Matthew 5 - Sa Ugud Apudyus

Sa Nantuttuduwan Jesus

¹ Innilan ḵad Jesus da adu we tagu, nanagada'tte beleg. Tummuḵdu ḵad, ummadani da disipuluna ḵan siya,

² woḵ insaḻadnae nantuttudu ḵan dida.

Da Piane Tagu

³ “Pian da tagu we antaḻgod ḵan Apudyus atta ngaiman te midogada si ampangatan Apudyus.

⁴ Pian da andadauy te liwliwaon Apudyus dida.

⁵ Pian da angipakumbaba'tta long-agda te dida angilaḵsun si lutae inkarin Apudyus.

⁶ Pian da tagu we amaamayondae angwa'tta naun-unan te badangan Apudyus didae angwa si piniona.

⁷ Pian da tagu we ḵumadagu'tta asintataguda te ḵadaguwan os Apudyus dida.

⁸ Pian da tagu we ipapatidae ustu sosomḵon aḵ Apudyus te aaddi ye ilanda'ḵ Apudyus si umali ye aḻgaw.

⁹ Pian da tagu we angwa si maḵalin-awaan da udume tagu'tta sin-ossaossa te ibelang Apudyus dida'ḵ abengna.

¹⁰ Pian da ampaḵaḻam gapu'tte maun-unanda te midogada'tte ampangatan Apudyus.

¹¹ Pian ḵayu nu potogonda diḵayu ya ampaḵaḻamon diḵayu ḵan an-ugudan diḵayu'ḵ lawweng gapu'tte pammatiyu ḵan saḵon.

¹² Amo allaylayad ḵayu te daḵodaḵoḻ gungunayu'd langit. Te da sadi ye ḵoonda iissuna da ḵingwan da tagu we namaḵapaḵaḻam atta profeta si awe.”

Sa Asin Ya Sa Silaw

¹³ Pun pinagatupan Jesus we nantuttudu woḵ ḵanana, “Diḵayu isun di asine ḵasapuḻan si bumaḻuwan da losane tagu'd luta. Yaḵon nu ippun ogon tamtam ni asin, ngai inonae mipauli tamtamna ḵasin? Naippun ogon anuna ḵad miballu ya gusgusdan da tagu.

¹⁴ “Diḵayu bos isun di silawe allangḻang atte somsomoḵ da tagu si lubung. Isuyu ili ye inggaw si tuḵtuḵ ni belege daḵampun aḵ natalingdan.

¹⁵ Naippun tagu'ḵ tonggana silaw ta laḵḵobana bos atte aḵḵubaw. Ḵasapuḻane iggana si sasap-aḻan ni silaw ta masilawan da inggaw ad daḻom si boḻoy.

¹⁶ Isuna bose ḵasapuḻane silawanyu oḵyan da tagu ta ilanda ambaḻu we ḵoonyu ḵad dayawonda'ḵ Amayu'd langit.”

Sa Ḵapatog Ni Lintog Apudyus

¹⁷ Pune sadi ḵanan Jesus, “Adiyu sosomḵone ummaliyaḵ ta iyyaḵ waswason da lintog Moses ya da inggilin da profeta yaḵon ummaliyaḵ ta ituttuwaḵ da imbagada.

¹⁸ Ibagaḵ ḵan diḵayu ḵatuttuwaan, taḵon ay nu mawawan langit ḵan luta, naippun paat mataḻaḵ, taḵon ay simpattoḵe Lintog Apudyus inggana'ḵ mituttuwa da panggob Apudyus.

¹⁹ Ḵad ngaimane allisalis taḵon ay ḵapeetan atta bilin Apudyus ya tuttuduwana da udum ose ḵoonda ḵaḵna, mibelange ḵababaan si ampangatan Apudyus. Yaḵon sa tagu we tumuttuwa ḵan angituttudu'tta bilinna, mibelange ḵangatuwan atte ampangatan Apudyus.

²⁰ Pun sa ibagaḵ, ḵaḻabbonganyu we midoga si ampangatan Apudyus nu amo naun-unan ḵayu nu da mimistulun ni lintog ya da Pharisee.”

Sa Mipanggob Si Sanga

²¹ Pinagatupan Jesus woḵ ḵanana, “Dingngoḻyu imbilin Apudyus atta danaḵḵoḻ taḵu si awe ye ḵanana, ‘Adim patoyon osae tagu si ḵuwame pinion te ngaimane pumatoy maḵuwis ya maḵoddongan aḵ madusa.’

²² Yaḵon sa ibagaḵ ḵan diḵayu, ngaimane sumasanga si asintataguna maḵuwis ḵan maḵoddongan aḵ madusa. Ngai ḵad ose angibabbain atte asintatagunae ḵanana, ‘Ippun paat silbim,’ midaḻum atta ḵuḵunsisaḻ. Isun os da ḵanandae, ‘Dong-ogḵa,’ inḵa si apuy ad infiernu.

²³ Pun nu awad ittom aḵ datunnu ḵan Apudyus si altar ya inḵagasmoḵnu we awad isangan ni asintatagum aḵ ḵingwam ḵan siya,

²⁴ tenam yan datunnu si sinagung ni altar ta inḵa umuna anḵodaw aḵ pakawan si asintatagum ta awad lin-awa ḵan diḵayu ya asiḵaot anguline angitod si datunnu ḵan Apudyus.

²⁵ “Nu awad angidaḻum ḵan siḵa, daguse maḵaaligluḵa ḵan siya si daanyu miduuman si korti. Te nu adim ḵoon, ipuḻangna siḵa'tte ḵuwis ḵad indalisna bos siḵa'tta guwaḻda ya mibaḻudḵa.

²⁶ Ibagaḵ ḵan siḵa ḵatuttuwaan, adiḵapun mapuḵayan atte babaḻḻudan inggana'ḵ bayadam losan da ḵasapuḻane mabayadan.”

Sa Mipanggob Atta Maḵadagdagas

²⁷ “Dingngoḻyu bos imbagan Apudyus we ḵanana, ‘Adi ḵayu maḵadagdagas.’

²⁸ Yaḵon ibagaḵ ḵan diḵayu we ngaimane angitotollong si bubai ya pionae adaḻugon, nagagangput naḵabasuḻ si dagdagas atte somsomoḵna.

²⁹ Pun nu sa madawinane atam gapun ni maḵabasuḻam, uḵitom ya iballum! Te unnoyna paḵing atam nu sa miballu nabubuḵḵoḻe long-agnu'd infiernu.

³⁰ Nu sa dawinane imam gapun ni maḵabasuḻam, puttam ya imballum! Te unnoyna paḵing imam nu sa miballu nabubuḵḵoḻe long-agnu'd infiernu.”

Sa Mipanggob Atta Maḵaidang

³¹ Pinagatupan Jesus woḵ ḵanana, “Nigili'tte Ugud Apudyus, ‘Ngaimane laḻaḵi ye idangana asawana, ḵasapuḻane angitod ḵan siya'ḵ ḵasuḻatan aḵ ampipilmaan si an-idanganda.’

³² Yaḵon sa ibagaḵ ḵan diḵayu we laḻaḵi, adiyu idangan da asawayu, malaksid nu naḵadagdagas bubai. Te nu ḵoonyu ḵaḵna, diḵayu angwa si maḵabasuḻan ni bubai si dagdagas nu ḵasin angasawa. Ḵad ngaimane angasawa si bubai ye inidanganyu, maḵabasuḻ si dagdagas.”

Sa Mipanggob Atta Ansapata

³³ Pinagatupan Jesus woḵ ḵanana, “Dingngoḻyu bose imbilin Apudyus atta danaḵḵoḻ taḵu we ḵanana, ‘Ḵasapuḻane adim idadauli da illusnu insapata yaḵon ḵasapuḻane ituttuwam da insapatam ḵan Apudyus.’

³⁴ Yaḵon ibagaḵ ḵan diḵayu, adiyu paat isapata da ngadan da ngaiman. Awatna, adiyu isapata'd langit te siya tronon Apudyus.

³⁵ Ḵad adiyu isapata'd luta te siya anggusdayan da suḵina, baḵon nu ad Jerusalem te siya siyudad ni ḵangatuwane Ari.

³⁶ Adiyu bos isapata uḻuyu te adipun maḵwa ambalinonyu ossaane buuḵ aḵ itaḵ baḵon nu ngitit.

³⁷ Unnoyna ḵananyu we ‘On’ nu tuttuwa ḵan ‘Naid’ nu daḵampun. Da losane ituḻ-ayyu, maḻpu ḵan Satan we ḵaḻawengan.”

Sa Mipanggob Atte Baḻos

³⁸ Pinagatupan Jesus woḵ ḵanana, “Dingngoḻyu we imbilin Apudyus atta danaḵḵoḻ taḵu we ḵanana, ‘Sa amussoḵ si asintataguna, ḵasapuḻan ose bussoḵonda ya sa angengaw si asintataguna, ḵasapuḻan ose gengawanda.’

³⁹ Yaḵon sa ibagaḵ ḵan diḵayu, adiḵayu bumaḻos atta angwa'ḵ lawweng ḵan diḵayu. Nu awad ametnag si madawinane apingyu, itayayu bos madawigi.

⁴⁰ Ḵad nu awad angidaḻum ḵan siḵa ta aḻana silupnu, ittom os jaḵetnu.

⁴¹ Ḵad ngaimane angipatut ampabuḵud si odonna'ḵ sinkilomitro, pamane buḵudom aḵ duwae kilomitro.

⁴² Angitodḵa nu awad anḵodaw ḵan siḵa ya pagawatam da anggawat ḵan siḵa.”

Sa Ayat Atte Ḵabusuḻ

⁴³ Pinagatupan Jesus woḵ ḵanana, “Dingngoḻyu bose nibaga, ‘Ḵasapuḻane ayatom da asintatagum ḵad busuḻom da ḵabusuḻnu.’

⁴⁴ Yaḵon ibagaḵ ḵan diḵayu we andongoḻ. Pagatupanyu ayaton da ḵabusuḻyu ya pagatupanyu iluwaḻuwan da amaḵaḻam ḵan diḵayu,

⁴⁵ ta mipailae diḵayu tuttuwae abeng Amayu'd langit. Te ḵan siya, iyyunudna inite ḵingwana'ḵ lumangḻang atta naun-unane tagu we isuna bos atta tagu we angwa'tta lawweng ya innatodna bos udan ta maudanan lutan da tagu we angwa'tta pinion Apudyus ya da tagu we angwa'ḵ lawweng.

⁴⁶ Te nu abus aḵ ayatonyu da tagu we angayat ḵan diḵayu, gungunaan ḵad ain Apudyus diḵayu? Naid te taḵon ay da andadagup atta bugis ḵoonda bos ḵaḵna.

⁴⁷ Ḵad nu abus ay da ḵailiyanyu'ḵ pionyu ḵaug-uggud, ngai nisabaliyanyu'tta udum? Taḵon ay da Gentil we adipun angigammu ḵan Apudyus ḵoonda bos ḵaḵna.

⁴⁸ Pun ḵasapuḻane ippun angkuranganyu we isun Apudyus we Amayu'd langite ippun angkurangana.”