Revelation 13 - Sa Ugud Apudyus

Sa Ḵaog-ogyate Ayame Naḻpu Si Baybay

¹ Pune sadi, innilaḵ ḵaog-ogyate ayame tummoḵwaḻe naḻpu si baybay. Pitu uḻuna ya simpuḻu sakkudna. Naamin nakoronaan da sakkudna ḵad nigili si sin-ossaossae uḻuna angngadanda ḵan Apudyus.

² Sa ḵatollongana ḵad isun di leopard yaḵon sa suḵina isuna suḵin ni de bear. Sa sungadna ḵad, isunan sungad di lion. Innatod ni dragon atte ḵaog-ogyate ayam ḵabooḻana ḵan tronona ya sa daḵoḻe ḵaḻabbonganae ampangat.

³ Sa osae uḻun ni sanae ḵaog-ogyate ayam, inggaw daḵoḻe pilat ni sugatnae siya tigangayna iḵatoy yaḵon napilatan pos pagay. Pun siya nataagan da losane tagu'd luta woḵ siya inunudda.

⁴ Pun nandaydayawda si dragon te innatodna ḵaḻabbongana'tte ḵaog-ogyate ayam woḵ nandaydayawda bos atte sadi ye ḵaog-ogyate ayame ḵananda, “Ngai nin ay miyisu si annae ḵaog-ogyate ayam? Ngai nin ay ḵallamog angngog ḵan siya?”

⁵ Iyyunud Apudyus sanae ḵaog-ogyate ayame ampangat aḵ opatpuḻu ya duwae buḻan ya an-ugud atta sinosoḵaḻ ya lawweng ḵan Apudyus.

⁶ Pun insaḻadnae nan-ugud aḵ misullagi ḵan Apudyus, misullagi si ngadanna ḵan inggawana ya da inggaw ad langit.

⁷ Niyunud ose maḵagubat atta tagun Apudyus ḵad oḻgona dida. Ḵad naittan aḵ ḵaḻabbongane ampangat atta losane ili ya da losane tribu ya da tagu we nansabasabali gingada ḵan naḻpuwanda.

⁸ Ḵad daydayawon da losane tagu si annae lubung sanae ḵaog-ogyate ayam yaḵon da tagu we nigili da ngadanda'tte iblu we nigiliyan da ngadan da awad da biyagda'ḵ inggana, adidapun daydayawon sanae ḵaog-ogyate ayam. Te sa daan ni lubung maḵwaan, nagagangpute nigili da ngadan da sanae tagu si iblun ni biyage sa ḵuwan ni Ubbu we Karnero we nagongat.

⁹ Diḵayu we naingaan, andongoḻ ḵayu si ibagan ni Ispiritu Santu.

¹⁰ Da niḵoddonge mibaḻud, aaddi ye mibaḻudda ḵad da niḵoddonge mapatoy si ispada, aaddi ye mapatoyda si ispada. Pun ḵasapuḻane da tagun Apudyus attomanda da losane ampaḵaḻamanda ya ipapatida da pammatida.

Sa Ḵaog-ogyate Ayame Naḻpu Si Luta

¹¹ Pun innilaḵ osae ḵaog-ogyate ayame tummoḵwaḻe naḻpu si luta. Duwa sakkudnae isuna sakkud ni ubbu we karnero yaḵon sa gingana, isuna gingan ni dragon.

¹² Awad ḵan siya da losane ḵaḻabbongan ni ummunae ḵaog-ogyate ayam ya siya usaronae anserbi ḵan siya. Ḵad ipatutnae daydayawon da losane tagu'd luta sanae ummunae ḵaog-ogyate ayame napilatan sugatnae tigangayna iḵatoy.

¹³ Ḵingwan ni sanae ḵumagwae ayam da nakaskasdaawe sinyal te impatoḵdagna apuy ad lutae naḻpu'd langit atte sinagung da tagu.

¹⁴ Pun inallelawna da adipun namati'd luta gapu'tta nakaskasdaawe sinyale niyunude ḵingwana si nanserserbiyana si ummunae ḵaog-ogyate ayam. Pun imbagana ḵan dida ta angwada'ḵ sinan-ayame dayawondae isun ni ummunae ayame nasugat atte ispada yaḵon sissiyae natagu.

¹⁵ Niyunud os atte sanae ḵumagwae ayame ittona angos atte sinan-ayam ta lamognae an-ugud ya angiḵoddonge mapatoy da losane adipun ḵan siya andayaw.

¹⁶ Impatut os ni sanae ḵumagwae ayame nammaḻḵa'tta losane tagu'tta madawinane imada baḵon nu da ḵidayda. Taḵon ay da nangatu we tagu ya da ḵamḵama, da babaḵnang ya da ḵaḵapus, da musassu ya da daḵampun aḵ musassu, impatutnae mamaḻḵaanda.

¹⁷ Ḵingwana ḵatti ta naippun paat tagu'ḵ maḵwae allaḵu baḵon nu ngumina nu adi namaḻḵaan si ngadan ni ummun-unae ḵaog-ogyate ayam baḵon nu sa belange sinyal ni ngadanna.

¹⁸ Ḵasapuḻan laing si anna. Nu awad tagu'ḵ nalaing, igammuwona mipaniyan ni sadi ye belang ni ḵaog-ogyate ayam te sa pion ni belang ugudon, ngadan ni tagu. Sa belangna ḵad, onomgasut ya onompuḻu ya onom.