Matthew 25 - Sa Ugud Apudyus

Sa Pani Atta Simpuḻu We Babaḻasang

¹ Pinagatupan Jesus woḵ ḵanana, “Mipani ampangatan Apudyus atta simpuḻu we babaḻasange innaḻada da silawda woḵ ummoyda inabot laḻaḵi ye ankasar.

² Da lima anḵadong-ogda ya da lima nalaingda.

³ Sa ḵingwan da anḵadong-og, nangaḻada'ḵ silaw yaḵon adidapun nangawit aḵ igasda.

⁴ Yaḵon da nalainge lima, nangawitda'ḵ igas da silawda.

⁵ Pun nanunnuwan nan-uwayanda si dummaḵngan ni laḻaḵi ye ankasar, pun insaḻaddae nanduḵduḵmog woḵ losanda nasuyop.

⁶ “Gawallabi ḵad, dingngoḻda poḵawe ḵanana, ‘Annae dummatong laḻaḵi ye ankasar! Awwayyu ta inḵayu aboton!’

⁷ Pun losan nabanangon da sadi ye babaḻasang woḵ insaganada da silawda.

⁸ Ḵanan da limae anḵadong-og atta limae nalaing, ‘Ittanyu ud diḵani'tta igasyu te annae maḵsop da silawni.’

⁹ “Yaḵon ḵanan da nalainge limae babaḻasang, ‘Naid! Adinipun paat ḵoon ḵaḵnat! Te adinipun lamog. Inḵayu'tte tendaan ngumina'ḵ ḵuwayu.’

¹⁰ “Ḵesanda ḵade ummoy ngumina'tte tendaan, nadanatong laḻaḵi ye ankasar. Pun da limae naḵasagana, nibuḻunda ḵan siya'tte kasar woḵ niyonob sawang.

¹¹ “Napanos ḵad, dummatong os da limae anḵadong-oge babaḻasang, ḵanandae nampoḵapoḵaw, ‘Apu, Apu, buḵtam ud sawang ta lumnoḵ ḵani.’

¹² “Yaḵon summongbat ḵad laḻaḵi ye ankasar, ḵanana, ‘Ibagaḵ ḵan diḵayu ḵatuttuwaan, ippun igammuḵ ḵan diḵayu.’ ”

¹³ Pun ḵanan Jesus we nangiyanungus, “Ḵasapuḻane pasig ḵayu masasaggana te ippun igammuyu'tte aḻgaw ḵan orase umaliyaḵ.”

Da Naittan Aḵ Pilaḵ

¹⁴ Pinagatupan os Jesus woḵ ḵanana, “Sa ampangatan Apudyus mipani si baḵnange ansagsaganae umoy ambaat si adayu we ili. Inayagana da sammiluna woḵ intaḻgodna da ḵuḵuwana ḵan dida.

¹⁵ Pun sinin-ossana dida innattan, sigun si ḵabooḻanda. Sa intaḻgodna si ummuna, limallibu we palata. Sa ḵumagwa, intaḻgodna duwallibu we palata ḵad sa naudi, intaḻgodna sillibu we palata. Pun ummoyon.

¹⁶ “Ḵingwan ḵad ni naittan aḵ limallibu we palata, innigusunae dagus woḵ naḵagalansiya bos aḵ limallibu we palata.

¹⁷ Siya bos ḵingwan ni ḵumagwae nitaḻgodan ni duwallibu we palata, pun naḵagalansiya bos aḵ duwallibu we palata.

¹⁸ Yaḵon ḵingwan ḵad ni naudi ye nitaḻgodan ni sillibu we palata, ummoyna inḵaḻuub atte luta palatan ni Apuna.

¹⁹ “Nabayabayag ḵad, dummatong Apuda woḵ impaayagna da sammiluna ta imusona nu simpipiga da galansiyada.

²⁰ Pune sadi, ummoy nitaḻgodan ni limallibu we palata si Apuna woḵ innawitna limallibu we palatae naitod ḵan siya ya sa limallibu we palatae galansiyana. Ḵanana si Apuna, ‘Apu, limallibu we palata intaḻgodnu ḵan saḵon. Pun annaya bos limallibu we palatae galansiyaḵ.’

²¹ “Pun ḵanan ni Apuna, ‘Ḵingwam ambaḻu we ḵewaaḻ! Ambaḻuḵa ḵan mataḻgodanḵae sammilu. Gapu ta mataḻgodanḵa si aḵite intaḻgodḵu ḵan siḵa, iggaḵ siḵa'ḵ angayyuwan atta adu we banag. Awwaynu ta maḵagangganasḵa ḵan saḵon.’

²² “Pun ummoy os nitaḻgodan ni duwallibu we palata woḵ ḵanana, ‘Apu, duwallibu we palata intaḻgodnu ḵan saḵon, annaya bos duwallibu we palatae galansiyaḵ.’

²³ “Ḵanan os ni Apuna, ‘Ḵingwam ambaḻu we ḵewaaḻ! Ambaḻuḵa ḵan mataḻgodanḵae sammilu. Gapu ta mataḻgodanḵa si aḵite intaḻgodḵu ḵan siḵa, iggaḵ siḵa'ḵ angayyuwan atta adu we banag. Awwaynu ta maḵagangganasḵa ḵan saḵon.’

²⁴ “Nagangput ḵad, ummoy nitaḻgodan ni sillibu we palata woḵ ḵanana, ‘Apu, igammuḵe sangngaanḵae tagu te aniyom daḵampun aḵ inayongnu ya aniyom daḵampun aḵ iyyosoḵnu.

²⁵ Pun ummoyḵu inḵaḻuub palatam te maḵimutaḵ ḵan siḵa. Annaya gaye ipauliḵ.’

²⁶ “Ḵanan ni Apuna, ‘Lawwelawwengḵa ya badubaduuḻḵae sammilu! Nu inigammume aniyoḵ daḵampun aḵ inayongḵu ya aniyoḵ daḵampun aḵ iyyosoḵḵu,

²⁷ ngaipam adi ummoy imbangku ta nangulinaḵ ḵad awad aḵit aḵ galansiyaḵ.’

²⁸ Pun ḵanana'tta udume sammiluna, ‘Aḻanyu palatae annat ḵan siya ta inḵayu itton si nangitaḻgodaḵ si simpuḻullibu we palata.

²⁹ Te sa anuttuwa si dingngoḻna, amo madog-an an-aawatna inggana'ḵ aduadu da maawatana. Yaḵon sa tagu ḵade adinapun ḵoon dingngoḻna, taḵon ay awad ḵan siya, maḵaan.

³⁰ Ḵad sa mipanggob si annae ippun itaḵipnae sammilu, aḻanyu ya inḵayu iballu'tte lasin ni anggiḵbogiḵbote igaw da tagu we ampaḵapaḵaḻame umibiibil ya ngumalitod da babada.’ ”

Sa Anungus Ni Maḵuwisan Da Tagu

³¹ Pun pinagatupan Jesus woḵ ḵanana, “Nu umaliyaḵe Abeng Di Tagu, maila nakaskasdaawe ḵinaapudyusḵu ya buḻunḵu da adu we anghel ḵad tumuḵduwaḵ atte tronoḵe an-ari.

³² Ḵad losane tagu si annae luta, andatdatongda si sinagungḵu ya ansinaoḵ didae isun ni angwan ni angayyuwan atta ayame ansinaona da karnero ya da kalding.

³³ Da naun-unane tagu we mipani'tta karnero, iggaḵ dida si madawinanḵu ya da mipani'tta kalding, iggaḵ os dida'tte madawigiḵ.

³⁴ “Pun saḵone Ari, asiḵ ḵanane angibaga'tta tagu we awad si madawinanḵu, ‘Awwayyu, diḵayu we binindisyunan Amaḵ ta gangganasonyu da laḵsunyu we midog-anyu si ampangatan Apudyus we nisaganae inggawanyu inggan ni naḵwaan ni lubung.

³⁵ Te nauḻataḵ woḵ pinaḵananaḵ. Nauwawaḵ woḵ pinainumanaḵ. Mangiliyaḵ os atte iliyu woḵ minangiliyu saḵon.

³⁶ Naippun os silupḵu woḵ sinilupanyu saḵon. Nasaḵitaḵ os woḵ inayyuwananyu saḵon. Nabaḻudaḵ ḵad os, ummoyyu saḵon binisita ta bumadang ḵayu.’

³⁷ “Pun summongbat da naun-unane tagu woḵ ḵananda, ‘Apu, ḵamaan ni nangil-anni ḵan siḵae nauḻat woḵ pinaḵananni siḵa ya nauwawḵa woḵ pinainumanni siḵa?

³⁸ Ḵamaan os ni nammangiliyanni ḵan siḵa woḵ sinilupanni siḵa?

³⁹ Ḵad ḵamaan os ni nasaḵitam woḵ inayyuwananni siḵa ya sa nabaḻudam woḵ ummoyni siḵa binisita ta badanganni siḵa?’

⁴⁰ “Pun saḵone Ari summongbataḵ ḵan dida woḵ ḵanaḵ, ‘Ibagaḵ ḵan diḵayu ḵatuttuwaan, nu ḵingwayu da ḵaḵna si osae ḵababaan atta susunudḵu si pammati, ḵingwayu bos ḵan saḵon.’

⁴¹ “Ḵad ibagaḵ atta tagu si madawigiḵ ḵanane, ‘Diḵayu we naḵoddongan aḵ madusa, inḵayun! Inḵayu si annanayune apuye nisasaggana ḵan Satan ya da bubuḵ-unona.

⁴² Te nauḻataḵ yaḵon adiyupun saḵon pinaḵanan ya nauwawaḵ yaḵon adiyupun saḵon pinainuman.

⁴³ Mangiliyaḵ yaḵon adiyupun saḵon minangili. Naippun os silupḵu yaḵon adiyupun saḵon sinilupan. Nasaḵitaḵ ya nibaḻudaḵ yaḵon adiyupun saḵon ummoy binisita.’

⁴⁴ “Pun ḵanandae nan-imus ḵan saḵon, ‘Apu, ḵamaan ni nangil-anni ḵan siḵae nauḻat ya nauwaw, mangiliḵa ḵan naippun silupnu, nasaḵit ya nibaḻudḵa woḵ adinipun siḵa binadangan?’

⁴⁵ “Summongbat woḵ ḵanana ḵan dida, ‘Ibagaḵ ḵan diḵayu ḵatuttuwaan, nu adiyu binadangan taḵon ay osae ḵababaan atta annae susunudḵu, adiyupun os saḵon binadangan.’ ”

⁴⁶ Pune sadi ḵanan Jesus we nangiyanungus, “Da annae tagu, madusada'ḵ inggana yaḵon da naun-unane tagu, mataguda ḵan Apudyus aḵ inggana.”