Matthew 23 - Sa Ugud Apudyus

Da Mimistulun Ni Lintog Ya Da Pharisee

¹ Pun ḵanan Jesus atta disipuluna ya da adu we tagu,

² “Da mimistulun ni lintog ya da Pharisee, anna ḵaḻabbongandae angipaḵaawat atte lintoge innatod Apudyus ḵan Moses.

³ Pun ḵasapuḻane tuttuwaonyu ḵan unudonyu da losane ituttududa, yaḵon adiyu ḵoon da ḵoḵoḵḵonda te adidapun ḵoone mismu ḵan unudon da ituttududa.

⁴ Ipabuḵudda'tta tagu andagsone mabuḵud yaḵon adidapun pione bumadang ḵan dida taḵon ay aḵit.

⁵ Losane ḵoonda, ḵoonda ta angitollongan da tagu ḵan dida. Te da udum, padaḵoḻonda iiggaan da ḵopele nagiliyan si Ugud Apudyus we imbaḻangatda'tta ḵidayda baḵon nu intaḵodda'tta taḵḵayda. Ḵad piondae alliḵliḵwose ansisillup atta langgoyod.

^6-7 Ampilida'tta ḵabaḻuwane tutuḵduwan atta sinagoga ya pionda bose mapatganda'tta ampakumusta ḵan dida'tta andaḵdaḵngan da adu we tagu. Ḵad pipionda midayawda nu awad gayagaya. Ḵad piondae maawaganda'ḵ ‘Mistulu.’

⁸ “Yaḵon ḵan diḵayu, adiyu iyunude awagan diḵayu'ḵ ‘Mistulu’ te ansusunud ḵayu si pammati ya os-ossaan mistuluyu.

⁹ Ḵad ḵasapuḻane adiyu awagan aḵ ‘Ama,’ osae tagu'tte annae luta te abuse ossaan Amayu we awad ad langit.

¹⁰ Adiyu bos iyunude maawagan ḵayu'ḵ ‘Apu’ te aḵ Kristu os-ossaane Apuyu.

¹¹ Ḵad sa ḵangatuwan ḵan diḵayu, ḵasapuḻane siya anserbi'tta buḻunna.

¹² Ngaimane angipangatu si long-agna, mipababa. Ḵad ngaimane angipakumbaba si long-agna, mipangatu.”

Sa Nanuppaḵan Jesus Atta Pharisee Ya Da Mimistulun Ni Lintog

¹³ Pun ḵanan Jesus, “Ḵaddagu ḵayu, diḵayu we Pharisee ḵan mimistulun ni lintog. Ḵapappaila ḵayu! Te taḵon ay nu tuttuduwanyu oḵyan da tagu si inondae midoga si ampangatan Apudyus, adiyupun ḵoon anna ḵad isunan iyyonobyu sawange maḵwae lumnoḵanda. Taḵon ay diḵayu we mismu, adiyupun iyunude paipangat ḵan Apudyus ḵad adiyupun iyunud da udume maḻyad os paipangat ḵan siya.

¹⁴ “Ḵaddagu ḵayu we Pharisee ya da mimistulun ni lintog. Ḵapappaila ḵayu! Te allelawonyu da baḻu ta aḻanyu da ḵuḵuwada ya da boḻoyda ḵad anduanduwonyu da luwaḻuyu si sinagung da adu we tagu ta analingodyu'tta ḵoḵoḵḵonyu. Ḵad sana amo amadagson atte madusaanyu.

¹⁵ “Ḵaddagu ḵayu, diḵayu we mimistulun ni lintog ya da Pharisee. Ḵapappaila ḵayu! Te andoḻdoḻmang ḵayu'tta baybaye umoy atta adayu we ili ta awad awisonyu'ḵ taḵon ay ossaan ta ambalin aḵ disipuluyu. Ḵad nu gangputonyu tuttuduwan sadi ye tagu, nambalin aḵ lawwelawweng ḵad amo madusa'd infiernu nu sa madusaanyu.

¹⁶ “Ḵaddagu ḵayu! Iissuyu naḵuḻape tagu we angipuyut atta udum. Te ituttuduyu we nu ansapata osae tagu ya usarona templo aḵ anaḵdoḻ ḵan siya, daḵampun aḵ basuḻ nu lisalisona da inkarina. Yaḵon nu siya isapatana buḻawan si templo, ḵasapuḻane ituttuwana inkarina.

¹⁷ Ḵaddagu ḵayu! Tuttuwa pagaye nadongdong-ogan ḵayu we naḵuḻap! Aaddi ye amo ampatog templo nu sa buḻawan te sa buḻawane awad si templo mitotoḵḵone mausar si anserbiyan ḵan Apudyus.

¹⁸ Ḵad ḵananyu bose nu isapatana altar, daḵampun aḵ basuḻ nu lisalisona inkarina. Yaḵon nu isapatana nidatun si altar, ḵasapuḻane ituttuwana inkarina.

¹⁹ Tuttuwae naḵuḻap ḵayu! Aaddi ye amo ampatog altar nu sa datun te sa datune awad si altar mitotoḵḵone mausar si anserbiyan ḵan Apudyus.

²⁰ Pun nu isapatana altar, indogana insapata da ngaimane nidatun.

²¹ Ḵad nu ansapata osae tagu ya usarona templo we ansapata, indogana insapata'ḵ Apudyus we iinggaw si templo.

²² Ḵad nu isapatan ni tagu'd langit, indogana bos insapata tronon Apudyus ya aḵ Apudyus we pangat.

²³ “Ḵaddagu ḵayu, diḵayu we mimistulun ni lintog ya da Pharisee. Ḵapappaila ḵayu! Te ittonyu ḵasimpuḻun ni apityu ḵan Apudyus, taḵon ay da muḻae amapiya'tta tipoy. Yaḵon adiyupun tuttuwaon ḵapatogane biline ituttudun ni lintog, isun da angwaanyu'tta maun-unan atta asintataguyu, ḵumadagu'tta asintataguyu ya mataḻgodan ḵayu. Ḵasapuḻane ḵoonyu da anna ḵad adiyu bos maliwatan da udum.

²⁴ Siya iissuyu naḵuḻape tagu we angipuyut atta udum. Isuyu bos tagu we sagatona inumona ta naippun iloḵ aḵ midoga yaḵon sillukmusna camel!

²⁵ “Ḵaddagu ḵayu, diḵayu we Pharisee ya da mimistulun ni lintog. Ḵapappaila ḵayu! Iissuyu tagu we ḵiwasanae abus labaw ni tasa ya sa ubot ni palatu! Yaḵon ad daḻom atta somsomoḵyu, amo ḵamommod ḵayu ya pasigyu kulukon da asintataguyu.

²⁶ Diḵayu we naḵuḻape Pharisee! Ḵasapuḻane umunae ḵiwasanyu'd daḻom si tasayu ḵan palatuyu ta pumoḻḵas ya pumoḻḵas os labawna.

²⁷ “Ḵaddagu ḵayu, diḵayu we mimistulun ni lintog ya da Pharisee. Ḵapappaila ḵayu! Te siya iissuyu da libone napintuḻan aḵ itaḵ, ḵad ambaḻubaḻu ḵatollonganda'k lasin. Yaḵon ad daḻom, napnuda'tta tung-aḻ da nanḵaḵatoy ya da losane ḵaḵaissawan.

²⁸ Sanat iissuyu we sa ḵatollonganyu'tta tagu, naun-unan ḵayu. Yaḵon ad daḻom si somsomoḵyu, napnu si ḵapappaila ya adiḵayupun tumuttuwa'tta pinion Apudyus.”

²⁹ “Ḵaddagu ḵayu, diḵayu we mimistulun ni lintog ya da Pharisee. Ḵapappaila ḵayu! Te nangwa ḵayu'ḵ libon da profeta si awe ya inam-ammaanyu bos da libon da naun-unane tagu.

³⁰ Ḵad ḵananyu we, ‘Nu siya oḵyan nabiyaganni timpun da danaḵḵoḻni, adiḵanipun oḵyan naḵaḵḵaila ḵan didae nanggongat atta profeta.’

³¹ Yaḵon gapu ta imbagayu ḵaḵnat, naawatane diḵayu da ganaḵ da tagu we nanggongat atta profeta si awe.

³² Dowwot, igangputyu illus da danaḵḵoḻyu insaḻad!

³³ Tuttuwae lawweng ḵan ḵaḵimḵimut ḵayu! Diḵayu da ganaḵ ni uḻog. Adiḵayupun paat miligsi'tte anusaan Apudyus ḵan diḵayu'd infiernu!

³⁴ Pun ibuunḵu ḵan diḵayu da profeta, da nalainge tagu ya da mimistulun ni lintog. Ḵad anggongat ḵayu'tta udum ya ipattoḻyu da udum atte kros. Da udum ḵad os, ap-aplitonyu dida'tta sinagogayu ya dinumane umawidanda, dogdogonyu dida'tta ḵinailin di ili ya ampaḵaḻamonyu dida.

³⁵ Pun madusa ḵayu gapu'tte nagongatan da naun-unane tagu misaḻad atte nangongatanda ḵan Abel we ambaḻu inggana'tte nangongatanda ḵan Zechariah we abeng Barachiah we gingngat da danaḵḵoḻyu si nambootan ni altar ya sa templo.

³⁶ Ibagaḵ ḵan diḵayu ḵatuttuwaan, diḵayu we tagu si sanae lunap, midoga ḵayu si biyang ya sa dusan da sadi ye ginnumngat.”

Sa Ayat Jesus Atta IJerusalem

³⁷ Pune sadi ḵanan Jesus, “Atoḵayu paye iJerusalem, diḵayu nanggongat atta profeta ḵan namatubatu'tta imbuun Apudyus! Nangampigae pioḵ dagupon diḵayu ḵan saḵon ta ayyuwanaḵ diḵayu we isun ni analsaliponponan ni mangaḻaḵ atta issiwna'tta payaḵna yaḵon adiyupun pion.

³⁸ Pun diḵayu mabaḻaw te tenan Apudyus diḵayu ya mabaawan temployu.

³⁹ Te ibagaḵ ḵan diḵayu we inggana sinsadi, ippun ogon ilanyu ḵan saḵon inggana'ḵ dumatong timpu we asiyu ḵanan, ‘Madaydayaw oḵyan umali ye imbuun Apudyus!’ ”