Revelation 16 - Sa Ugud Apudyus

Da Pitu We Maḻuḵunge Napnu Atta Dusa

¹ Naabus ḵad, dingngoḻḵu andangsoḻe gingae naḻpu'tte templo we ḵanana'tta pitu we anghel, “Inḵayu ituyaḵ atte luta da dusae naḻpu si sangan Apudyus we awad atta pitu we maḻuḵung.”

² Pun ummoy ni ummunae anghel intuyaḵ inggaw si maḻuḵungna'tte luta woḵ tummubu da ampaḵimut ḵan danaḵḵoḻe busali'tta tagu. Sana da tagu we namaḻḵaan atte maḻḵan ni ḵaog-ogyate ayam woḵ nandaydayawda'tte sinan-ayame ḵais-isuna.

³ Ummoy os ni ḵumagwae anghel intuyaḵ inggaw si maḻuḵungna'tte baybay. Pun sa danum ḵad nambalin daḻae isunan daḻan di natoy woḵ nanḵaḵatoy da losane matattagu we awad si baybay.

⁴ Ummoy os ni ḵumaḵlu we anghel intuyaḵ inggaw si maḻuḵungna'tta tawwang ya da bubun woḵ nambalindae daḻa.

⁵ Pun ḵanan ni anghel we sa simbiyang si danum, “Siḵa abus aḵ gattoḵe nasantuwane iinggaw sinsana ya inninggaw si awe, ustuustu ya naun-unan andudusam.

⁶ Te sana da tagu we namatoy atta tagum ya da profetam we pinapoy-asda da daḻada pun anna bose ipainumnu ḵan dida daḻa. Te siya gungunada!”

⁷ Dingngoḻḵu bos gingae naḻpu si altar we ḵanana, “On Apu we Apudyus we maḵabooḻ atta losan, tuttuwa sanat te naun-unan ya ustuustu andudusam atta tagu.”

⁸ Pun intuyaḵ ni ḵumapate anghel inggaw atte maḻuḵungna'tte init woḵ niyunude amo ummatung init. Pun naatungan da tagu si ummamdan ya ḵaog-ogyate atungna.

⁹ Yaḵon taḵon ay nu naatunganda si ḵaog-ogyate atungna, amo nan-ugudanda'ḵ lawweng ngadanna. Adidapun imbabawi da basuḻda ya adidapun iyyagaye nangwa ya adidapun binigbig ḵinangatun Apudyus we anna ḵabooḻana'tta sanae ampaḵimute ampaḵaḻaman.

¹⁰ Intuyaḵ ni ḵumalimae anghel inggaw si maḻuḵungna si tronon ni ḵaog-ogyate ayam woḵ gummiḵbot sadi ye impangatanae ili. Pun ḵinoḵotban da tagu da delada gapu'tte ummamdane ampaḵaḻamanda,

¹¹ woḵ nan-uguugudda'ḵ misullagi ḵan Apudyus ad langit gapu'tta ampaḵaḻamanda ya da busalida. Ḵad sissiyae adidapun nambabawi'tta basuḻda ya adidapun iyyagaye nangwa.

¹² Pun intuyaḵ os ni ḵumanome anghel inggaw si maḻuḵungna'tte daḵodaḵoḻe tawwang Euphrates woḵ nattuḵan danum ta maḵwae ayon da ari ye maḻpu si ḵapon atte dumingitan init.

¹³ Naabus ḵad, innilaḵ da tuḻu we aḻane isudan ḵatollongan di tuḵaḵ, sa osa ḵad naḻpu si sungad ni dragon, naḻpu osa si sungad ni ḵaog-ogyate ayam ya sa osa ḵad os naḻpu si sungad ni sinan profeta.

¹⁴ Da sanae ispiritu, dimunyuda ḵan lamogda ḵoon da nakaskasdaaw. Ḵad ummoyda ta daguponda da ari'tta losane ili'tte lubung ta umoyda gubaton aḵ Apudyus we maḵabooḻ atta losan si ampatoge aḻgawna.

^15-16 Ḵade sadi, nandaḵdaḵngonda da ari ya da suḻdaduda'tte igawe nangadanan aḵ Armageddon atte Hinebrew. Ḵanan Apu Jesus, “Dongngonyu annae ibagaḵ. Sa umaliyaḵ mapoḵḵatane isun ni umaliyan ni aḵḵawan. Pian tagu we adi masuyop ya masisillupan ta adi maodasane amboboddang ya mabain atte sinagung da adu we tagu nu dumatongaḵ.”

¹⁷ Intuyaḵ os ni ḵumapitu we anghel inggaw si maḻuḵungna'tte bibbid woḵ inggaw andangsoḻe gingae naḻpu'tte trono si templo we ḵanana, “Nagangput!”

¹⁸ Pune sadi inninggaw angulḵuliyatyate ḵilat ya sa andangsoḻe ḵiduḻ ya da udume aguduud ya inggaw os ampaḵimute lunig. Ḵad sa sanae lunig ippun miyisuwana inggan ni nangwaam atta tagu'd luta te sana ḵapigsaan.

¹⁹ Nanḵaḵlu nandindinamage siyudad ḵad losane siyudad atta ili'd luta naaminda nadadail. Pun tuttuwae adimpun Apudyus naliwatane nanusa'tta ummili si daḵoḻe siyudad ad Babylon yaḵon impainumna ḵan dida innamin bayase siya mipaniyan ni ḵaog-ogyate dusae naḻpu si sangana.

²⁰ Losan atta baḻan-oge ili ye niliḵwos ni baybay naaminda nilisob woḵ nawawan da losane beleg.

²¹ Ḵad naottag da danaḵḵoḻe daḻaḻu we naḻpu'd langite umoye limampuḻu we kilo dagson ni osa woḵ nitup-ugda'tta tagu. Yaḵon amo nan-uguugudda'ḵ misullagi ḵan Apudyus gapu'tta sanae daḻaḻu ya da ḵaog-ogyate ampaḵaḻaman.