Matthew 24 - Sa Ugud Apudyus

Sa Mipanggob Si Madadailan Ni Templo

¹ Lummawa ḵad aḵ Jesus si paway ni templo, ḵummatam da disipuluna ḵan siya woḵ intududa ḵan siya ḵinabaḻun ni templo ya da udume boboḻoy atte nampaliḵwos.

² Ḵanan Jesus, “Ilanyu sinsadi da losane ḵinabaḻun da sana. Yaḵon ibagaḵ ḵan diḵayu ḵatuttuwaan, sa umali ye aḻgaw, maamin miḵisob da sanat ya miwalis ya naippun mabun-an taḵon ay ossaane batu si igawna.”

Sa Ampaḵaḻaman Atte Umali Ye Aḻgaw

³ Pun tutuḵdu ḵad aḵ Jesus atte Beleg Olives, ummoy da disipulu iyyagapaap ḵan siya woḵ ḵananda, “Apu, ḵamaan ni maḵwaan ni imbagam ḵan diḵani? Ḵad ngai da sinyale angigammuwanni ye madam-an mipauliyam ya sa angigammuwanni si anungus ni timpu?”

⁴ Ḵanan Jesus we summongbat, “Ummanyu ta adi ḵayu maallelaw.

⁵ Te sa umali ye aḻgaw, adu da tagu we umali ya usaronda ngadanḵu we ang-angwadae dida Kristu, gapu si ḵanandae ‘Saḵon Kristu,’ ḵad adu da tagu we allelawonda.

⁶ Ḵad nu dongngonyu we awad gubat atta adani ḵan adayu we ili, adi ḵayu umogyat te ḵasapuḻane maḵwa da sana. Yaḵon daampun yan anungus ni lubung.

⁷ Te anggugubat yan da adu we ili ya da adu we gubilnu. Ḵad awad os da lunig ḵan inggi'tta adu we ili.

⁸ Yaḵon losan atta sana, isun ni misaḻdan ni bubai ye anggumute ampaḵaḻam.

⁹ “Sa umali ye aḻgaw, doḵmaanda diḵayu ya ampaḵaḻamon ḵan gongatonda diḵayu. Ḵad sasangngaan os diḵayu'tta losane tagu gapu si pammatiyu ḵan saḵon.

¹⁰ Sa sadi ye timpu, adu da an-awidanda da pammatida ḵan saḵon. Ḵad an-asituyuḵda ya sasangngaanda da buḻunda.

¹¹ Adu da sinan profeta we ampaila ḵad adu da allelawonda.

¹² Ḵad gapu'tte umaduadu da adipun tumuttuwa'tta pinion Apudyus atte annae lubung, ḵummuya an-aayat da adu we tagu.

¹³ Yaḵon ngaimane angiyattom atta losane ampaḵaḻaman ya gogomgomana pammatina, matagu'ḵ inggana.

¹⁴ Ḵad sa Ambaḻu we Damag mipanggob si ampangatan Apudyus, ḵasapuḻane miwaḻagawag atta losane ili si lubung ta dongngon da tagu ḵatuttuwaan. Ḵad asiyot dumatong anungus ni lubung.”

Sa Madadailana'd Jerusalem

¹⁵ Pun pinagatupan Jesus woḵ ḵanana, “Ilanyu ḵaog-ogyate dumadaile sisiḵad atte nasantuwane lugar si templo we angaissawe impadtun Profeta Daniel atte awe. Maawatan oḵyan da ambasa.

¹⁶ Pun da inggaw atte probinsiya'd Judea, umawidda oḵyan atta bebbeleg.

¹⁷ Sa tagu we awad si otop ni boḻoyna, umawid oḵyane dagus ta mataguwana ya adi mataḵtaḵe lumogsade umoy angaḻa'tta ḵuḵuwana.

¹⁸ Sa awad atte pappayaw, ḵasapuḻane adi oḵyan mataḵtaḵe mipauli si boboḻoye umoy angaḻa'tta silupna.

¹⁹ Sa sadi ye aḻgaw, ḵaddagu da mabugi ya da antagibi.

²⁰ Pun iluwaḻuyu ḵan Apudyus we adi oḵyan maḵwa si ageled baḵon nu sa umillongan.

²¹ Te sa sadi ye timpu umamdan ampaḵaḻaman, naippun paat miyisuwana inggan ni naḵwaan ni lubung inggana sinsana, ḵad naippun os miyisuwana'tte umali ye aḻgaw.

²² Ḵad nu adin Apudyus simsimmoḵe paabobbaon sanate timpu, naippun tagu'ḵ matagu. Yaḵon gapu'tte ḵadaguna'tta pinilinae taguna, pinaabobbana sadi ye timpu.

²³ “Pun sa sadi ye timpu, nu awad ḵanana ḵan diḵayu, ‘Ilanyu ḵad, annaya'ḵ Kristu,’ baḵon nu ‘andiya,’ adiyu patiyon.

²⁴ Te ampaila da umallelawe tagu ya ibagadae dida Kristu ya awad os da angibagae dida profeta. Ḵad angipailada'tta amo nakaskasdaaw ta amanoḵnoḵe awad ḵabooḻanda ta allelawonda da tagu, taḵon ay da pinilin Apudyus nu maḵwa.

²⁵ Pun ḵasapuḻane sosomḵonyu te inggallapuḵ binagbagaan diḵayu si daanna maḵwaan.

²⁶ “Pun nu ḵananda ḵan diḵayu we, ‘Ilanyu! Andiya'ḵ Kristu si bumbummaaw,’ adiḵayu umoy. Ḵad nu ḵanandae, ‘Annayae nantataḻu si kuwartu,’ adiyu bos patiyon.

²⁷ Te saḵone Abeng Di Tagu, sa umaliyaḵ mailan da losane tagu we isunan ḵilate mamamdiyat si dumingitan init inggana si mipisongana.

²⁸ Sa mipauliyan ni Abeng Di Tagu mipaigammu'tta losane isun ni annae uuggudone ḵanana, ‘Dinumane igaw da natoy, siya bos andaḵdaḵngan da gayange angan atta ladag.’ ”

Sa Umaliyan Ni Abeng Di Tagu

²⁹ Pinagatupan Jesus woḵ ḵanana, “Nu magangput da ampaḵaḻaman si sadi ye timpu, gumiḵbot init ya adipun allangḻang soḻag. Maamin maottag da bituwon ya miyugayug da losane awad ad langit.

³⁰ Ḵade sadi, awad de maila'd langite sinyal ni madam-an umaliyaḵe Abeng Di Tagu ya da losane grupun da tagu sina'd luta umibilda gapu'tte ogyatda. Ḵad ilanda saḵone Abeng Di Tagu we umali ye midoga'tta libuu ya ilanda bos ummamdane ḵabooḻaḵ ya sa ummamdane ḵinapaddan ni ḵinaapudyusḵu.

³¹ Ḵad guminga andangsoḻe tangguyub ya ibuunḵu da anghelḵu'tta losane dugyun ni lubung ta umoyda dagupon da losane pinilin Apudyus we taguna.”

Sa Maadaḻ Atte Ḵayu We Fig

³² Pun ḵanan os Jesus, “Annaya somsomḵonyu mipanggob atte ḵayu we fig ta an-adaḻanyu. Nu ilanyu we alloḻota da pangada ya summimitda, igammuyu we madam-an dagun.

³³ Ḵad nu ilanyu bose maḵwa da losane imbagaḵ, igammuyu we madam-an mipauliyaḵ.

³⁴ Ibagaḵ ḵan diḵayu ḵatuttuwaan, sissiyae matattagu da udume tagu si annae lunap atte mituttuwaan da losane imbagaḵ ḵan diḵayu.

³⁵ Amungtu losan da awad ad langit ya sina'd luta yaḵon adipun amungtu ugudḵu.”

Sa Dumaḵngan Ni Abeng Di Tagu

³⁶ Pinagatupan Jesus woḵ ḵanana, “Naippun angigammu'tte aḻgaw baḵon nu timpu we mituttuwaanda. Taḵon ay da anghel ad langit, ippun igammuda. Ḵad taḵon ay saḵone Abeng Apudyus, ippun os igammuḵ. Te ippun udum aḵ angigammu, abus aḵ Apudyus we Ama.

³⁷ Sa ugalin da tagu si timpu we mipauliyaḵe Abeng Di Tagu, isun ni ugalin da tagu si timpun Noah si awe.

³⁸ Te sa sadi ye timpu'tte daan ni lubung malitapan, abus aḵ ḵooḵoonda anggangganas, angaangan ḵan uminuinum ya an-as-asawa inggana'tte nillumnoḵan da Noah si bapur.

³⁹ Naippun nangigammuwanda'tte ḵaog-ogyate maḵwa ḵan dida, inggana'ḵ dinnumtong litap woḵ naaminda naumbuḻ. Ḵatti bos iissun ni maḵwa nu mipauliyaḵe Abeng Di Tagu.

⁴⁰ Sa sadi ye timpu, nu anḵewaaḻ da duwae tagu si pappayaw, maaḻa osa ya natenan osa.

⁴¹ Isun os da duwae bubai ye anggiligiling atte binayu, maaḻa osa ya natenan osa.

⁴² Pun ḵasapuḻane masasaggana ḵayu te ippun igammuyu'tte dumaḵngaḵe Apuyu.

⁴³ “Annaya sosomḵonyu, nu igammun ni simboḻoy oras si labi ye dumaḵngan ni aḵḵawan, adipun masuyop yaḵon pasigna guwaḻdaan ta adin ni aḵḵawan lonḵon.

⁴⁴ Pun ḵasapuḻane maḵasagana ḵayu oḵyan te dumatong Abeng Di Tagu si timpu we adiyupun namnamaon.”

Sa Mataḻgodan Ḵan Adipun Mataḻgodane Sammilu

⁴⁵ Pun inugud os Jesus annae pani woḵ ḵanana, “Sa mataḻgodan ḵan nalainge sammilu, siya dinutuḵan ni apuna'ḵ angayyuwan atta buḻunnae sammilu. Siya angitod si ḵanon da buḻunna si ustu we timpu.

⁴⁶ Pian sadi ye sammilu nu odasan ni apunae annae ḵoona da losane imbilinna.

⁴⁷ Ibagaḵ ḵan diḵayu ḵatuttuwaan, sa sanae ambaḻu we sammilu, ipangatun ni apuna saadna ya siya angayyuwan atta losane ḵuḵuwana.

⁴⁸ Yaḵon nu ḵanan ni sadi ye sammilu si long-agnae, ‘Adipun masapae dumatong apuḵ.’

⁴⁹ Insaḻadnae allamboḵ atta doganae sammilu, ḵan maḵaḵan ya maḵain-inum atta bartekero.

⁵⁰ Madanatong ḵad apun ni sadi ye sammilu si aḻgawe adinapun namnamaon ya orase adinapun igammu,

⁵¹ dusaonae ustu ya idogana si igaw da ḵapappailae igaw da umibiibil ya ngumalitod babada.”