Matthew 8 - Sa Ugud Apudyus

Sa Naleprosy Ye Laḻaḵi

¹ Nan-osog ḵad aḵ Jesus we naḻpu'tte beleg, adu da tagu we nibuḻun ḵan siya.

² Baag-en ummadani ḵan siya laḻaḵi ye naleprosy woḵ ḵananae nanalluḵu, “Apu, nu piom, lamognu ḵaanon saḵitḵu.”

³ Indawawan Jesus imana pun inappadana woḵ ḵanana, “On, Pioḵ! Maḵaan saḵitnu!” Pun daguse naḵaan saḵitna.

⁴ Ḵanan Jesus, “Inḵa ipaila long-agnu si padi ta panoḵnoḵanae naḵaan saḵitnu. Ḵad ittom ḵan siya idatunnu ḵan Apudyus we isun ni imbilin Moses ta amanoḵnoḵan da tagu we ḵawagase naḵaan pagay saḵitnu. Malaksid atte padi, adim paat ibaga ḵingwaḵ ḵan siḵa'tta ngaiman.”

Sa Pammatin Ni Kapitan

⁵ Dummatong ḵad aḵ Jesus ad Capernaum, inninggaw kapitan da suḻdadu we iRome we ummoy niyabot nandagdagu ḵan siya

⁶ woḵ ḵanana, “Apu, awad de sammiluḵ aḵ ḵuwani ye uumbog. Naparalaes ya ampaḵapaḵaḻam.”

⁷ Ḵanan Jesus, “On, umaliyaḵ ta iyyaḵ ḵaanon saḵitna.”

⁸ Yaḵon ḵanan ni kapitan, “Apu, gapu ta ampatopatogḵa naippun labbongḵu we ammangili ḵan siḵa'tte boḻoyni. Igammuḵe taḵon ay nu adiḵa umoy si boḻoyḵu ya abuse ibagam, ḵumosdoḻ sammiluḵ.

⁹ Te taḵon ay saḵon, awad de nangatngatu ḵaḻabbonganae angipangat ḵan saḵon ya awad os da suḻdadu we ipangataḵ. Ḵad nu ḵanaḵ si osa, ‘Inḵa,’ umoy ya nu ḵanaḵ os si osa, ‘Awwaynu,’ umali. Ḵad nu ḵanaḵ os atte sammiluḵ, ‘Ḵoom anna,’ ḵoona.”

¹⁰ Dingngoḻ ḵad Jesus da imbagana, nasdaaw woḵ ḵanana'tta nibuḻun ḵan siya, “Ibagaḵ ḵan diḵayu ḵatuttuwaan, naippun paat indasanda'ḵ tagu'ḵ ampigsapigsa pammatina'd Israel aḵ isun ni pammatin ni annae tagu.

¹¹ Ibagaḵ ḵan diḵayu, adu da Gentil we maḻpu si dumingitan init ya mipisonganae maḵaḵan ḵan da Abraham, Isaac ya aḵ Jacob atte ampangatan Apudyus.

¹² Yaḵon da Judyu ḵade midoga oḵyan si ampangatan Apudyus, miballuda'k lasin si giḵbot ḵad umibiibilda ya ngumalitod da babada sidi si sangada.”

¹³ Ḵanan Jesus si kapitan, “Mipauliḵa te mituttuwa pinatim.” Pun daguse ḵummosdoḻ sammiluna si sadi ye nangibag-ana.

Sa Nangaanan Jesus Atta Amode Saḵit

¹⁴ Ummoy ḵad aḵ Jesus atte boḻoy da Peter, innilanae uumbog ḵatuganganae bubai te an-atung.

¹⁵ Ummadani woḵ innonnana imana woḵ daguse naḵaan saḵitna. Pun bummangon woḵ pinaḵanana'ḵ Jesus.

¹⁶ Ḵummoḻop ḵad, nan-idatongda ḵan siya'tta naaḻanan ya da nasaḵit. Pinaḻyaw Jesus da aḻane abus imbaganae lumawada ya ḵinaanna saḵit da losane nasaḵit.

¹⁷ Ḵingwana ḵaḵna ta mituttuwa imbagan Profeta Isaiah we ḵanana, “Siya nangaan atta ampaḵaḻaman taḵu ya ḵinaanna da saḵit taḵu.”

Da Ambalin Aḵ Disipulun Jesus

¹⁸ Pune sadi, innilan Jesus we adu da tagu we naaligummu ḵan siya woḵ ḵananae namilin atta disipuluna, dumoḻmang taḵu'd domang si annae baybay.

¹⁹ Yaḵon ummadani ḵan siya osae mistulun ni lintog woḵ ḵanana, “Mistulu, naḵasaganaaḵe ambalin aḵ disipulum ya mitun-ud ḵan siḵa'tta dinumane ayam.”

²⁰ Ḵanan Jesus we summongbat, “Da mutit awad da lunguge inggawanda ya da sissiwit awad os da suḵbutda. Yaḵon saḵon ḵade Abeng Di Tagu we naḻpu'd langite niyanaḵ sina'd luta, naippun boḻoyku'ḵ iyyaḵ masuyopan.”

²¹ Ḵanan os ni osae disipulun Jesus, “Apu, Iyyaḵ yan ilibon aḵ amaḵ.”

²² Ḵanan Jesus ḵan siya, “Tun-udonaḵ. Awad da adipun amati ḵan saḵone isudan natoy, dida asi umoy angilibon atta natoyda.”

Sa Bibbid Ya Da Tupiyaḵ

²³ Summaḵyat ḵad aḵ Jesus si bangka, nibuḻun da disipuluna ḵan siya.

²⁴ Napanos ḵad, baag-en inniggana bali ye ampigsapigsa si sadi ye baybay woḵ nalaḵḻaḵbungan bangkada si tupiyaḵ ya annae milisobda. Yaḵon masusuyop aḵ Jesus.

²⁵ Pun ummoy da disipulu binangon woḵ ḵananda ḵan siya, “Anaḵay! Apu, taguwom diḵani! Annae maanud taḵu!”

²⁶ Ḵanan Jesus, “Ngaipa ḵayu maḵimut? Naippun ḵamman pammatiyu?” Pun tummaḵdog woḵ binilinna da bibbid ya da tupiyaḵ ta guminoḵda. Pun ḵawagase gumminoḵda.

²⁷ Losan da disipuluna nasdaaw woḵ ḵananda, “Atopay! Ngai nin ay annae tagu? Taḵon ay da bibbid ḵan da tupiyaḵ tumuttuwada'tta ibagana.”

Sa Naaḻanan

²⁸ Dummatong ḵad da Jesus si domang ni baybaye saḵub ni ili'd Gadara, niyabot ḵan siya da duwae laḻaḵi ye naaḻanane naḻpu si lilibbonan. Maasngaanda ya allasu we sumangada, pun siya ippun maḵatuḻod angoy si sadi ye daḻan.

²⁹ Inadanida ḵad aḵ Jesus, napapḵaawda woḵ ḵananda ḵan siya, “Siḵae Abeng Apudyus, Anii! Ngaipaḵa umali ḵan diḵani? Ummaliḵa ḵamman sina ta inḵa diḵani dusaon si daampun dumatong ustu we timpu?”

³⁰ Inninggaw da amoamode boḻoḵ si adani ḵan didae ansubsubuḵ.

³¹ Pun nandagdagu da aḻan woḵ ḵananda ḵan Jesus, “Nu paḻyawom diḵani, ibuunnu ḵappos diḵani'tta andi ye amoamode boḻoḵ.”

³² Ḵanan Jesus ḵan dida, “On, inḵayu.” Pun lummawa da sadi ye aḻan atta sadi ye laḻaḵi woḵ nillumnoḵda'tta boḻoḵ. Nangwa ḵad da boḻoḵ, sintotoddaḵdae nan-osog woḵ lummayugda'tte etpang pun naaminda naanud atte baybay.

³³ Da nanangḵon ḵad atta sadi ye boḻoḵ, ummawidda woḵ ummoyda si siyudad. Pun innaminda imbaga da naḵwa ya sa naḵwa bos atta naaḻanan.

³⁴ Pun losan da sadi ye tagu'tte siyudad, ummoyda si igaw Jesus ta maḵaugudda ḵan siya. Dummatongda ḵad, nandagdaguda ḵan siya ta tenana ilida.