Matthew 17 - Sa Ugud Apudyus

Sa Nambaliwan Ni Ḵatollongan Jesus

¹ Naḻaḵpus ḵad onom aḻgaw, inayagan Jesus aḵ Peter ya da James ḵan John we ansunud woḵ nanagadadae mismu atte antaḵnange beleg.

² Sa nangil-anda ḵan Jesus, nambaliw ḵatollongana. Sa bosaḻna, allangḻange isun di init ya sumilisiling silupna.

³ Pun baag-en nampaila da Moses ḵan Profeta Elijah ḵan didae maḵaug-uggud ḵan Jesus.

⁴ Pun ḵanan Peter ḵan Jesus, “Apu, atopay baḻun ni annaan taḵu sina. Nu iyunudnu, angwaaḵ aḵ tuḻu we sigay sina ta ḵuwam osa, ḵuwan Moses osa ya ḵuwan Profeta Elijah osa.”

⁵ Sissiya ḵade an-uguugud, baag-en nalibuuwanda si ampaddapadda woḵ dingngoḻda gingae naḻpu'tte libuu we ḵanana, “Annaya ay-ayatoḵe abengḵu ya siya masmas-omaḵ. Dongngonyu da ibagana.”

⁶ Dingngoḻ ḵad da disipulu sadi ye ginga, nalluḵbubda si luta te ummamdan ḵimutda.

⁷ Yaḵon ḵummatam aḵ Jesus woḵ iyyappadna imana ḵan dida woḵ ḵanana, “Tumaḵdog ḵayu, adi ḵayu maḵimut.”

⁸ Nantangadda ḵad, ippun udum aḵ innilada, nu adi abus aḵ Jesus.

⁹ Nan-osogda ḵad, ḵanan Jesus we namilin atta disipuluna, “Adiyu ugudon atta ngaiman da innilayu, inggana'ḵ taguwon Apudyus saḵone Abeng Di Tagu.”

¹⁰ Pun ḵanan da disipulun Jesus we nangimus, “Ngaipan da mimistulun ni lintog ibagae ḵasapuḻane umuna'ḵ Profeta Elijah umali nu aḵ Kristu?”

¹¹ Ḵanan Jesus, “Sa tuttududa tuttuwae umuna'ḵ Profeta Elijah umali ta umoyna iyuḻnus da losan.

¹² Yaḵon sa ibagaḵ ḵan diḵayu, nagangput ummali'ḵ Profeta Elijah. Da tagu ḵad, adidapun naḵaimatun ḵan siya yaḵon ḵingwada pionda ḵoon ḵan siya. Isuna bose ampaḵaḻamonda saḵone Abeng Di Tagu.”

¹³ Pun naawatan da disipulunae aḵ John we Ambobonyag ibagabagana.

Sa Namaḻyawan Jesus Atte Aḻan

¹⁴ Nipaulida ḵad atta adu we tagu, ḵummatam osa woḵ nanalluḵu si sinagung Jesus

¹⁵ woḵ ḵanana “Apu, ḵadaguwam ḵappos abengḵu we naḵoḻtoy. Ampaḵapaḵaḻam ya patilayun misobosob si danum baḵon nu misubba si apuy.

¹⁶ Inniyoyḵu'tta disipulum yaḵon adidapun lamog ḵaanon koḻtoyna.”

¹⁷ Ḵanan Jesus we summongbat, “Diḵayu we ippun pammatiyu ḵan lawwelawweng somsomoḵyu we tagu si sanae lunap! Ḵamaan ni inggawaḵ ḵan diḵayu ya asi ḵayu amati ḵan saḵon? Ḵamaan ni ampatinggaan ni anusḵu ḵan diḵayu?” Ḵanana'tte aman ni abeng, “Idatongnu abeng ḵan saḵon.”

¹⁸ Pun sinuppaḵan Jesus aḻan woḵ pinaḻyawna ta tenana abeng woḵ tinenan ḵad ni aḻan, daguse naḵaan saḵitna.

¹⁹ Pune sadi, ummabus ḵad aḵ Jesus ya da disipuluna, iyyaggaḵawda ḵanane nangimus ḵan siya, “Ngaipa ḵani adi maḵapaḻyaw atte sadi ye aḻan?”

²⁰ Ḵanan Jesus we summongbat, “Gapu'tte aḵit pammatiyu. Ibagaḵ ḵan diḵayu ḵatuttuwaan, nu awad aḵit aḵ pammatiyu'ḵ isun ni ḵapeet ni buḵoḻ ni mustasa, maḵwa ḵananyu'tte beleg, ‘Miyatunḵa'tte andi,’ ḵad tuttuwae an-atun. Te lamogyu ḵoon da ngaiman.

²¹ Yaḵon sa aḻane ḵatti, ippun maḵapaḻyaw nu adin ni amaḻyaw ipapati ye alluwaḻu ḵan Apudyus ya allaun si alluwaḻuwana.”

Sa Nangipigwaan Jesus Nangibag-an Si Matoyana

²² Nandatdatong ḵad da disipulun Jesus atte probinsiya'd Galilee, ḵanana ḵan dida, “Ibagaḵ ḵasin ḵan diḵayu we saḵone Abeng Di Tagu, mipuḻangaḵ atta ḵabusuḻḵu

²³ ya gongatonda saḵon. Yaḵon sa miḵaḵlu we aḻgaw, taguwonaḵ ḵan Apudyus.” Dingngoḻ ḵad da disipuluna sadi, amod de babauyda.

Sa Namayadan Jesus Si Bugis Ni Templo

²⁴ Dummatong ḵad da Jesus ya da disipuluna'd Capernaum, ummoy da andadagup atte bugis ni templo ḵan Peter woḵ ḵanandae nangimus, “Ambayad ḵamman mistuluyu si bugis ni templo?”

²⁵ Ḵanan Peter we summongbat, “On, ambayad ḵammos.” Nillumnoḵ ḵad aḵ Peter si boḻoy, ummuna'ḵ Jesus gumminga woḵ ḵanana, “Simon, ngai ḵasomsomḵam? Ngai andagupan da ari si annae luta'tta bugis? Da taguda baḵon nu da ḵaili?”

²⁶ Ḵanan os Peter we summongbat, “Da ḵaili.” Ḵanan Jesus ḵan siya, “Nu ḵaḵnat, daḵampun aḵ ḵasapuḻane ambayad da taguda.

²⁷ Yaḵon daḵampun aḵ pion taḵu paḻawengon da annae tagu. Inḵa amungwit si baybay. Ḵad itaḵdangnu umunae ugadiwe mabungwitan. Ḵad taḵangom sungadna ḵad awad de pilaḵe laḻammogta ambayad si bugista. Aḻam ya binayadam bugista.”