Revelation 17 - Sa Ugud Apudyus

Sa Bubai Ye Nangabayu Si Ḵaog-ogyate Ayam

¹ Naabus ḵad, ummadani ḵan saḵon osa'tta pitu we anghel we aangdon atta pitu we maḻuḵung woḵ ḵanana ḵan saḵon, “Umaliḵa ta ipailaḵ dusan ni nandindinamage putae tummuḵdu si igaw ni adu we tawwang.

² Niyadaḻug da ari'd luta ḵan siya. Ḵad isudan nabartek da tagu'd luta'tte bayasnae siya ḵaissawe ugalinae inunudda.”

³ Pun isunan impain-inop ni Ispiritu Santu ḵan saḵon woḵ inniyoy ni sadi ye anghel saḵon atte bumbummaaw. Sidi nangil-aḵ atte bubai ye nangabayu si dilaage ḵaog-ogyate ayame pitu uḻuna ya simpuḻu sakkudna. Sa long-agna ḵad os, naḻnot nagiliyan atta ngadane misullagi ḵan Apudyus.

⁴ Sa silup ḵad ni sadi ye bubai, dilaag ḵan purple we isunan silup di ari. Ḵad naam-ammaan os atta buḻawan, sa ampatoge batu ya sa perlas. Innoonnana tasae buḻawane napnu'tta ḵadadagan ya da ḵaissawe ḵingwana.

⁵ Sa ngadanna ḵade nigili'tte ḵidayna, adipun maigammu piona ḵanan. Ḵanana, “Babylon we nandindinamage inan da puta ya maḻpuwan da losane ḵaissawe naḵwa'd luta.”

⁶ Ḵad innilaḵ sadi ye bubai ye nabartek atta daḻan da tagun Apudyus we nagongat gapu'tte nanaḵdoḻanda ḵan Jesus. Sa nan-iilaḵ ḵan siya, gattoḵe nataagaḵ.

⁷ Yaḵon ḵanan ni anghel ḵan saḵon, “Ngaipaḵa mataag? Ibagaḵ ḵan siḵae adipun maigammu piona ḵanan sadi ye bubai ya sa ḵaog-ogyate ayame nangabayuwanae pitu uḻuna ya simpuḻu sakkudna.

⁸ Sa ayame innilam, inninggaw atte awe yaḵon naippun sinsadi. Ḵad sa umali ye aḻgaw, tumoḵwaḻe maḻpu si abute ippun patinggan ni ḵaadaḻomna. Ḵad ḵasapuḻane umoy atte dusae ippun anungusna. Ḵad da losane tagu si lubunge adipun nigili da ngadanda'tte iblu we nigiliyan da awad de biyagda'ḵ ingganae insaganan Apudyus atte daan ni lubung maḵwaan, mataagdae angila'tte sadi ye ḵaog-ogyate ayam te inninggaw atte awe, naippun sinsadi ya asi tumoḵwaḻ atte umali ye aḻgaw.”

⁹ Pinagatupan ni anghel we nangibaga woḵ ḵanana, “Ḵasapuḻane sa tagu we anna laingna abus aḵ ḵallabbonge maḵaawat si anna. Sa pion ḵad ni pitu we uḻu ḵanan, pitu we belege sa tummuḵduwan ni sanae bubai. Sa osae piona ḵanan, da pitu we ari.

¹⁰ Da lima ḵad ḵan dida, naḵaanda, ampangat osa sinsana ḵad awad de osa bose umali ye ampangat atte umali ye aḻgaw yaḵon abuse sin-aḵitan ampangatana.

¹¹ Sa ḵaog-ogyat ḵade ayam, siya inninggaw atte awe, naippun sinsadi, siya miḵawaḻu we ari ye mibelang atta pitu. Ḵad aḵ uni umoy atte madusaana'ḵ inggana.

¹² “Sa simpuḻu ḵade sakkude innilam, dida da simpuḻu we ari ye daandapun ampangat yaḵon maatod ḵan dida ḵaḻabbongandae midoga ampangat atte ampangatan ni ḵaog-ogyate ayam aḵ sin-orasan.

¹³ Gapu ta os-ossaan panggobda, ipuḻangda da ḵabooḻanda ḵan ḵaḻabbonganda si ḵaog-ogyate ayam.

¹⁴ Ḵad gubatonda Ubbu we Karnero yaḵon oḻgona dida te siya ḵangatuwane Apu atta losane Apu ḵan ḵangatuwane Ari atta losane Ari. Da buḻunna ḵad, dida da naayagan ya napili ya mataḻgodane amati ḵan siya.”

¹⁵ Pinagatupan ni anghel we nangibaga ḵan saḵon woḵ ḵanana, “Da tawwange innilame tummutuḵduwan ni puta, dida da amoamode tagu'tta losane ili ya da tagu we nansabasabali gingada ḵan naḻpuwanda.

¹⁶ Sa sanae ḵaog-ogyate ayam ya da simpuḻu we sakkudna, amod de sangada si puta. Aḻanda losan da ḵuḵuwana ḵad bodanganda bos. Ḵad ḵanonda bos bogas ni long-agna ya soggonda mabun-an.

^17-18 “Sa sanate bubai ye innilam, siya nandindinamage siyudade nangipangat atta losane ari'd luta. Naḵwa da sana ḵan siya te aḵ Apudyus nangidaḻan ḵan dida ta an-ossaan somsomoḵda ta mituttuwa panggobna. Siya gapun ni nangipuḻanganda'tte ḵaog-ogyate ayam atta ḵaḻabbongandae ampangat inggana'ḵ mituttuwa da losane imbagan Apudyus.”