Revelation 18 - Sa Ugud Apudyus

Sa Nadadailana Ad Babylon

¹ Naabus ḵad, innilaḵ osae anghel we naḻpu'd langit. Nangatu ḵaḻabbongana ya nalangḻangan luta'tte ampigsae ḵinapaddana.

² Ḵananae nangiyipḵaw, “Nadadail! Nadadail nandindinamage siyudad ad Babylon. Nambaline inggawan da dimunyu ya losane kalasin da aḻan. Ḵad losane kalasin di ayam ḵan sissiwite mibelange ḵaissaw, sidi inggawanda ḵan sumuḵbutanda.

³ Te binuuḵna da tagu'tta losane ili'tte ampigsae bayasna, piona ḵanan, inawisna didae nangunud atta ḵaissawe ugalinae angidaḻan atte madusaanda. Ḵad naḵadagdagas da ari'd luta ḵan siya ya da allaḵlaḵu'd luta, nambalindae baḵnang atte ummamdane ḵamommodnae bumaḵnang.”

⁴ Pune sadi dingngoḻḵu osae gingae naḻpu'd langite ḵanana, “Diḵayu we taguḵ, ḵumunud ḵayu, tenanyu sanate ili te uni ḵad naḵaḵwa ḵayu si basuḻna ya midoga ḵayu bos si dusana.

⁵ Te aduadu basuḻnae isun di napomponda'd langit. Ḵad aḵ Apudyus, isisimoḵna da ḵingwana.

⁶ Pun da losane ḵingwanae namaḵaḻam atta tagu, maḵwa bos ḵan siya. Ḵad masubbat aḵ amigwa da ḵingwanae, nu sintasa impainumnae bayas atta tagu, duwan tasa subbatna.

⁷ Sa ḵinaadun ni ḵinabaḵnangna ḵan ḵinasoḵaḻna, ḵaḵnat os isun ni lopong ni ampaḵaḻamana ya sa domdomna. Te ḵanana'tte somsomoḵna, ‘Saḵon de queen we ampangat. Andomdomaḵ ḵammane isun di baḻu?’

⁸ Pun gapu'tte sanat, andidisan ampaḵaḻamane madanatong ḵan siya'tte sin-aḻgaw, isun ni dayang-as, domdom ya inuḻat ḵad masgob ingganae dumapuḻ, te sa anusa ḵan siya, aḵ Apudyus we maḵabooḻ atta losan.”

⁹ Ḵad da ari'd lutae naḵadagdagas ḵan siya ya nidogae naḵagangganas si ḵinabaḵnangna, amod de ibilda ya domdomda ḵan siya nu otaponda asuḵe maḻpu ḵan siyae masgob.

¹⁰ Gapu si ogyatdae midoga ḵan siya si dusana, tumaḵdogda'tte adayu ya ḵananda, “Ḵaddaguḵa! Aman aḵay siyudad ad Babylon we nandindinamag ḵinabaḵnangna ḵan ḵabooḻana! Te sa sin-orasan, nadanatong dusana woḵ nadadail!”

¹¹ Ḵad da allaḵlaḵu'd luta umibilda ḵan andomdomda gapu ḵan siya te naippun ogon ngumina'tta laḵuda.

¹² Naippun ogon ngumina'tta buḻawanda ya da palatada, da ampapatoge batu ḵan perlas. Isun os da ampatoge silupe sumilisiling ḵan dilaag. Naippun os ogon ngumina'tta bangbanglu we ḵayu ya da ambabaḻu we ḵoondae maḻpu'tta saung da elephant, da ampapatoge ḵayu, gambang, ḵaga ya da anḵaimnase batu we sa ngannonda marble.

¹³ Naippun os ogon ngumina'tta cinnamon, da ampabangu'tta tipoyda, incenso, myrrh, frankincense, bayasdae mingina, mantika, ḵabaḻuwane arina, binayu, baḵa, karnero, ḵabayu ḵan da kalesa ḵad taḵon ay da tagu we inginada ta ammusassu.

¹⁴ Ḵanan da allaḵlaḵu ḵan siya, “Naippun angingina ḵan siḵa'tta ampapatoge bungae pipiom. Naippun ogon maḵane dungmu we maodasan ya da ampapatoge am-amman da babaḵnang ḵad adiḵapun ogon maḵaodas ḵan dida.”

¹⁵ Ḵaḵna ibagan da allaḵlaḵu we bummaḵnang si sadi ye siyudade nallaḵlaḵuwanda. Gapu ta maḵimutdae midoga si dusana, sumisiḵadda'tte adayu we umibiibil ḵan andomdom.

¹⁶ Ḵananda, “Ḵaddaguḵa! Aman aḵay siyudade nandindinamag! Sin-aḵitan ay lawa nansilupanda'tta ampatoge silupe itaḵ, purple ya sa dilaag. Ḵad nan-am-ammada bos atta buḻawan, da ampatoge batu ya da perlas.

¹⁷ Yaḵon aman aḵay da losane ḵinabaḵnangnae naamin nadadail atte abuse sin-orasan!” Losane kapitan da bapur ḵan losan atta nanḵewaaḻ ya nallugan sidi ya da udume sa baybay angaḻ-anda'ḵ iḵataguda, tumataḵdogda bos atte adayu,

¹⁸ ya oottaponda asuḵe maḻpu si nasgobe siyudad. Sa an-oottapanda ḵad, ḵanandae nangidangsoḻ, “Naippun paat miyisuwan ni sanae nandindinamage siyudad!”

¹⁹ Ḵad inggabgab-uḻda gabu'tta uḻuda ta ipailadae umibiibilda ya andomdomda ya asida ḵanan, “Ḵaddaguḵa! Aman aḵay nandindinamage daḵoḻe siyudad! Sa ḵinabaḵnangna, siya bummaḵnangan da ngaimane anna bapurda. Yaḵon nadadail si abus ay lawae sin-orasan!”

²⁰ “Diḵayu we awad ad langit, anggangganas ḵayu'tte nadadailana. Diḵayu we tagun Apudyus, da apostol ya da profetana, maganasan ḵayu bos te dinusan Apudyus sanae siyudad gapu'tta losane ḵingwana ḵan diḵayu.”

²¹ Pun inggaw anḵosdoḵosdoḻe anghel we nangoppat si daḵodaḵoḻane batu woḵ imbintugna si baybay, ḵanana, “Ḵaḵna maḵwa'tte nandindinamage siyudad ad Babylon te madadaile ustuustu ya adipun ogon mipaḻ-og.

²² Naippun os ogon mangngoḻ atta ḵanḵanta baḵon nu gingan di arpa, baladong ya da tangguyub. Naippun os ogon maodasan aḵ nalainge angwa'tta ngaiman ya naippun os ogon ambayu.

²³ Ḵad naippun os ogon da matonggane silaw ya naippun ogon ankasar. Sanat da dusan ni Babylon te da allaḵlaḵu si sadi ye siyudad, ansosoḵaḻ da somsomoḵda ya ngannonda dida ḵabaḵnangan ad luta. Ḵad da ummili sidi, inallelawda da tagu'd luta'tta tulidae isun da buyun.

²⁴ Sa sanae siyudad ad Babylon pummoy-asan da daḻan da profeta ya da udume taguna. Losane nagongat ad luta, pummoy-as daḻada si sanate siyudad.”