Revelation 1 - Sa Ugud Apudyus

Sa Laplapun Ni Inggilin John

¹ Saḵon aḵ John we nangigili si annae iblu atta banage impaigammun Jesu Kristu we ḵasapuḻane madam-an maḵwa. Aḵ Apudyus nangipaigammu ḵan siya ta ipaigammuna bos atta tagu we anserbi ḵan siya. Pun imbuun Kristu anghelna aḵ angipaigammu ḵan saḵone sammiluna.

² Inggiliḵ da losane nipaila ḵan saḵon. Ḵad pinanoḵnoḵaḵe tuttuwa Ugud Apudyus ya da impaigammun Jesu Kristu.

³ Pian tagu we angidangsoḻe amasa'tte annae padtu we nipaigammu ḵad pian os da andongoḻ ya amati'tta losane nigili si anna te madam-an timpu we mituttuwaanda.

Sa Pakumusta Atta Pitu We Gimung

⁴ Annaya suḻatḵu'tta pitu we gimung da namati'tte probinsiya'd Asia. Awad oḵyan ḵan diḵayu ḵinabaḻu ḵan lin-awae maḻpu ḵan Apudyus we inninggaw si awe, iinggaw sinsana ya aḵ inggana. Naḻpu bos atta pitu we ispiritu we inggaw si sangun ni tronona.

⁵ Naḻpu bos ḵan Jesu Kristu we mataḻgodane amanoḵnoḵ atte mipanggob ḵan Apudyus. Siya ummunae natagu ḵasin atta natoy ya siya pangat da losane ari'd luta. Ay-ayatona ditaḵu ḵad pinuḵayana ditaḵu we isun di baḻud ni basuḻ mipagapu'tte daḻanae pummoy-as atte natoyana.

⁶ Ḵad indogana ditaḵu si ampangatana woḵ ḵingwana ditaḵu'ḵ papadi ye anserbi ḵan Apudyus we Apudyusna ya Amana. Aḵ Jesu Kristu oḵyan madaydayaw ya ampangat aḵ inggainggana. Amen.

⁷ Sosomḵonyu anna, umali'ḵ Jesus we midoga'tta libuu ḵad ilan da losane tagu. Taḵon ay da nanuy-uḵ ḵan siya, ilanda ya da losane tagu sina'd luta sin-iibilda gapu'tte ogyatda. Tuttuwa da anna. Amen.

⁸ Ḵanan Apu we Apudyus, “Saḵon nangadanan aḵ Alpha ḵan Omega. Saḵon Apudyus we maḵabooḻ atta losane inninggaw si awe, iinggaw sinsana ya aḵ inggana.”

Sa Ummunae Nipaila Ḵan John

⁹ Saḵon aḵ John we sunudyu ḵan Kristu ya buḻunyu we nangiyattome nampaḵaḻam gapu'tte niyossaanan taḵu ḵan Jesu Kristu si ampangatana. Gapu'tte nangiwaḻagawagaḵ si Ugud Apudyus ya sa namanoḵnoḵaḵ si mipanggob ḵan Jesus, naḵoddonganaḵ aḵ madusa woḵ inniyoyda saḵon ad Patmos, sa ban-oge ili ye niliḵwos ni baybay.

¹⁰ Yaḵon sa aḻgawe andaydayawan ḵan Apu, isun di impain-inop ni Ispiritu Santu ḵan saḵon woḵ dingngoḻḵu andangsoḻe ginga si odogaḵe isunan bungug di tangguyub.

¹¹ Ḵanana, “Igilim atte iblu da ilam ta idagasnu'tta pitu we gimung da namati'd Ephesus, Smyrna, Pergamum, Thyatira, Sardis, Philadelphia ya ad Laodicea.”

¹² Pun nantawiliyaḵ ḵad ta ilaḵ nu ngai gumminga, innilaḵ da pitu we buḻawane sasap-aḻan da silaw.

¹³ Ḵad sa gaggawan da sasap-aḻan da silaw, inggaw isunan ḵatollongan di tagu we naḻpu'd langit. Nansilup atte langgoyod ya niyaliwaḵos si baḻuḵungna buḻawane taḵyad.

¹⁴ Sa buuḵna ḵad, amod de itaḵnae isunan ḵapos ḵad sa atana isunan gumilgillayabe apuy.

¹⁵ Da suḵina ḵad, sumelapdae isun di napan-ige gambange nautu'tte apuy ya niyasada. Ḵad sa gingana, isuna dangsoḻ ni pagasapas ni danume maḻpu si antaḵnange utu.

¹⁶ Ḵad oonnan ni madawinane imana da pitu we bituwon, maḻpu si sungadna nansupang ngaḻabnae ispada. Sa bosaḻna ḵad, isunan init atte mamatuḵe amod de pigsana.

¹⁷ Sa nangil-aḵ ḵan siya nisubuḵaḵ atte sinagungnae isun di natoy. Yaḵon inappadana saḵon si madawinane imana woḵ ḵanana, “Adiḵa maḵimut te saḵon ummuna ḵan anguddidi,

¹⁸ ya saḵon matattagu. Natoyaḵ yaḵon ilam ḵad saḵon, matataguwaḵ aḵ inggana. Saḵon os asi ḵigad atte ḵatoy ya anna ḵan saḵon tuḻbiḵe amuḵat ad Hades we igaw da natoy.

¹⁹ Pun igilim da losane ipailaḵ ḵan siḵae maḵwa sinsadi ya da maḵwa'tte umali ye aḻgaw.

²⁰ Ḵaḵna nitataḻu we ḵapaoyan da pitu we bituwone innilam atte madawinane imaḵ ya da pitu we buḻawane sasap-aḻan da silaw. Da pitu we bituwon, dida da anghel we angayyuwan atta pitu we gimung da namati. Da pitu ḵade buḻawane sasap-aḻan da silaw, dida da pitu we gimung da namati.”