Matthew 6 - Sa Ugud Apudyus

Sa Badang Atta Anḵasapuḻ

¹ Pinagatupan Jesus we nantuttudu woḵ ḵanana, “Ilanyu ta adiyu gagaḻ-on ipappaila'tta tagu we naun-unan ḵayu te nu siya ḵoonyu, ippun gungunayu ḵan Amayu'd langit.

² “Pun nu awad ibadangnu si anḵasapuḻe tagu, adim umoy ipalapalawag ḵingwame ambaḻu, isun ni ḵoon da ḵapappaila'tta sinagoga ya da ḵaḻsa. Ḵoonda da sana ta midayawanda'tta tagu. Ibagaḵ ḵan diḵayu ḵatuttuwaan, nagagangpute inawatda da gungunada.

^3-4 Nu awad ibadangnu'ḵ ittom si anḵasapuḻe tagu, iyaggaḵawnu we angitod ta adi maigammu taḵon ay ḵaadaniyane buḻbuḻunnu. Ḵad aḵ Ama taḵu we nangitotollong si ḵingwame mitataḻu gungunaana siḵa.”

Sa Mipanggob Atte Luwaḻu

⁵ Pinagatupan Jesus woḵ ḵanana, “Ḵad nu alluwaḻu ḵayu, adi ḵayu oḵyan miyisu'tta ḵapappaila te pipiondae sumisiḵade alluwaḻu'tta sinagoga ya da ḵaḻsa ta ilan da tagu dida. Ibagaḵ ḵan diḵayu ḵatuttuwaan, nagagangpute inawatda da gungunada.

⁶ Yaḵon nu alluwaḻu ḵayu, lumnoḵ ḵayu si kuwartuyu ya iyyonobyu sawang ḵad alluwaḻu ḵayu ḵan Ama we adipun maila. Ḵad ḵan siyae angitotollong si milammonge ḵoonyu, gungunaana diḵayu.

⁷ “Nu alluwaḻu ḵayu, adiyu paanduanduwon atta ugude ippun aḵit aḵ bogasnae isun ni ḵoḵoḵḵon da adipun angigammu ḵan Apudyus. Ḵanandapun nu dongngon Apudyus dida te adipun mangpus luwaḻuda.

⁸ Adi ḵayu miḵama ḵan dida te iniiggammun Apudyus ḵasapuḻanyu si daanyu ḵodawon.

⁹ Ḵaḵna inonyu we alluwaḻu. “ ‘Amani ye awad ad langit, madayawḵa oḵyane nasantuwane Apudyus.

¹⁰ Dumatong oḵyan ampangatam sina'd luta, ta mituttuwa da piniom sina'd lutae ḵama'd langit.

¹¹ Ittom ud maḵane ḵasapuḻanni si inaḻgaw.

¹² Ḵad pakawanom da basuḻni te pinakawanni bos da naḵabasuḻ ḵan diḵani.

¹³ Ḵad adim iyunude masulisug ḵani, yaḵon iligsim diḵani si lawweng.’ ”

¹⁴ Pun ḵanan Jesus, “Nu pakawanonyu da naḵabasuḻ ḵan diḵayu, pakawanon os diḵayu ḵan Amayu'd langit.

¹⁵ Yaḵon nu adiyu pakawanon da naḵabasuḻ ḵan diḵayu, adimpun os Amayu'd langit pakawanon da basuḻyu.”

Sa Mipanggob Atte Allaunan

¹⁶ Pun pinagatupan Jesus woḵ ḵanana, “Ḵad nu allaun ḵayu, adiyu ipailae andadauy ḵayu we isun da ḵapappaila. Te ipailadae andadauyda ta ipailada'tta tagu we nallaunda. Ibagaḵ ḵan diḵayu ḵatuttuwaan, nagagangpute inawatda gungunada.

¹⁷ Yaḵon nu allaun ḵayu, andaḻ-up ḵayu ya lanaanyu da buuḵyu ya nanagaysay ḵayu

¹⁸ ta ippun angigammu we allaun ḵayu, abus aḵ Amayu we adipun maila. Te siyae angitotollong si milammonge ḵoonyu, gungunaana diḵayu.”

Sa Ḵinabaḵnang Ad Langit

¹⁹ Pinagatupan Jesus woḵ ḵanana, “Adiḵa anonson aḵ binaḵnangnu si annae luta te allasu we dadailon da laḵoy ya sa lati, ḵad lonḵon os da aḵḵawan ya innaḻada dida.

²⁰ Yaḵon sa ḵoonyu oḵyan, ḵoonyu mas-oman Apudyus ya gapu'tte sana anonson ḵayu'ḵ gungunayu we maḻpu ḵan Apudyus ad langite naippun laḵoy ḵan lati'ḵ anadail ya naippun maḵaḻnoḵ aḵ umoy an-aḵaw.

²¹ Te sa igaw da binaḵnangyu, sadi bos igaw ni somsomoḵyu.”

Sa Mipanggob Atte Silaw Ni Long-ag

²² Pinagatupan Jesus woḵ ḵanana, “Sa ata silaw ni long-ag. Nu ambaḻu da atam, ampadda losane long-agnu.

²³ Yaḵon nu lawweng da atam, anggiḵbot losane long-agnu. Ḵad nu giḵbot awad ḵan siḵae padda oḵyan, ummamdan giḵbotna!”

Sa Anserbi Atta Duwae Apu

²⁴ Pinagatupan Jesus woḵ ḵanana, “Adipun maḵwa'tte sammilu anserbi'tta duwae apu te aaddi ye ay-ayatona osa ya an-awidana osa. Ḵad ipapatinae anserbi si osa ya am-amsewona osa. Ḵad nu ḵatti, adipun maḵwae tuttuwae anserbiḵa ḵan Apudyus nu siya igaw ni somsomoḵnu gamgamam adu we binaḵnang.”

Sa Mipanggob Si Bimbinsaw

²⁵ Pinagatupan Jesus woḵ ḵanana, “Pun sa ibagaḵ ḵan diḵayu, adi ḵayu ambinsaw mipanggob atta biyagyu, da ḵanonyu, baḵon nu da inumonyu, baḵon nu sa mipanggob atta long-agyu ya da ansilupyu. Te napatpatog biyagyu nu sa maḵan ya napatpatog da long-agyu nu da silup.

²⁶ Ilanyu ḵad da sissiwite antattayap: Adidapun ammuḻa baḵon nu an-ani ḵan amompon aḵ maḵan atta aḻang yaḵon paḵanan Amayu'd langit dida. Maguḻa ḵayu mane napatpatog nu da sissiwit!

²⁷ Sa osa bos, lamogyu ḵamman paanduwon biyagyu'ḵ sin-orasan gapu'tte binimbinsawyu?

²⁸ “Ngaipa ḵayu ambinsaw mipanggob atta ansilupyu? Ilanyu ḵad inon da tabbaḵe dumaḵoḻ atta pappayaw, adidapun anḵewaaḻ ya an-aboḻ.

²⁹ Yaḵon ibagaḵ ḵan diḵayu, taḵon ay aḵ Ari Solomon we ḵabaḵnangan, naippun silupna'ḵ nabaḻbaḻu nu sa osa'tta annae tabbaḵ.

³⁰ Pun nu ḵaḵnat itton Apudyus we binaḻun da lumune matagu sinsadi ya appigat miballuda si apuy, aaddi ye ittona bos da silupe ḵasapuḻanyu. Diḵayu ḵad, ngaipa aḵit pammatiyu?

³¹ Pun adi ḵayu ambinsawe ḵananyu, ‘Dinu maḻpuwan ni ḵanoḵ baḵon nu inumoḵ baḵon nu ansilupḵu?’

³² Te ḵaḵnat singsington da losane tagu we adipun angigammu ḵan Apudyus. Yaḵon ḵan diḵayu, iniiggammun Amayu'd langit da ḵasapuḻanyu.

³³ Yaḵon umunae ipatpatogyu ampangatan Apudyus ya unudonyu maun-unane antatagu we piniona woḵ ittona da ḵasapuḻanyu.

³⁴ Pun adi ḵayu bos ambinsaw atta ampaḵaḻamane dumatong appigat. Te sa umali ye aḻgaw, awad de ḵuwanae binimbinsaw. Sa binimbinsaw atte osae aḻgaw lamog ni sanate aḻgaw, pun adi taḵu amo dog-an.”