Matthew 22 - Sa Ugud Apudyus

Sa Pani Atte Daḵoḻe Gayagayan Ni Kasar

¹ Pun ḵanan os Jesus ḵan didae nangipani,

² “Mipani ampangatan Apudyus atte ari ye isagsaganana kasar ni babaḻu we abengna.

³ Naganggangput ḵade insaganana, nambuun atta sammiluna'ḵ ummoy nan-ayag atta ummunae naayagan. Yaḵon adidapun ummali.

⁴ Pun nambuun os ḵasin atta udume sammilu woḵ ḵanana, ‘Inḵayu ibaga'tta naayagan: Ilanyu ḵad, naḵasagana da maḵan si annae kasar. Insidani da antatabae baḵa ya naḵasagana losan.’

⁵ Yaḵon adipun os dumngoḻ da sadi ye naayagan. Awad ay osa ya ipapuutna ḵoona. Sa osa ummoy atte payawna. Sa osa bos ummoy nallaḵu.

⁶ Da udum ḵad, dinoḵmaanda da sammilun ni ari woḵ nampaḵaḻamonda dida woḵ asidaot dida gongaton.

⁷ Dingngoḻ ḵad ay ni Ari sadi ye naḵwa'tta sammiluna, amoamod de sangana woḵ ibuunna da suḻdaduna ta umoyda gongaton da nangongat ḵan dida ya singgobda siyudadda.

⁸ Pun ḵanan ni Ari atta udume sammiluna, ‘Insagsaganaḵ da losane ḵasapuḻan si annae kasar yaḵon gapu ta adipun ummali da tagu we inayagaḵ, adidapun oḵyan miyunude umali si gayagaya.

⁹ Inḵayu'tta ḵaḻsa ya ayaganyu da losane tagu we odasanyu.’

¹⁰ Pun ummoy da sammiluna woḵ inayaganda da losane indasanda, lawweng man ḵan ambaḻu. Pun napnu'tta naayagan aḻwaaḻwae kasaran.

¹¹ “Yaḵon ummoy ḵad ni Ari innila da naayagan, innilana osae tagu we adipun nansilup si miyapote silup da umoy maḵakasar.

¹² Pun ḵanan ni Ari ḵan siyae nangimus, ‘Buḻbuḻun, ngaipaḵa anna sinae adipun nansilup atte miyapot si annae kasar?’ Yaḵon gummiginnoḵ.

¹³ Pun ḵanan ni Ari atta sammiluna, ‘Baḻudonyu da imana ya da suḵina ya idawatyu'k lasin si anggiḵbot ta sidi ye umibiibil ḵan ngumalitod da babana te ampaḵapaḵaḻam.’ ”

¹⁴ Pun ḵanan Jesus we nangiyanungus, “Adu da tagu we naayagan yaḵon aḵit da napili.”

Sa Mipanggob Atte Bugis

¹⁵ Pune sadi ḵesan da Pharisee woḵ ummoyda nantutuḻag si inondae anoḵma ḵan Jesus gapu'tta inugudna.

¹⁶ Pun imbuunda da udume disipuludae Pharisee ya da nidoga si grupun Ari Herod ta umoyda ḵan Jesus. Indasanda ḵad, ḵananda, “Mistulu, igammuni ye losane ibagam tuttuwa ya igammuni bose ippun laḵlaḵsigom aḵ tagu te daḵampun aḵ siya itollongnu saad ni tagu yaḵon siya ituttudum ḵatuttuwaane mipanggob si pinion Apudyus we ḵoon da tagu.

¹⁷ Pun ibagam ud nu ngai ḵasomsomḵam si anna. Lisalison taḵu ḵamman lintog Moses nu ambayad ḵani'tta bugis atte Emperor ad Rome? Ambayad ḵani baḵon nu umadini?”

¹⁸ Yaḵon igammun Jesus we lawweng panggobda, pun ḵanana ḵan dida, “Diḵayu we ḵapappaila! Ngaipayu saḵon siḵapan?

¹⁹ Angipaila ḵayu ḵan saḵon atte ossaane palatae ambayadyu si bugisyu.” Pun innatodda ḵan siya osae palata.

²⁰ Ḵanan Jesus we nan-imus ḵan dida, “Ngai simbosaḻ ḵan singngadan si anna?”

²¹ Ḵananda, “Sa Emperor.” Ḵanan Jesus ḵan dida, “Nu ḵaḵnat, ittonyu ḵan Emperor da ḵuwana, ḵad ittonyu bos ḵan Apudyus da ḵuwan Apudyus.”

²² Dingngoḻda ḵad insongbatna, nataagda pun tinenanda woḵ mabuḵaḻda.

Sa Im-imus Atte Umuliyan Da Matoy

²³ Sa sadi ye aḻgaw, ummoy da udume Sadducee ḵan Jesus woḵ nan-imusda ḵan siya. Dida osae grupun da Judyu we adipun amati ye umuli da matoy.

²⁴ Ḵananda ḵan siya, “Mistulu, annaya intuttudun Moses si awe. Nu awad laḻaḵi'ḵ angasawa ya natoye ippun abengda, ḵasapuḻane asaw-on os ni sunudna baḻu. Ḵad nu awad abengda, mibelang aḵ abeng ni natoy.

²⁵ Pun inninggaw da pitu we ansusunude lallaḻaḵi ye inninggaw ḵan ditaḵu sina. Nangasawa panguḻu yaḵon natoy atte daandapun maganaḵ. Pun inasawan ni ḵumagwae sunudna baḻu.

²⁶ Isuna bose natoye naippun abengda. Pun nipasani bos ḵumaḵlu yaḵon isuna bose naippun abengda inggana si ḵumapitu.

²⁷ Anungusna ḵad, natoy os bubai.

²⁸ Sa umali ye aḻgaw atte umuliyan da natoy, ngai ḵan dida ustu we sin-asawa'tte annae bubai te losanda inasawa?”

²⁹ Ḵanan Jesus we summongbat, “Nankamali ḵayu te adiyupun naawatan nigili ye Ugud Apudyus ya sa ḵabooḻana.

³⁰ Te nu magangput umuli da natoy, adidapun ogon angasawa te isuda da anghel ad langit.

³¹ Nu mipanggob si umuliyan da natoy, iḵagasmoḵyu oḵyan binasayu we imbagan Apudyus ḵan diḵayu si ugudna.

³² Ḵanana, ‘Saḵon aḵ Apudyus we Apudyus da Abraham, Isaac ya aḵ Jacob.’ Sa piona ugudon, siya Apudyus da matattagu, daḵampun aḵ Apudyus da natoy.”

³³ Da tagu we nandodongngoḻ nataagda'tta intuttuduna.

Sa Ḵapatogan Atta Bilin Apudyus

³⁴ Dingngoḻ ḵad da Pharisee ye pinaginoḵ Jesus da Sadducee te nakakaskasdaaw da songbatna'tta im-imusda, nadagupda ḵasin woḵ ummoyda ḵan Jesus.

³⁵ Inninggaw osa ḵan didae nalainge mistulun ni lintoge nan-imus ḵan Jesus ta siḵapana.

³⁶ Ḵanana, “Mistulu, ngai ḵapatogane bilin Apudyus?”

^37-38 Ḵanan Jesus, “Annaya ḵapatogan ḵan umunae bilin Apudyus, ‘Ḵasapuḻane ayatom aḵ Apu we Apudyusnu atte amine pusum ya amine ḵalidodwam ya amine somsomoḵnu.’

³⁹ Sa ḵumagwae ḵapatogan isuna, ‘Ḵasapuḻane ayatom da asintatagume isun ni an-aayatnu si long-agnu.’

⁴⁰ Da losane lintog Moses ya da inggilin da profeta, nibatayda'tta sanae duwae bilin Apudyus.”

Sa Mipanggob Ḵan Kristu

⁴¹ Nandatdatong ḵad da Pharisee, ḵanan Jesus we nan-imus ḵan dida,

⁴² “Ngai ḵasomsomḵanyu mipanggob ḵan Kristu? Ngai singganaḵ ḵan siya?” Pun ḵananda, “Ganaḵ Ari David.”

⁴³ Ḵanan os Jesus ḵan dida, “Yaḵon ngaipan Ari David ngannon aḵ Kristu Apuḵ? Te sa imbagana, impaspasmoḵ ni Ispiritu Santu ḵan siyae ḵanana,

⁴⁴ “ ‘Ḵanan Apudyus atte Apuḵ: Tumuḵduḵa'tte madawinanḵu inggana'ḵ oḻgoḵ da ḵabusuḻnu.’

⁴⁵ Pun nu ḵanan Ari David we aḵ Kristu Apuna, ngai inonae ganaḵna bos nu?”

⁴⁶ Naippun ossaan sidi'ḵ lamog angibaga'tte songbat ni inimus Jesus. Inggan ni nangibag-ana'tte sana, naippun ogon maḵaituḻode an-imus ḵan Jesus.