Matthew 28 - Sa Ugud Apudyus

Sa Ummuliyan Jesus

¹ Sa madam-an taḻun atte umunae aḻgaw ni sindumingguwane mabigate nagangputan ni umillongan da Judyu, ummoy da Mary Magdalene ya sa osae Mary innila nilibonan Jesus.

² Pune sadi, baag-en inniggana ampigsapigsae lunig te nan-osog anghel Apudyus we naḻpu'd langit. Pun niligadna batu we onob ni libon woḵ tummuḵduwana.

³ Isunan ḵilat ḵatollongana ḵad sa silupna ḵad os amod de itaḵna.

⁴ Simpipilpil da guwaḻda si ḵimutda woḵ napittuwaḵdae isudan natoy.

⁵ Yaḵon ḵanan ni anghel atta bubai, “Adi ḵayu maḵimut. Igammuḵe siya singsingtonyu'ḵ Jesus we nipattoḻ atte kros.

⁶ Naippun sina te tinagun Apudyus ḵasin, siya imbagana ḵan diḵayu. Awwayyu, inḵayu ilan nibadongana.

⁷ Pun ganasonyu ta inḵayu ibaga'tta disipuluna ḵanane, ‘Ummuli'ḵ Jesus. Ḵad umuna nu diḵayu umoy atte probinsiya'd Galilee. Ḵad ilanyu sidi.’ Sosomḵonyu we imbagaḵ ḵan diḵayu da sana.”

⁸ Pun maḵamuda gaye nanenan atte libon. Naḵimtanda yaḵon amod pagay layadda woḵ nanoddaḵdae ummoy nangibaga'tta disipuluna.

⁹ Pune sadi, baag-en niyabot aḵ Jesus woḵ ḵanana, “Kumusta ḵayu!” Ummadanida ḵan Jesus woḵ nanalluḵudae oonnanda suḵinae andayaw ḵan siya.

¹⁰ Ḵanan Jesus ḵan dida, “Adi ḵayu maḵimut. Inḵayu ibaga'tta disipuluḵe da ibelangku'ḵ susunudḵu si pammati ta umoyda'tte probinsiya'd Galilee. Ḵad ilanda saḵon sidi.”

Sa Imbagan Da Guwaḻda

¹¹ Inninggaw ḵad da bubai'tte daḻan, baag-en nipauli'd Jerusalem da udume suḻdadu we nangguwaḻda si libon woḵ aminonda ibaga'tta papangat da papadi da losane naḵwa.

¹² Pun nandatdatong da papangat da papadi ya da pallakayon da Judyu ta an-uugudda nu ngai ḵoonda. Sa nan-uugudanda, ittanda da suḻdadu'ḵ daḵoḻe gatad di pilaḵ.

¹³ Pun ḵanandae namilin atta suḻdadu, “Ibagayu'tta tagu we ummoy da disipuluna woḵ inaḵawda ladagna'tte labi si masusuyop ḵayu.

¹⁴ Ḵad nu mammaag ay ta dongngon ni gobernor, diḵani asi maḵaugud ḵan siya'ḵ ḵat-opana ta adina diḵayu pabasuḻon.”

¹⁵ Pun innaḻan da suḻdadu pilaḵ woḵ ḵingwada nibaga ḵan didae ḵoonda. Inggana sinsadi, nandindinamag atta Judyu.

Sa Nampail-an Jesus Atta Disipuluna

¹⁶ Ummoy da nasawaḻan aḵ ossaane disipulun Jesus atte beleg ni probinsiya'd Galilee te siya imbagan Jesus we ayanda.

¹⁷ Innilada ḵad, nandayawda ḵan siya yaḵon da udum ḵan dida nanduwaduwada.

¹⁸ Pune sadi, ummadani'ḵ Jesus ḵan dida woḵ ḵanana, “Losane ḵaḻabbongan ad langit ya sina'd luta naatod ḵan saḵon.

¹⁹ Pun inḵayu'tta losane tagu'tta losane ili ya ambalinonyu dida'ḵ disipuluḵ. Annaya inonyu we angwa'ḵ disipulu. Bonyaganyu dida mipagapu'tte ḵaḻabbongan Apudyus we Ama ya Apudyus we Abeng ya Apudyus we Ispiritu Santu.

²⁰ Ḵad tuttuduwanyu dida ta tuttuwaonda da losane imbilinḵu ḵan diḵayu. Sosomḵonyu we patilayune annaaḵ ḵan diḵayu inggana'ḵ anungus ni timpu.”