Philippians 2 - Sa Ugud Apudyus

Sa Nampakumbabaan Kristu

¹ Pun sa niyossaananyu ḵan Kristu, siya masoḻgagan ni somsomoḵyu. Ayaton Kristu diḵayu ya siya alliwliwa ḵan diḵayu. Buḻbuḻunyu bos Ispiritu Santu. Ḵad anna ayat ḵan ḵadagu ḵan diḵayu.

² Pun gapu ta tuttuwa losan da sana, ilanyu ud ta unudonyu ayat Kristu ya an-os-ossaanonyu somsomoḵyu ḵan panggobyu ya ilanyu bos ta an-iisu an-aayatyu ḵan an-os-ossaan ḵayu ta maganasanaḵe ustu.

³ Sa panggobyu oḵyane angwa'tta ngaiman, daḵampun oḵyan atte maḵaas-asselanyu ya mitaḻayaganyu yaḵon siya oḵyan ḵoonyu ipakumbabayu da somsomoḵyu ta ibelangyu we nangatu da buḻunyu nu da long-agyu.

⁴ Sa sosomḵonyu oḵyan, daḵampun si bumaḻuwanyu we abus yaḵon sa bumaḻuwan oḵyan os da buḻunyu.

⁵ Ḵasapuḻane patilayunonyu unudon ansosomsomoḵ ḵan nantatagun Jesu Kristu.

⁶ Te awad ḵan siya gattoḵe ḵinaapudyus Apudyus, adinapun imbelange mipangtad long-agna ḵan Apudyus aḵ mausar para'tte bumaḻuwana

⁷ yaḵon siya bos ḵingwana tinenana ḵalintogana taḵon ay nu Apudyus woḵ nibuḵnage tagu we isu taḵu. Pun nambalinona bos long-agna'ḵ isun di musassu,

⁸ ya gapu'tte nambalinana'ḵ tagu, impakumbabana long-agna'tte tummuttuwaana ḵan Apudyus, taḵon ay nu siya gapun ni matoyana, taḵon ay os nu ḵaog-ogyat ya ḵababbain natoyanae nipattoḻ atte kros.

⁹ Pun intaḻayag Apudyus aḵ Jesus ta siya ḵangatuwan atta losan,

¹⁰ ta madayaw. Te analluḵu da losan ta andayawda ḵan Jesus, losane awad ad langit, ad luta ya da awad ad daḻom si luta.

¹¹ Ḵananda losan, aḵ Jesu Kristu Apu. Ḵad sadi midaydayawan Apudyus we Ama.

Da Bituwone Lumanglangḻang Silawda Atta Labi

¹² Pun annaya ibagaḵ ḵan diḵayu we buḻbuḻunḵu. Pasig ḵayu tummuttuwa atte inninggawaḵ ḵan diḵayu yaḵon sindumallu oḵyan si ḵamaidḵu ḵan diḵayu. Pun adiyu iwaḻange angwa si ambaḻu we siya ambanagan ni nataguwanyu. Ḵad sa angwaanyu si sadi, bumain ḵayu ya isipogyu we ustu'ḵ Apudyus.

¹³ Te aḵ Apudyus, patilayune anna ḵan diḵayu ta siya ḵoonyu da mas-omana ḵad ittona ḵabooḻan ḵan diḵayu we tumuttuwa.

¹⁴ Da losane ḵoonyu, adi ḵayu ngumonot ḵan maḵasossongbat,

¹⁵ ta naippun idellawda ḵan diḵayu we abeng Apudyus ya ambaḻu da losane ugaliyu. Te taḵon ay nu maḵaigaw ḵayu'tta lawweng ya ḵabasbassuḻane tagu si annae lubung, naippun oḵyan angkuranganyu ta miyisu ḵayu'tta bituwone lumanglangḻang silawda'tte labi.

¹⁶ Ḵad popotpotanyu Ugud Apudyus we angitod si biyag aḵ inggana. Te nu ḵoonyu da sadi, diḵayu da isḵaḻḵu si ḵasine umaliyan Kristu. Igammuḵ ose adipun natangga pangogḵu we nanḵewaaḻ.

¹⁷ Ḵad gapu ta madam-an angongatanda ḵan saḵon, allaylayadaḵ taḵon ay nu ḵasapuḻane mibuḵbuḵ daḻaḵe midoga si datune midatun gapu si pammatiyu ḵan Apudyus. Pun maḵagangganasaḵ ḵan diḵayu losan.

¹⁸ Ḵad isunae allaylayad ḵayu ya maḵalaylayad ḵayu oḵyan os ḵan saḵon.

Da Timothy Ḵan Epaphroditus

¹⁹ Nu iyunud Apu Jesus, namnamaoḵe adipun manunnuwan ya ibuunku'ḵ Timothy ḵan diḵayu ta mipauli ḵad ya ug-uggudona mipanggob ḵan diḵayu, lumayadaḵ ya lumayad ḵayu bos.

²⁰ Ibuunḵu te siya abus aḵ buḻunḵu we angisaḵit ḵan diḵayu, naippun udum aḵ igammuḵ.

²¹ Te da udume tagu, siya abus aḵ singsingtonda pipion ni somsomoḵda, daḵampun si pinion Jesu Kristu ḵoonda.

²² Yaḵon aḵ Timothy ḵad, iniiggammuyu we ambaḻu ugalina te innilayu we isunin an-ama si ḵewaaḻni ye angiwaḻagawag atte Ambaḻu we Damag.

²³ Pun namnamaoḵe siya ibuunḵu we dagus ḵan diḵayu nu igammuwoḵ anungus ni ḵasusḵu.

²⁴ Ḵad antaḻgodaḵ ḵan Apu we adipun ambayag ya umaliyaḵ os sinat.

²⁵ Simsimmoḵḵu bose ḵasapuḻane paoyonoḵ aḵ Epaphroditus we sunud taḵu ḵan Kristu we buḻunḵu si ḵewaaḻ ya buḻunḵu bose angitaḵdoḻ atte Ambaḻu we Damag atta sumullagi. Siya imbuunyu'ḵ bumadang ḵan saḵon atta ḵasapuḻaḵ,

²⁶ yaḵon paoyonoḵ sinat te amod pagay ayuna ḵan diḵayu losan ya amod os bimbinsawna si inigammunae dingngoḻyu nasaḵitana.

²⁷ Tuttuwae ansaḻom ay saḵitna te tigangay matoy yaḵon ḵinadaguwan Apudyus. Ḵad daḵampun ay aḵ siyae abus ḵinadaguwana te indogana saḵon ta adi dumallu babauyḵu nu natoy.

²⁸ Pun pioḵ pagaye paoyonon ta lumayad ḵayu ḵasin nu ilanyu ya lumin-awa bos somsomoḵḵu.

²⁹ Pun amod oḵyan layadyu we amadatong ḵan siya te nibelange sinusunnud taḵu gapu si niyossaanana ḵan Apu. Da tagu we isun Epaphroditus bagaynae mapatganda,

³⁰ te tigangay matoy gapu si ḵewaaḻe impaḵwan Kristu ḵan siya ḵad impustana biyagna si bumadangana ḵan saḵon atte ḵamaidyu.