”

Sa Kasar Ni Ubbu We Karnero

⁵ Pune sadi dingngoḻḵu gingae naḻpu si trono we ḵanana, “Idayawyu Apudyus taḵu, losan ḵayu we anserbi ya angisipog ḵan siya, nangatu man baḵon nu nababa.”

⁶ Pun dingngoḻḵu bos da gingae andangsodangsoḻe isunan gingan di ummamdane tagu. Isunan pagasapas di danume maḻpu si antaḵnange utu ya andangsoḻe aguduud di ḵiduḻ. Ḵanandae nangidangsoḻ, “Madaydayaw aḵ Apu taḵu we Apudyus we maḵabooḻ atta losan te siya annae angipangat atta losan.

⁷ Lumayad taḵu ya itaḻayag taḵu ya dayawon taḵu ḵinangatuna te sinsadi kasar ni Ubbu we Karnero. Sa angasawa ḵan siya naabus naḵasagana,

⁸ te niyunude iḵabotna ampatoge silupe itaḵe sumilisiling ya ampoḻḵapoḻḵas.” Sa pion ni itaḵe silup ḵanan, da naun-unane ḵingwan da tagun Apudyus.

⁹ Pun ḵanan ni anghel ḵan saḵon, “Igilim anna: Pian da tagu we naayagan aḵ midoga maḵaḵan atte kasar ni Ubbu we Karnero.” Pun pinagatupana woḵ ḵanana, “Sana tuttuwae Ugud Apudyus.”

¹⁰ Sa nangugudan ni anghel atte sadi, nanalluḵuwaḵe andayaw ḵan siya. Yaḵon ḵanana, “Adipun ḵasapuḻane ḵoom ḵaḵnat! Aḵ Apudyus abuse andayawam! Saḵon ḵad, anserserbiyaḵ ose isum ḵan Apudyus ya da susunudnu ḵan Kristu we sissiyae amati'tta impaigammun Jesus. Te da impaibagan ni Ispiritu Santu atta profeta, naḻpuda si impaigammun Jesus.”

Sa Nangngogan Ni Nangabayu Si Itaḵe Ḵabayu

¹¹ Pun innilaḵ ad langite nabuḵatan woḵ inninggaw itaḵe ḵabayu. Sa nangabayu ḵad, nangadanan aḵ Mataḻgodan ya Tuttuwa. Ḵad naun-unan anḵuḵuwisna ya naun-unan os inonae maḵagubat atta ḵabusuḻna.

¹² Sa atana ḵad, isunan gumilgillayabe apuy ya sa uḻuna ḵad, nabaḻangatan atta adu we korona. Ḵad nigili bos ḵan siya ngadanna yaḵon siya abus aḵ angigammu si piona ḵanan.

¹³ Nansilup atte langgoyode nilinong si daḻa ya sa nangngadanda ḵad ḵan siya, Sa Ugud Apudyus.

¹⁴ Da ummamdane suḻdadu'd langit, nituntun-udda ḵan siya. Nangabayuda bos atta itaḵe ḵabayu ya nampassilupda'ḵ itaḵe ampatog ḵan ampoḻḵase silup ya ippun paat mansada.

¹⁵ Sa nangadanan aḵ Ugud Apudyus, awad ḵan siya antadome ispadae maḻpu si sungadnae siya usaronae angngog atta ḵinailin di ili. Sa angipangatana ḵan dida, usarona bastune ḵaga ya dusaonae ustu da ngaimane adi amigbig si ḵaḻabbongana. Ipailana ampaḵimute sangan ni maḵabooḻe Apudyus atta basuḻ. Te sa anusaana ḵad ḵan dida, isuna angasotan ni tagu'tta de grape atte aassotan ta mapospos baḻatda.

¹⁶ Sa langgoyodna ya sa uḻpuna, nigili annae ngadane ḵanana, “Ḵangatuwane Ari atta losane Ari ya Ḵangatuwane Apu atta losane Apu.”

¹⁷ Pun innilaḵ os anghel we tumataḵdog atte init. Nampoḵaw atta losane sissiwite tumayap ad ngatu woḵ ḵanana, “Umali ḵayu madagup te isaganan Apudyus daḵoḻe gayagaya para ḵan diḵayu.

¹⁸ Umali ḵayu ta inḵayu ḵanon da long-ag da ari, da suḻdadu ya da pangatda, da ḵabayu ya da nangabayu ya da losane tagu we nangidiyan ḵan Apudyus, musassu baḵon nu daḵampun, nangatu baḵon nu nababa.”

¹⁹ Naabus ḵad, innilaḵ ḵaog-ogyate ayam ya da ari'd luta ya da suḻdadudae nandatdatong ta umoyda gubaton nangabayu'tte itaḵe ḵabayu ya da suḻdaduna.

²⁰ Yaḵon nadoḵmaan ḵaog-ogyate ayam ya sa sinan profeta we nangipaila'tta nakaskasdaawe sinyal si nanserserbiyana si annae ayam. Da annae sinyal, dida da inusarnae nangallelaw atta tagu we namaḻḵaan atte maḻḵan ni ḵaog-ogyate ayam ya da nandaydayaw atte naḵwae ḵais-isuna. Da annae duwae sissiyae matattagu, niballuda si igaw ni gumilgillayabe apuy ḵan sulfur.

²¹ Naamin nanḵaḵatoy da suḻdaduda si isun di antadotadome ispadae tumoḵwaḻ atte sungad ni nangabayu si itaḵe ḵabayu. Ḵad nandatdatong da sissiwit ya isudan anggayagayae angan atta long-ag da nanḵaḵatoy inggana'ḵ nassunassugda.