Revelation 11 - Sa Ugud Apudyus

Da Duwae Anaḵdoḻ

¹ Naabus ḵad, inninggaw nangitod ḵan saḵon atte iisonge isun di suḻḵud woḵ ḵanana ḵan saḵon, “Inḵa isongon templon Apudyus ya sa altar ḵad iyapom da andayaw sidi.

² Yaḵon adim isongon paway atte lasin ni templo te naitod atta Gentil ta oḻgonda ḵan ipangatanda siyudad Apudyus si opatpuḻu ya duwae buḻan.

³ Ḵad ittoḵ ḵaḻabbongan atta duwae anaḵdoḻ ḵan saḵon ḵad angipadtuda'tta ipaigammuḵ ḵan dida si unog di sillibu ya duwanggasut ya onompuḻu we aḻgaw. Ansisillupda'ḵ saḵu.”

⁴ Da annae duwae anaḵdoḻ, dida mipaniyan da duwae ḵayu we olive ya sa duwae buḻawane sasap-aḻan da silawe awad atte sinagung Apudyus we Apun da tagu'd luta.

⁵ Ḵad ngaimane amadas amaḵaḻam ḵan dida, tumoḵwaḻ apuye maḻpu si sungaddae anogob atta ḵabusuḻda. Da amadas amaḵaḻam ḵan dida, ḵatti inondae matoy.

⁶ Maittanda'ḵ ḵabooḻane angiyonob atte langit ta adi umudan atte timpu we angipadtuwanda'tta ipaigammun Apudyus ḵan dida. Awad os ḵabooḻandae ambalinonda da danum aḵ daḻa ya sa ḵabooḻandae amaḵaḻam atta tagu'd luta'tte ngaimane ampaḵaḻaman taḵon ay angampiga sigun si pionda.

⁷ Maabus ḵade ibagada da impaigammun Apudyus ḵan dida, tumoḵwaḻ ḵaog-ogyate ayame maḻpu si abute ippun patinggan ni ḵaadaḻomna ya maḵagubat ḵan dida. Ḵad angngog ya anggongat ḵan dida,

⁸ ya anḵabadong da ladagda'tte ḵaḻsa'tte daḵodaḵoḻe siyudade nipattoḻan ni Apuda'tte kros we sadi mipani'd Sodom ya ad Egypt.

⁹ Tuḻun aḻgaw ya gogwae ilan da tagu we lumaus da ladag. Da sanae tagu, maḻpuda'tta losane ili ya da losane tribu ya da tagu we nansabasabali gingada ḵan naḻpuwanda. Ḵad adidapun iyunude milibonda.

¹⁰ Da adipun namati ye inggaw ad luta, anggayagayada ya an-asiatodda gapu si layadda'tte natoyan da annae duwae profetan Apudyus te dida gapun ni ampaḵaḻamanda.

¹¹ Yaḵon maḻaḵpus ḵad tuḻun aḻgaw ya gogwa, sa angose maḻpu ḵan Apudyus we angitod atte biyag lumnoḵ ḵan dida ya summiḵadda. Ḵad amod de ogyat da angila ḵan dida.

¹² Maabus ḵad, dongngon da duwae profetan Apudyus andangsoḻe gingae maḻpu'd langite ḵanana ḵan dida, “Umali ḵayu sina.” Pune sadi nipangatuda'tte libuu we umoy ad langit ḵad itotollong da ḵabusuḻda dida.

¹³ Sa sadi ye oras, inggaw os ummamdane lunige anadail atte ḵasimpuḻun ni sadi ye siyudad woḵ sadi nanḵaḵatoyan da pitullibu we tagu. Pun ummogyat da nabun-an woḵ andayawda'tte ḵinangatun Apudyus we awad ad langit.

¹⁴ Nagangput ḵumagwae ampaḵimute ampaḵaḻaman. Sissiyae awad de ḵumaḵlu we madam-an dumatong.

Sa Ḵumapitu We Tangguyub

¹⁵ Nagangput ḵad nanangguyub ḵumapitu we anghel, inninggaw da andangsoḻe ginga'd langite ḵananda, “Inggana sinsadi, naippun udum aḵ maḵwae angipangat atte lubung malaksid aḵ Apu taḵu we Apudyus ya sa Kristu we imbuunna ya ippun anungus ni ampangatana.”

¹⁶ Ḵad da duwampuḻu ya opate angipangpangu we tummutuḵdu'tta tronoda si sinagung Apudyus, nanalluḵuda woḵ nandaydayawda ḵan siya,

¹⁷ ḵananda, “Anggappiya ḵani ḵan siḵa Apudyus we maḵabooḻ atta losan, siḵa inninggaw si awe ya iinggaw sinsadi, te impailam nakaskasdaawe ḵabooḻam, ḵad insaḻadnu we ampangat.

¹⁸ Da sumusullagi ḵan siḵa, amod de ansasangada yaḵon sinsadi dummatong timpu we sumang-am ya dusaom dida, te sana timpu we anguwisam atta losane nanḵaḵatoy. Ḵad sinsadi bos timpu we gungunaam da sammilume da profetam ya da losane tagume angisipog ḵan siḵa, da nababa ya da nangangatu. Ḵad dadailom os da nanadail atta tagu'd luta.”

¹⁹ Pun nabuḵatan templon Apudyus ad langit woḵ naila sidi mapatgane ḵasun ni tuḻag. Inninggaw da nanguliyatyate ḵilat ya sa andangsoḻe ḵiduḻ ya da udume aguduud ya sa lunig ya sa ummamdane daḻaḻu.