Revelation 10 - Sa Ugud Apudyus

Sa Anghel Ya Sa Ban-oge Ḵopel

¹ Naabus ḵad, innilaḵ osae maḵabooḻe anghel we dummoḻadoḻae naḻpu'd langit. Naḻaḵbungan atte libuu ḵad inninggaw abungaḻ atte ngatun ni uḻuna. Sa bosaḻna ḵad, sumelaselape isunan init ya isunan natutuude gilab di apuy da suḵina.

² Oonnana ban-oge naḻuḵube ḵopele nabuḵyag woḵ inggudosna madawinane suḵina'tte baybay ya sa madawigi'tte luta.

³ Indangsoḻnae namboggae isunan ngoḻngoḻ di lion. Pun summongbat da pitu we ḵiduḻe ummaguduud.

⁴ Isaḻadḵu oḵyane angigili'tta imbagan da ḵiduḻ yaḵon dingngoḻḵu gingae naḻpu'd langite ḵanana, “Adim igili imbagan da pitu we ḵiduḻ. Ilimodnu dida.”

⁵ Pun sa anghel we tummataḵdog atte baybay ya sa luta, intayagna madawinane imana,

⁶ woḵ nansapata'tte ngadan Apudyus we matattagu'ḵ ingganae nangwa'tta langit, luta, baybay ya da losane awad ḵan dida. Ḵanana, “Naippun oḵyan ogon mitaḻyanan da maḵwa.

⁷ Te sa timpu we anangguyub ḵumapitu we anghel, mituttuwa nilimode planun Apudyus we sa imbagana'tta profetanae an-uuggudonae nanserserbi ḵan siya.”

⁸ Pun dingngoḻḵu ḵasin gingae naḻpu'd langite ḵanana, “Inḵa aḻan nabuḵyage naḻuḵube ḵopele innonnan ni sanae anghel we summisiḵad si baybay ya sa luta.”

⁹ Pun ummadaniyaḵ atte anghel woḵ ḵindawḵu ḵan siya ban-oge ḵopel. Ḵanana, “Ḵanom. Sa tamtamna ḵad ammaise isunan dilun di alig atte sungadnu yaḵon umun-uni ḵad sumigab buwangnu'tte paitna.”

¹⁰ Pun innaḻaḵ sanae ban-oge ḵopele oonnan ni anghel woḵ ḵinanḵu. Tuttuwae ammais tamtamnae isunan dilun di alig atte sungadḵu yaḵon nilumtunḵu ḵad, summigab atte buwangḵu paitna.

¹¹ Inninggaw nangibaga ḵan saḵon ḵanane, “Ḵasapuḻane ḵasinnu ipadtu da maḵwa'tta ḵinailin di ili ya da grupun da tagu we nansabasabali gingada ḵan ḵublitda ya da arida.”