Revelation 12 - Sa Ugud Apudyus

Sa Bubai Ya Sa Dragon

¹ Pune sadi, nampaila nakaskasdaawe sinyal ad langit. Te nampaila bubai ye nasilupan atte isuna siling ni inite summisiḵad atte soḻag. Nakoronaan atta nasawaḻan aḵ duwae bituwon.

² Sa anna ḵade bubai, umaannaḵ ya ummibil gapu'tte sigab ni buwangna.

³ Inninggaw os osae sinyal ad langite nampaila daḵodaḵoḻe dragone dilaag, pitu uḻunae losan nakoronaan ya sa sakkudnae simpuḻu.

⁴ Iwwasiwas ḵad ni dragon ipusna, niballu inḵaḵlun da bituwon ad langit atte luta. Pun tummaḵdog si sinagung ni bubai ye umaannaḵ ta ḵanona abengnae mibuḵnag.

⁵ Nibuḵnag ḵad abengnae laḻaḵi, naḻapsut woḵ naiyoy si tronon Apudyus te sa umali ye aḻgaw siya ambaline pangat atta losane ili ye usarona bastune ḵaga ya aaddi ye oḻgona da adipun anuttuwa si ḵaḻabbongana.

⁶ Sa bubai ḵad ummawid atte bumbummaawe insaganan Apudyus aḵ inggawana ta matangḵonan sidi'ḵ sillibu ya duwanggasut ya onompuḻu we aḻgaw.

⁷ Pun binnumtaḵ gubat ad langit woḵ aḵ Michael ya da buḻunnae anghel, naḵagubatda'tte dragon ya da buḻunna bose anghel.

⁸ Pun naabaḵ dragon ya da buḻunna woḵ ippun ogon igawda'd langit.

⁹ Ḵad niballu'd luta daḵoḻe dragone nidoga da anghelna. Aḵ Satan sanae nampailae uḻog si awe. Siya nangallelaw atta tagu si intero we lubung.

¹⁰ Naabus ḵad, dingngoḻḵu andangsoḻe ginga'd langite ḵanana, “Annan nituttuwa sanae anaguwan Apudyus atta tagu. Dummatong aḻgawe angipail-ana si ḵabooḻanae ampangat ya sa angipail-ana si ḵaḻabbongan ni Kristunae imbuunna. Te sa namabasuḻ atta susunud taḵu ḵan Kristu atte inaḻgaw ḵan nilabi'tte sinagung ni Apudyus taḵu, niballu'd lutae naḻpu'd langit.

¹¹ Yaḵon illog da susunud taḵu we namati gapu'tte daḻan ni Ubbu we Karnero we pummoy-as atte natoyana ya gapu si nangitaḵdoḻanda'tte ḵatuttuwaan te adidapun patpatgon da biyagda taḵon ay nu siya gapun ni natoyanda.

¹² Pun ad langit ya diḵayu losane awad sidi anggangganas ḵayu, yaḵon ḵaddagu ḵayu we awad ad luta ya sa baybay. Te nan-osog aḵ Satan si igawyu ḵad amod de sangana te inigammunae aḵit daan si timpuna.”

¹³ Inigammun ḵad ni dragone niballu'd luta, dinogdogna bubai ye nangiyanaḵ atte laḻaḵi ye abeng.

¹⁴ Yaḵon sa bubai ḵad, naittan aḵ duwae danaḵḵoḻe payaḵ di buḵaw ta lamogna tumayap atte bumbummaaw aḵ inggawana si tuḻun tawon ya gogwa ta matangḵonan ya miligsi'tte uḻoge dragon.

¹⁵ Pun imbug-is ni dragon amode danume isun di tawwang ta maanud oḵyan sadi ye bubai.

¹⁶ Yaḵon binadangan ni luta sanae bubai, pun nantaḵang woḵ sinusupna danume imbug-is ni dragon.

¹⁷ Pun amo dummallu sangan ni dragon si bubai woḵ ummoy naḵagubat atta udume abengnae da anguunnud atta bilin Apudyus ya sissiyadae amati'tta impaigammun Jesus.

¹⁸ Pun ummoy sadi ye dragon summiḵad atte taḻantag ni baybay.