Philemon 1 - Sa Ugud Apudyus

Sa Laplapun Ni Suḻat

¹ Saḵon aḵ Paul we nibabaḻud gapu si nanserbiyaḵ ḵan Jesu Kristu. Aḵ Timothy ye sunud taḵu ḵan Kristu buḻunḵu sina. Annaya suḻatni ḵan siḵa Philemon we ay-ayatonni ye buḻbuḻun ya buḻunni ye anḵewaaḻ.

² Ipaoyni bos atta namati ye magimugimung si boḻoyyu, isun da Apphia we bubai ye buḻunni ya aḵ Archippus we angitaḵdoḻ atte Ambaḻu we Damag atta sumullagi.

³ Awad oḵyan ḵan diḵayu ḵinabaḻu ḵan lin-awae maḻpu ḵan Apudyus we Ama taḵu ya aḵ Apu Jesu Kristu.

Sa Ayat Ya Pammatin Philemon

⁴ Sunude Philemon, pasigaḵ anggappiya ḵan Apudyus atte iboswayḵu ḵan iḵagasmoḵḵu siḵa nu alluwaḻuwaḵ,

⁵ te dingngoḻḵu mipanggob si pammatim ḵan Apu Jesus ya sa ayatnu'tta losane tagun Apudyus.

⁶ Ilulluwaḻuḵe sa ambubuḻunan taḵu'tte pammati, ambanag oḵyan si naadaḻome an-aawat atta losane bindisyune anna ḵan ditaḵu gapu si pammati taḵu ḵan Kristu.

⁷ Sunudḵu ḵan Kristu, pinaḻayadaḵ ḵan sinoḻgagaḵ gapu si ayatnu. Siya bos nansosoḻgagnu'tta somsomoḵ da losane tagun Apudyus sinat.

Sa Ḵindaw Paul Mipanggob Ḵan Onesimus

⁸ Pune sadi gapu ta ansunudta ḵan Kristu, anna ḵaḻabbongaḵe amilin ḵan diḵayu we angwa'tta ustu we ḵoonyu. Yaḵon adiḵpun ḵoon ḵaḵnat.

⁹ Yaḵon gapu'tte ayat, andagdaguwaḵ ḵan siḵa. Ḵooḵ anna, taḵon ay nu saḵon aḵ Paul we maḻmaḻong-ag ḵan nibabaḻud os sinsana gapu ḵan Jesu Kristu.

¹⁰ Ilam ḵappos ta badangam aḵ Onesimus we nambalin aḵ abengḵu si pammati si nibabaḻḻudaḵ.

¹¹ Sa awe, naippun badangna ḵan siḵa. Yaḵon sinsana, bumadang ḵan dita.

¹² Ḵad ampauliyoḵ aḵ Onesimus ḵan siḵa taḵon ay ansigab somsomoḵḵu'tte ayonana.

¹³ Pioḵ oḵyane inggaw yan sina ta siya amasani ḵan siḵa'ḵ bumadang ḵan saḵon si annaaḵ si babaḻḻudan gapu si angiwaḻagawagaḵ si Ambaḻu we Damag.

¹⁴ Yaḵon simsimmoḵḵu we daḵampun aḵ ustu nu inggaw ḵan saḵon te daannupun yan iyunud te sa pioḵ, sa maḻpu pagay atte somsomoḵnu.

¹⁵ Sa gapun ni nisinaan Onesimus ḵan siḵa'tte sin-aḵitan ta mipauli ḵad, inggaw ḵan siḵa'ḵ inggana.

¹⁶ Yaḵon inggana sinsadi, daḵampun ogon aḵ musassu lawa, nu adi amo napatpatog nu sa musassu. Siya ampatoge sunud ḵan Apu Jesus. Amo ampatog ḵan saḵon! Ḵad amo dallu we napatpatog ḵan siḵa sinsadi ye musassum ḵan sunudnu ḵan Apu.

¹⁷ Pun nu ibelangnu saḵon aḵ buḻunnu si pammati, awatom nu mipauli ye isun ni an-aawatnu oḵyan ḵan saḵon.

¹⁸ Nu awad basuḻna baḵon nu utangna ḵan siḵa, saḵon ansingilam.

¹⁹ Ilam ḵad! Saḵone mismu nangigili si anna ya nampilma ta angigammuwame ituttuwaḵ da imbagaḵ. Saḵon aḵ Paul. Bayadaḵ utang Onesimus. Yaḵon adim maliwatane nautanganḵa ḵan saḵon gapu'tte baru we biyagnu te binadangaḵ siḵae nambalin aḵ kristianu.

²⁰ Sunudḵu ḵan Kristu, patgam oḵyan ḵodawoḵ ya paḻayadonaḵ oḵyan ya papigsaom somsomoḵḵu gapu si pammatiḵ ḵan Apu.

²¹ Insuḻatḵu da anna te namnamaoḵe tuttuwaom da ḵodawoḵ, ḵad igammuḵe ad-adu da ḵoome nabaḻu nu da annae ḵodawoḵ.

²² Awad os osae ibagaḵ nu maḵwa, angisaganaḵa'ḵ kuwartu'ḵ inggawaḵ. Te namnamaoḵe songbatan Apudyus da luwaḻuyu ta mapuḵayanaḵ ḵad angulinaḵ ḵan diḵayu.

Sa Anungus ni Annae Suḻat

²³ Aḵ Epaphras buḻunḵu we baḻud gapu si anserbiyana ḵan Jesu Kristu, pakumustaona siḵa.

²⁴ Isuna bos atta buḻunḵu we anḵewaaḻe da Mark, Aristarchus, Demas ya aḵ Luke.

²⁵ Awad oḵyan ḵan diḵayu ḵinabaḻu we maḻpu ḵan Apu Jesu Kristu.