Philippians 4 - Sa Ugud Apudyus

¹ Pun diḵayu we susunudḵu ḵan Kristu, ipapatiyu we amati ḵan Apu. Ay-ayatoḵ ya amod ayuḵ ḵan diḵayu te diḵayu da amalayad ḵan saḵon ya diḵayu da isun di gungunaḵ atte ḵewaaḻḵu.

Sa Anungus Ni Bilin Paul

² Diḵayu ḵad Euodia ḵan Syntyche, an-ossaanonyu ḵappos ḵasomsomḵanyu gapu si niyossaananyu ḵan Apu!

³ Siḵa ḵad ose mataḻgodane buḻunḵu, badangam ḵappos da sanae bubai ta an-asipakawanda ya mipaḻ-og an-ossaananyu. Te pummangogdae naḵaḵewaaḻ ḵan saḵon atte nangiwaḻagawagaḵ si Ambaḻu we Damag, nidoga da Clement ya da udume naḵaḵewaaḻ ḵan saḵone awad da ngadanda si iblu we nigiliyan da ngadan da awad biyagda'ḵ inggana.

⁴ Ḵasapuḻane pasig ḵayu oḵyan allaylayad gapu si niyossaananyu ḵan Apu. Ipigwaḵ ibagae allaylayad ḵayu oḵyan.

⁵ Ipailayu ḵinaanusyu'tta losane tagu te madam-an umaliyan Apu.

⁶ Adi ḵayu ambinsaw yaḵon siya ḵoonyu alluwaḻu ḵayu ḵan Apudyus. Ḵad ḵodawonyu ḵan siya da losane ḵasapuḻanyu ya anggappiya ḵayu bos.

⁷ Te nu ḵoonyu da sana, awad ḵan diḵayu lin-awae itton Apudyus we nakaskasdaawe adipun paat maḵwae maawatan ni somsomoḵ di tagu. Ḵad iissuna guwaḻdae anaḻaḵnib si ḵimut ḵan bimbinsawyu, gapu si midog-anyu ḵan Jesu Kristu.

⁸ Sa anungus ni ibagaḵ ḵan diḵayu we susunudḵu ḵan Kristu, siya oḵyan pasigyu sosomḵon da tuttuwa, ampatog, ustu, ampoḻḵas, ambaḻu ḵan ḵadayawan. Ḵad taḵon ay da udume ambaḻu baḵon nu nanggodonge ugud, sadi oḵyan da imumuḻayu'tta somsomoḵyu.

⁹ Da losane inadaḻyu ḵan saḵon, da dingngoḻyu ya innilayu, siya oḵyan pagay pasige unudonyu ya aḵ Apudyus we angitod si lin-awa, siya amuḻun ḵan diḵayu.

Sa Nanggappiyaan Paul Atta IPhilippi

¹⁰ Amod de layadḵu si niyossaanaḵ ḵan Apu te sinsadi nawayaan ḵayu bos ḵasine bumadang. Nabayag ḵammose ippun bummadanganyu yaḵon daḵampun aḵ gapu ta naliwatanyu saḵon te igammuḵe naippun wayayu we angipaila si layadyu we bumadang.

¹¹ Daḵampun aḵ ibagaḵ sana gapu ta angkurang da ḵasapuḻaḵ. Te saḵon ḵad, pinaingsaḵe mat-op atte ngaimane ḵasasaadḵu.

¹² Pinadasḵu we naaḵitan ḵan nansawasawaḻ. Ngaimane maḵwa ḵan saḵon, mauḻataḵ baḵon nu massugaḵ taḵon ay aḵit baḵon nu nasawasawaḻ da ḵasapuḻaḵ, igammuḵ inoḵe mat-op.

¹³ Gapu'tte miyossaanaḵ ḵan Kristu we siya amapigsa ḵan saḵon, lamogḵu ḵoon da losan.

¹⁴ Yaḵon taḵon ay nu ḵatti, ambaḻu ḵingwayu we bummadang ḵan saḵon si timpu we nampaḵaḻamaḵ.

¹⁵ Diḵayu we iPhilippi, igammuyu we sa damun ni nangiwaḻagawagaḵ si Ambaḻu we Damag ḵan diḵayu si naḻpuwaḵ ad Macedonia, ippun udum atta namati ye magimugimung aḵ bummadang ḵan saḵon yaḵon abus ḵayu. Ḵad nambalin ḵayu'ḵ buḻunḵu we anserbi ḵan Kristu te nangitoitod ḵayu ḵan saḵon.

¹⁶ Taḵon ay inninggawaḵ ad Thessalonica, namigwae indagasyu da ḵasapuḻaḵ.

¹⁷ Yaḵon pioḵ ipaigammu ḵan diḵayu we siya singtoḵ madog-an oḵyan gungunayu, daḵampun atte ittonyu.

¹⁸ Sinsadi masawasawaḻ da ḵasapuḻaḵ te inawatḵu ḵan Epaphroditus da losane indagasyu. Ḵad da sanae indagasyu, isunan ambangu we midatun ḵan Apudyus we mat-opana ḵan lumayadana.

¹⁹ Pun aḵ Apudyus we anserbiyaḵ gapu'tte ḵinabaḵnangnae ippun ampatinggaana, siya angatod ḵan diḵayu'tta losane ḵasapuḻanyu mipagapu ḵan Jesu Kristu.

²⁰ Daydayawon taḵu oḵyan aḵ Apudyus we Ama taḵu'ḵ inggana. Amen.

Sa Anungus Ni Annae Suḻat

²¹ Pakumustaoḵ da losane tagun Apudyus sinate da niyossaan ḵan Jesu Kristu. Da susunud taḵu ḵan Kristu we buḻunḵu sina, pakumustaonda bos diḵayu,

²² midoga da losane tagun Apudyus sina'd Rome amod ay da anḵewaaḻ si boḻoy ni Emperor ad Rome.

²³ Awad oḵyan ḵan diḵayu ḵinabaḻu we maḻpu ḵan Apu Jesu Kristu.