Revelation 15 - Sa Ugud Apudyus

Da Pitu We Anghel Ya Sa Anungus Ni Ampaḵaḻaman

¹ Naabus ḵad, innilaḵ sabali ye ampatog ya nakaskasdaawe sinyal ad langit. Inggaw da pitu we anghel we nitaḻgod ḵan dida pitu we ampaḵaḻaman. Sana anungus da ampaḵaḻaman te sana migangputan da dusae impaidatong Apudyus ad luta gapu'tte sangana.

² Innilaḵ os isunan baybaye samling ḵopyanae naḵamsan atte apuy. Inggaw da summisiḵad sidi ye illogda ḵaog-ogyate ayam te adidapun nandaydayaw si sinan-ayame ḵais-isuna ya adidapun os iyyunude namaḻḵaanda si belange sinyal ni ngadanna. Nampaḵ-odonda'ḵ arpae innatod Apudyus,

³ woḵ nanḵanḵantada'tte ḵantan Moses we nanserbi ḵan Apudyus si awe ya sa ḵantan os ni Ubbu we Karnero. Ḵanandae nanḵanta, “Apu we Apudyus we maḵabooḻ atta losan, nangatu ḵan nakaskasdaaw da ḵingwam. Siḵa ari'tta losane ili, naun-unan ḵan tuttuwa da losane ḵoom.

⁴ Naippun adi angisipog ḵan siḵa, Apu. Ḵad naippun adi angidayaw si ḵinangatun ni ngadannu. Te siḵa abus aḵ gattoḵe nasantuwan. Ḵad da tagu we maḻpu'tta losane ili, madagupda'tte sinagungnu ta idaydayawda siḵa te innilada da losane naun-unane ḵingwam.”

⁵ Naabus ḵad, innilaḵe nabuḵtan Ḵasantuwane Kuwartu si templo'd langite igaw ni nigili ye bilin Apudyus.

⁶ Pun tummoḵwaḻdae naḻpu si templo da pitu we anghel we nitaḻgodan da pitu we ampaḵaḻaman. Nampassilupda'tta itaḵe ampoḻḵas ya da sumelaselape silup ya niyaliwaḵos atta baḻuḵungda da buḻawane taḵyad.

⁷ Pun sa osa'tta opate matattagu we ḵingwam, iwwaḻasna'tta pitu we anghel da pitu we maḻuḵunge buḻawane napnuda'tte sangan Apudyus we matattagu'ḵ inggana.

⁸ Napnu templo si asuḵe sinyal ni ḵinangatu ḵan ḵabooḻan Apudyus ḵad naippun paat maḵaḻnoḵ sidi inggana'ḵ magangput da sanae pitu we ampaḵaḻamane nitaḻgod atta pitu we anghel.