Matthew 21 - Sa Ugud Apudyus

Sa Nanaydayawanda Ḵan Jesus Ad Jerusalem

¹ Madam-an ḵad da Jesus ya da disipuluna'd Jerusalem, dummatongda'tte domangna'd Bethphage atte Beleg Olives. Namangpanguwon Jesus da duwa'tta disipuluna

² woḵ ḵanana ḵan dida, “Inḵayu si umasi ye ili. Ḵad nu dumatong ḵayu sidi, odasanyu nipungode donkey ya sa ubbuna. Uḵasanyu ya indatongyu dida ḵan saḵon.

³ Ḵad nu awad angimus ḵan diḵayu, ḵananyu, ‘Ḵasapuḻan ni Apu dida,’ woḵ daguse iyunudna.”

⁴ Naḵwa sana ta mituttuwa inggilin da profeta si awe ye ḵanana,

⁵ “Ibagayu'tta tagu'd Jerusalem, ‘Annat Ariyu we umali ḵan diḵayu we impakumbabana long-agnae nangabayu si ubbun ni donkey.’ ”

⁶ Pun ummoy da duwae disipuluna woḵ ḵingwada imbilin Jesus ḵan dida.

⁷ Indatongda ḵad donkey ya sa ubbu ḵan Jesus, iyyap-apda da taḵḵop da silupda'tta odog da duwae ayam woḵ angabayu'ḵ Jesus.

⁸ Ḵaaduwan atta tagu we inninggaw sidi iyyap-apda da taḵḵop da silupda'tte ḵaḻsae ayon Jesus. Da udum ḵad os lummapidda'tta pangan da ḵayu woḵ iyyap-apda si ḵaḻsae ayona ta idayawda ḵan pasaaḻonda.

⁹ Da losane tagu we ummun-una ḵan niyun-unud ḵan Jesus, ḵanandae nanugtug-uy, “Madaydayaw ganaḵ Ari David! Madaydayaw oḵyan umali ye imbuun Apudyus! Madaydayaw aḵ Apudyus we ḵangatuwan!”

¹⁰ Dummatongda ḵad ad Jerusalem, nagulu da losane tagu sidi woḵ ḵananda, “Ngai anna?”

¹¹ Ḵanan da tagu we nibuḻun ḵan Jesus, “Siya'ḵ Jesus we profeta we iNazareth si probinsiya'd Galilee.”

Sa Namaḻyawan Jesus Atta Allaḵlaḵu Atte Templo

¹² Pune sadi, nillumnoḵ aḵ Jesus atte paway ni templo woḵ pinaḻyawna da losane allaḵlaḵu ḵan ngumina'tta banage mausar atte andatunan ḵan Apudyus ad daḻom atte paway ni templo. Binalittuwaḵna da lamisaan da ansusuḵat aḵ pilaḵ ya da tutuḵduwan da allaḵu'tta kalapati,

¹³ woḵ ḵanana ḵan dida, “Nigili'tte Ugud Apudyus we ḵanana, ‘Sa boḻoyḵu ngannonda boḻoye luluwaḻuwan da tagu.’ Yaḵon nambalinonyu'ḵ inggawan da tulisan.”

¹⁴ Pun ummoy da udume naḵuḻap ya da udume napilaye tagu ḵan Jesus si paway ni templo woḵ ḵinaanna da saḵitda.

¹⁵ Yaḵon innilan ḵad da papangat da papadi ya da mimistulun ni lintog da nakaskasdaawe ḵingwana ya dingngoḻda bos da abenge ḵanandae angiyip-ipḵaw atte paway ni templo, “Madayaw ganaḵ Ari David!” Summangada.

¹⁶ Ḵananda ḵan Jesus, “Dingngoḻnu ḵamman iyip-ipḵaw da annae abeng?” Ḵanan Jesus, “On, dingngoḻḵu. Iḵagasmoḵyu oḵyan binasayu si nigili ye Ugud Apudyus we ḵanana, ‘Tuttuduwan Apudyus da abeng ya da uttinge gattoḵe andayaw ḵan siya.’ ”

¹⁷ Pun tinenan Jesus dida woḵ ummoy ummiyan ad Bethany.

Sa Ḵayu We Adipun Amunga

¹⁸ Bigbigat ḵad si nipauliyan da Jesus ad Jerusalem, nauḻat.

¹⁹ Innilana ḵad ḵayu we fig si igid ni ḵaḻsa, ummoyna inadani nu awad bungana yaḵon naippun indasana, abus tubuna. Pun ḵanan Jesus si ḵayu, “Inggana sinsadi, adiḵa ogon amunga!” Pun daguse naḻ-uy sadi ye ḵayu.

²⁰ Innilan ḵad da disipuluna ḵingwana, sintataagda woḵ ḵananda, “Ngaipa daguse naḻ-uy sanate ḵayu?”

²¹ Ḵanan Jesus ḵan dida, “Ibagaḵ ḵan diḵayu ḵatuttuwaan, nu amati ḵayu ḵan Apudyus ya adi ḵayu anduwaduwa, lamogyu ḵoon isun ni ḵingwaḵ si annae ḵayu we fig. Daḵampun aḵ abus sana, lamogyu bos ḵanan si annae beleg, ‘Ḵumassadḵa ya an-atunḵa si baybay,’ ḵad tuttuwae maḵwa.

²² Nu awad pammatiyu ḵan Apudyus, ittona da losane ḵodawonyu nu alluwaḻu ḵayu ḵan siya.”

Sa Ḵaḻabbongan Jesus

²³ Pun nipauli'ḵ Jesus si paway ni templo. Nantuttudu ḵad, nandatdatong da papangat da papadi ya da pallakayon da Judyu woḵ ḵanandae nan-imus ḵan siya, “Ngai ḵaḻabbongame angwa'tta sana? Ḵad ngai nangitod ḵan siḵa si annae ḵaḻabbongam?”

²⁴ Ḵanan Jesus we summongbat, “Awad ud imusoḵ ḵan diḵayu. Nu songbatanaḵ, asiḵ os ibaga nu ngai ḵaḻabbongaḵe angwa'tta sana.”

²⁵ Pun ḵanana, “Dinu naḻpuwan ni ḵaḻabbongan John we ambonyag? Aḵ Apudyus baḵon nu da tagu?” Pun ḵanandae nan-uugud, “Ngai isongbat taḵu? Nu ḵanan taḵu we, ‘Naḻpu ḵan Apudyus,’ ḵanana ḵan ditaḵu, ‘Ngaipayu adi pinati nu?’

²⁶ Yaḵon nu ḵanan taḵu we sumongbat, ‘Naḻpu'tta tagu,’ siya iyogyat taḵu nu ngai ḵoon da tagu ḵan ditaḵu te losanda pinati ye profeta'ḵ John.”

²⁷ Pun sa insongbatda ḵan Jesus, “Naippun igammuni.” Pun ḵanan Jesus ḵan dida, “Nu ḵaḵnat, umadiḵ os ibaga nu ngai nangitod si ḵaḻabbongaḵe angwa'tta sana.”

Sa Pani Atta Duwae Abeng

²⁸ Pun inug-uggud Jesus annae pani woḵ ḵanana ḵan dida, “Ngai ḵasomsomḵanyu'tte mipanggob si anna? Inninggaw tagu we duwa da abengnae laḻaḵi. Sin-aḻgaw ḵad ḵanana si panguḻu, ‘Abeng, inḵa anḵewaaḻ atte mumuḻḻaan atta de grape.’

²⁹ “Summongbat woḵ ḵanana, ‘Umadiḵ,’ yaḵon umun-uni pun, nandadauli woḵ ummoy nanḵewaaḻ.

³⁰ “Pune sadi, ummoy os ama si udidi woḵ isuna bos imbagana ḵan siya. Ḵanana, ‘On Ama, annae iyyaḵ,’ yaḵon adipun ummoy.”

³¹ Pun ḵanan Jesus, “Dinu'tta annae duwa nanuttuwa si pion amada?” Ḵananda, “Sa panguḻu.” Pun ḵanan Jesus ḵan dida, “Ibagaḵ ḵan diḵayu ḵatuttuwaan, sa ḵabasbassuḻane tagu we isun da andadagup atta bugis ya da puta, umun-unada nu diḵayu umoy si ampangatan Apudyus.

³² Te ummali'ḵ John we Ambobonyag woḵ intuttuduna ḵan diḵayu inonyu we mabiyag si maun-unane biyag yaḵon adiyupun pinati. Ḵad sa andadagup atta bugis ya sa puta, namatida ḵan siya. Taḵon ay nu intollongyu inondae nambabawi'tta basuḻda, adiḵayupun nambabawi'tta basuḻyu ya adiyupun os pinati.”

Sa Pani Atta Gumagammole

³³ Pun ḵanan Jesus, “Dongngonyu osae pani. Inninggaw tagu we nammuḻa'ḵ aduadu we grape atte lutana. Pun ḵinabitina nampaliḵwos woḵ ummabut atte batu ta mauppunan ni baḻat da de grape nu asotonda. Nantaḵad os aḵ antaḵnange boḻoy ta inggawan da guwaḻda. Pun impatangḵonna'tta udume gumagammole woḵ ummoy atte adayu we ili.

³⁴ “Dummatong ḵad timpu we ambuḻasanda'tta de grape, imbuun ni sinḵuwa da sammiluna'ḵ umoy angaḻa si billayna.

³⁵ Yaḵon dummatong ḵad da sammiluna, dinoḵmaan da gumagammole da sammiluna woḵ inap-aplitda osa ḵan dida, gingngatda osa woḵ binatubatuda osa.

³⁶ Pun imbuunna bos ḵasin da ad-adu'tta sammiluna nu da ummuna yaḵon da gumagammole, ḵingwada bos isun ni ḵingwada'tta ummuna.

³⁷ Anungusna ḵad, imbuunna abengna ḵan dida te ḵanana'tte somsomoḵna, ‘Patpatgonda abengḵu.’

³⁸ “Yaḵon innilan ḵad da gumagammole ye sa abeng ni sinḵuwa'tte mumuḻḻaan atta de grape, ḵanandae nantutuḻag, ‘Annaya angilaḵsun si annae mumuḻḻaan atta de grape. Awwayyu, gongaton taḵu ta anḵuwa taḵu da laḵsunna.’

³⁹ Pun dinoḵmaanda woḵ pinaḻyawda'tte lasin ni sadi ye mumuḻḻaan atta de grape woḵ gingngatda.

⁴⁰ “Pun nu dumatong sinḵuwa si mumuḻḻaan atta de grape, ngai nin ay ḵoona'tta gumagammole?”

⁴¹ Ḵanandae summongbat, “Aaddi ye ḵaog-ogyat inonae angongat atta sanae ḵabasbassuḻane tagu. Ḵad iyatunna ipatangḵon mumuḻḻaana'tta de grape atta sabali ye tagu we angitod si billayna nu imbubuḻas.”

⁴² Pun ḵanan Jesus ḵan dida, “Iḵagasmoḵyu oḵyan binasayu si nigili ye Ugud Apudyus we ḵanana, “ ‘Sa batu we indiyan da nantaḵad aḵ boḻoy, siya nambalinon Apudyus aḵ ḵapatogane batu we amapagdot atte boḻoy. Sa annae ḵingwan Apudyus, ambaḻubaḻu. Ḵad nakaskasdaaw atte ḵasomsomḵan taḵu.’

⁴³ “Pun sana ibagaḵ ḵan diḵayu we aḵ Apudyus iginoḵnae angipangat ḵan diḵayu ya siya ipangatana da tagu we angwa'tta ambaḻu we mibagay atta ipangatana.

⁴⁴ Ngaimane maottag si annae batu magomogomoḵ ya sa tagu we maottagan ni sanae batu, magabugabuḵe isun di gabu.”

⁴⁵ Dingngoḻ ḵad da papangat da papadi ya da Pharisee sanae pani, inigammudae dida piona ugudon.

⁴⁶ Pun pionda oḵyane doḵmaan aḵ Jesus yaḵon siya iyogyatda da tagu te imbelangda'ḵ Jesus we profeta.