Philippians 1 - Sa Ugud Apudyus

Sa Laplapun Ni Suḻat

¹ Diḵani ḵan da Paul ya aḵ Timothy ye anserbi ḵan Jesu Kristu. Annaya suḻatni ḵan diḵayu losan sinat ad Philippi we tagun Apudyus gapu si niyossaananyu ḵan Jesu Kristu, midoga da angipangpangu ḵan diḵayu ya da deacon.

² Awad oḵyan ḵan diḵayu ḵinabaḻu ḵan lin-awae maḻpu ḵan Apudyus we Ama taḵu ya aḵ Jesu Kristu we Apu taḵu.

Sa Luwaḻun Paul Para Atta IPhilippi

³ Nu iḵagasmoḵḵu diḵayu, anggappiyaaḵ ḵan Apudyus we anserbiyaḵ.

^4-5 Te inggan ni nangisaḻdanyu we namati inggana sinsana, binadanganaḵ si ḵewaaḻḵu we angipaigammu si Ambaḻu we Damag. Pun pasige amod de layadḵu we angiluwaḻu ḵan diḵayu losan.

⁶ Anggappiyaaḵ os te iniiggammuḵe aaddi ye aḵ Apudyus we nangisaḻad si ambaḻu we ḵoona'tta biyagyu, siya bos amagapagatup inggana'ḵ magangput atte ḵasine umaliyan Jesu Kristu.

⁷ Ḵad ambaḻu bos nu ḵatti sosomkoḵ atte mipanggob ḵan diḵayu te ummamdan ayatḵu ḵan diḵayu. Ḵad nidoga ḵayu ḵan saḵone nangipadas si ḵinabaḻun Apudyus si inninggawaḵ atte babaḻḻudan ya siya bos naḵwa si dam-oḵ namanoḵnoḵan ya tinaḵdoḻaḵe tuttuwa Ambaḻu we Damag mipanggob ḵan Kristu.

⁸ Igammun Apudyus ummamdane ayuḵ ḵan diḵayu te ay-ayatoḵ diḵayu we isun ni an-aayat Jesu Kristu ḵan diḵayu.

⁹ Annaya da iluwaḻuḵ ḵan Apudyus. Ḵodawoḵe pumigsapigsa oḵyan ayatyu ḵan siya ya da buḻunyu, ḵad madog-an oḵyan igammuyu si mipanggob ḵan Apudyus ya sa ḵabooḻanyu we angigammu nu ngai da ustu we ḵoonyu,

¹⁰ ta lamogyu imatunan ya piliyan ḵabaḻuwan. Te nu ḵatti, ambaḻubaḻu ugaliyu ya ippun oḵyan ḵingwayu'ḵ mipabasuḻ ḵan diḵayu si ḵasine umaliyan Jesu Kristu.

¹¹ Gapu ḵan Jesu Kristu, adu da naun-unane banage ḵoonyu. Te nu ḵatti, dayawon da tagu'ḵ Apudyus ya bigbigonda ḵinabaḻuna.

Sa Ambaḻu We Nambanagan Ni Nibaḻudan Paul

¹² Susunudḵu ḵan Kristu, pioḵ ipaigammu ḵan diḵayu we sa naḵwa ḵan saḵon, daḵampun aḵ lawweng nambanagana yaḵon ambaḻu te ummadu da tagu we amati si Ambaḻu we Damag.

¹³ Pun inigammun da losane suḻdadu we nangguwaḻda si palas ya da losane tagu sinae ippun udum aḵ gapun ni nibaḻudaḵ yaḵon sa anserbiyaḵ ḵan Kristu.

¹⁴ Gapu bos atte nibaḻudaḵ, pummigsa taḻgodda ḵan Apu da ḵaaduwane susunud taḵu ḵan Kristu. Pun adidapun umogyat yaḵon amo tummuḻoddae angiwaḻagawag si Ugud Apudyus.

¹⁵ Tuttuwae annat da angiwaḻagawag si mipanggob ḵan Kristu gapu si aposda ḵan maḵaas-asselanda ḵan saḵon. Yaḵon annat pos pagay da udume ambaḻu panggobda.

¹⁶ Da sana ḵad, iwwaḻagawagda Ambaḻu we Damag gapu si ayatda ḵan saḵon te naawatandae siya gapun ni nibaḻudaḵ dinutuḵanaḵ ḵan Apudyus aḵ anaḵdoḻ si ḵatuttuwaan ni Ambaḻu we Damag.

¹⁷ Yaḵon da sadi ye umapos ḵan saḵon, daḵampun aḵ naḻpu si pusuda angiwaḻagawaganda si mipanggob ḵan Kristu yaḵon siya singtonda midayawda. Ḵad sa somsomoḵda, ḵoonda ḵatti ta dumallu ampaḵaḻamaḵ si babaḻḻudan.

¹⁸ Yaḵon taḵon ay nu ḵatti ḵoonda, ippun ḵanana te lawweng man ḵan ambaḻu panggobda, siya ampatog miwaḻagawag mipanggob ḵan Kristu ḵad sanat allaylaydaḵ. Daḵampun aḵ abus sadi yaḵon pagapagatupaḵe allaylayad,

Sa Panggob Ni Biyag Sina Ad Luta

¹⁹ te igammuḵe sa ampaḵaḻamaḵ si ḵasasaadḵu sinsadi, ambanag atte masaḻaḵnibaḵ gapu si luwaḻuyu ḵan badang ni Ispiritun Jesu Kristu.

²⁰ Igammuḵe taguwonaḵ gapu'tte namnamaḵ ya sa pioḵ pagay, adiyaḵpun mabain si sinagung Apudyus gapu si adiḵpun daydayawon yaḵon amo tumuḻodaḵ pagay sinsanae isuna awe ta mipagapu'tte long-agḵu midayaw aḵ Kristu, matattaguwaḵ man baḵon nu matoyaḵ.

²¹ Te ḵan saḵon, naippun udum aḵ panggobḵu'tte mataguwaḵ yaḵon sa madayawan Kristu. Yaḵon nabaḻbaḻu nu matoyaḵ.

²² Yaḵon nu sissiyaaḵe matattagu, awad da naun-unane banage ḵooḵ. Pun nu saḵon oḵyan ampili, adiḵpun igammu nu ngai nabaḻbaḻu,

²³ te tuttuwae naippun lin-awan ni somsomoḵḵu. Te pioḵ pagaye tenan annae lubung ta iyyaḵ maḵaigaw ḵan Kristu te amo nabaḻbaḻu.

²⁴ Yaḵon gapu ta sissiyae ḵasapuḻanyu badangḵu, amo ḵasapuḻane sissiyae an-andu mataguwaḵ si lubung.

²⁵ Naippun duwaduwaḵ atte mipanggob si anna, pun igammuḵe adiyaḵpun matoye sana yaḵon inggawaḵ yan sina ta bumadangaḵ ḵan diḵayu ta pumigsa pammatiyu ḵan allaylayad ḵayu gapu'tte pammati.

²⁶ Maḵwa oḵyan ḵaḵna ta amo andaydayaw ḵayu ḵan Jesu Kristu gapu ḵan saḵon nu mipauliyaḵ sinat ya inggawaḵ ḵan diḵayu.

²⁷ Yaḵon taḵon ay nu ngai maḵwa, ilanyu ta mibagay antataguyu si Ambaḻu we Damag mipanggob ḵan Kristu ta umaliyaḵ ta iyyaḵ diḵayu ilan baḵon nu adiḵpun dongngon oḵyan mipanggob ḵan diḵayu, igammuwoḵ ose sissiyae ampigsa pammatiyu we os-ossaan panggobyu. Ḵad ḵasapuḻane an-os-ossaan os somsomoḵyu we angitaḵdoḻ si pammatiyu we mibatay si ḵatuttuwaan ni Ambaḻu we Damag,

²⁸ ya adi ḵayu maḵimut atta ngaimane sumullagi ḵan diḵayu. Te sa tuḻodyu, sanat sinyale angipail-an Apudyus ḵan didae madusada'ḵ inggana. Ḵad sadi angigammuwandae taguwon diḵayu gapu ḵan Apudyus.

²⁹ Te innatod Apudyus wayayu we daḵampun aḵ abus amatiyanyu ḵan Kristu yaḵon sa ampaḵaḻamanyu bos mipagapu'tte amatiyanyu ḵan siya.

³⁰ Ḵad sa ampaḵaḻamanyu we angitaḵdoḻ si ḵatuttuwaan ni Ambaḻu we Damag, isun ni nampaḵaḻamaḵe nangitaḵdoḻ si awe ye innilayu ḵan dingngoḻyu we maḵmaḵwa ḵan saḵon sinsana.