Matthew 3 - Sa Ugud Apudyus

Sa Tuttudun John We Ambobonyag

¹ Sa inninggawan da Jesus ad Nazareth, ummoy aḵ John we Ambobonyag atte probinsiya'd Judea atte bumbummaaw woḵ insaḻadnae nangiwaḻagawag atta ummoy sidi nandongoḻ ḵan siya.

² Ḵanana, “Ibabawiyu da basuḻyu ya agayyu we angwa te gattoḵe sinsadi awad ḵan diḵayu ampangatan Apudyus.”

³ Aḵ John, siya inggilin Profeta Isaiah we ḵanana, “Sa bumbummaaw, awad de angiwaḻagawage ḵanana, ‘Saganaonyu daḻan atte umaliyan Apu ya pagodongonyu daḻane ayona.’ ”

⁴ Sa silup John naaboḻe dutdut di camel ya laḻat taḵyadna. Ḵad dudun ḵan dilu ḵanoḵanona.

⁵ Pun ummoy da tagu we naḻpu'd Jerusalem ḵan siya ya da losane ili'tte probinsiya'd Judea ya da naḻpu'tta nampaliḵwose ili'tte tawwang Jordan.

⁶ Imbabaggada da basuḻda pun binonyagan John dida'tte tawwang Jordan.

⁷ Yaḵon innilan ḵad John da adu we Pharisee ḵan da Sadducee ye umoy ampabonyag ḵan siya, ḵanana, “Diḵayu we ganaḵ ni uḻog! Nankamali sinomsomoḵyu we nangibagae lamogyu iligsi da long-agyu'tte madusaanyu ḵan Apudyus nu pabonyag ḵayu.

⁸ Adipun paat maḵwa te ḵasapuḻane ḵoonyu da losan ta ipailayu we tuttuwae imbabawiyu da basuḻyu ya agayyu we angwa.

⁹ Adiyu ḵanan atta somsomoḵyu we miligsi ḵayu te aḵ Abraham daḵdaḵoḻyu. Annaya ibagaḵ ḵan diḵayu, aḵ Apudyus lamogna ambalinon da annae batu'ḵ ganaḵ Abraham!

¹⁰ Sa mipaniyan ni madusaanyu, isun ni wasaye nisasagganae ampoḵpoḵ atte ḵayu ya losane ḵayu we adipun amunga'ḵ ambaḻu mapoḵpoḵda ya miballuda'tte apuy.

¹¹ “Bonyagaḵ diḵayu'tte danum aḵ angipailae nambabawi ḵayu'tta basuḻyu ya agayyu we angwa. Yaḵon sa dumatonge miyun-unud ḵan saḵon, bonyagana diḵayu si Ispiritu Santu ya sa apuy. Nangatngatu nu saḵon ya gapu si ḵinangatuna, naippun labbongḵu we angaptin atte sandalna.

¹² Naḵasaganae anguwis atta tagu ḵad mipani anḵuḵuwisna'tte tagu we naḵasaganae antopa si de wheat. Sa bogas ni de wheat, dagupona ya igappotna'tte aḻangna. Yaḵon sa losane dugi, aminona aḻan ya soggona'tte apuye adipun masobsoban.”

Sa Nabonyagan Jesus

¹³ Pun sa sadi ye timpu, dummatong aḵ Jesus we naḻpu'tte probinsiya'd Galilee woḵ ummoy si tawwang Jordan ta pabonyag ḵan John.

¹⁴ Yaḵon pinadas John inawis ta adi pabonyag ḵan John woḵ ḵanana, “Saḵon oḵyan bonyagam, yaḵon sinsadi ummaliḵa ḵan saḵon ta pabonyagḵa.”

¹⁵ Yaḵon ḵanan Jesus we summongbat, “Ḵoom sinsadi te ustu nu ḵoon taḵu anna ta ituttuwa taḵu da losane pinion Apudyus.” Pun binonyagan John.

¹⁶ Naabus ḵad aḵ Jesus nabonyagan, daguse tummoḵwaḻ si danum woḵ baag-en nabuḵtan ad langit. Pun innilana Ispiritu Santu we dumoḻadoḻae isunan kalapati woḵ nansap-oy ḵan siya.

¹⁷ Baag-en ḵanan ni gingae naḻpu'd langit, “Annaya Abengḵu we ay-ayatoḵ ya mamas-omaḵ ḵan siya.”