Matthew 14 - Sa Ugud Apudyus

Sa Natoyan John We Ambobonyag

¹ Sa sadi ye timpu, dingngoḻ Herod we gobernor atte probinsiya'd Galilee mipanggob atta ḵingwan Jesus,

² ḵanana'tta sammiluna, “Sa annae Jesus, siya'ḵ John we Ambobonyag we ummuli. Siya gapunae annat ḵabooḻanae angwa'tta nakaskasdaaw.”

^3-4 Imbagan Herod ḵaḵna gapu'tte ḵingwana si awe. Siya nampadoḵma ḵan John woḵ impaibaḻudna te sinuppaḵan John we adimpun ni lintog iyunude asaw-ona'ḵ Herodias we asawan ni sunudnae aḵ Philip.

⁵ Taḵon ay nu pion Herod pagongat, umogyat atta adu we tagu te ibelangda'ḵ John we profeta.

⁶ Dummatong ḵad aḻgawe niyanaḵan Herod, inayagana da tagu ta maḵagangganasda. Inninggaw babaḻasange abeng Herodias. Pun nansala si sinagung da losan. Nas-om aḵ Herod

⁷ woḵ gapu'tte sana ḵanana, “Isapataḵe ittoḵ ngaimane ḵodawom ḵan saḵon!”

⁸ Gapu'tte intuttudun inanae ḵodawona, ḵanana ḵan Herod, “Pioḵe ittom ḵan saḵon sinsadi uḻun John we Ambobonyag we maigga'tte duḻan.”

⁹ Ansigab si somsomoḵ ni ari yaḵon gapu ta insapatana'tte sinagung da adu we naayagan, mabaine adi angituttuwa. Pun imbilinnae maatod ḵodawona

¹⁰ woḵ nambuun aḵ ummoy namungtuḻ si uḻun John atte babaḻḻudan.

¹¹ Pun indatongda uḻun John we inniggada'tte duḻan woḵ innatodda'tte babaḻasang ta umoyna itton ḵan inana.

¹² Dingngoḻ ḵad da disipulun John, ummoyda innaḻa ladagna ta umoyda ilibon. Pun ummoyda imbaga ḵan Jesus naḵwa.

Sa Namaḵanan Jesus Atta Lummabos Aḵ Limallibu

¹³ Dingngoḻ ḵad da Jesus naḵwa ḵan John, nambangkada woḵ ummoyonda'tte bumbummaaw ta umabusda oḵyan. Yaḵon inigammun ḵad da amoamode tagu we ummoyonda, nallibbatda woḵ nanadtaddaḻandae naḻpu'tta nansabasabali ye ili ta mibuḻunda ḵan dida.

¹⁴ Dummatong ḵad da Jesus atte taḻantag ni baybay, lummogsadda'tte bangka. Innilana ḵad da amode tagu, ḵummadagu ḵan dida woḵ ḵinaanna da saḵit da nasaḵit.

¹⁵ Anna ḵade mumasdom, ummoy da disipuluna ḵan siya woḵ ḵananda, “Naabus ay mummasdom ya anna taḵu si bumbummaaw. Ibagam ḵappos atta tagu ta umoyda ngumina'ḵ maḵan atta adani ye ili.”

¹⁶ Ḵanan Jesus, “Daḵampun aḵ ḵasapuḻane umoyda. Diḵayu amaḵan ḵan dida.”

¹⁷ Ḵananda ḵan siya, “Abuse limae tinapay ḵan duwae nidawise ugadiw anna ḵan diḵani.”

¹⁸ Ḵanan Jesus, “Idatongyu dida ḵan saḵon.”

¹⁹ Pun binilinna da tagu ta tumuḵduda si lullumun woḵ innaḻana limae tinapay ya sa duwae ugadiw woḵ nantangad ad langite nanggappiya ḵan Apudyus. Pun binisbisaḵna tinapay ya da ugadiw woḵ innatodna'tta disipuluna ta iwaḻasda.

²⁰ Pun nanganda losan woḵ nassugda. Nagangputda ḵad, dinagup da apostol da nabun-an. Pun napnu nasawaḻan aḵ duwae aḵḵubaw.

²¹ Da nangan, umoye limallibu da laḻaḵi, adipun niyiyap da bubai ya da abeng.

Sa Nanaddaḻanan Jesus Atte Labaw Ni Danum

²² Nagangput ḵade pinaḵanan Jesus da tagu, nambangkaona da disipuluna ta umunada dumoḻmang ad domang. Pun pinaḻyawna da adu we tagu'tta ilida.

²³ Ummoyon ḵad da tagu, nanagada'ḵ Jesus atte beleg ta umoy alluwaḻu we abus. Lummabi ḵad, sissiya'ḵ Jesus atte beleg,

²⁴ ya da disipulunae nambangka, adayuda si taḻantag ni baybay. Baag-en bummali woḵ amod de tupiyaḵe tupatupaḵana bangkada te niyabot ḵan dida ampigsae bibbid.

²⁵ Madam-an taḻun ḵad, nan-osog aḵ Jesus woḵ nanaddaḻan si labaw ni danum pun ummadani ḵan dida.

²⁶ Innilan ḵad da disipulunae anadtaddaḻan si labaw ni danum, simboboggada si ḵimutda te ḵanandapun nu lagayan.

²⁷ Pun daguse gumminga'ḵ Jesus woḵ ḵanana, “Tumuḻod ḵayu! Adi ḵayu maḵimut! Saḵon aḵ Jesus!”

²⁸ Ḵanan Peter, “Apu, nu tuttuwae siḵa, ayaganaḵ ta umaliyaḵ si sanat anaddaḻan si labaw ni danum.”

²⁹ Ḵanan Jesus, “Awwaynu.” Dingngoḻ ḵad ay Peter, lummogsad si bangka woḵ insaḻadnae nanaddaḻane ummoy ḵan Jesus.

³⁰ Yaḵon giniḵnana ḵade amod de pigsan ni bibbid, naḵimtan woḵ insaḻadnae milisob. Pun daguse nampoḵaw woḵ ḵanana, “Apu, taguwonaḵ!”

³¹ Pun daguse indawawan Jesus imana ḵan Peter woḵ doḵmaana. Ḵanana, “Aḵit pammatim! Ngaipaḵa anduwaduwa?”

³² Unipun, summaḵayda ḵad atte bangka, daguse naḵaginoḵ ampigsae bibbid.

³³ Pun awad ay osa ḵan didae inninggaw si bangka nandayaw ḵan siya, ḵananda, “Tuttuwae siḵa Abeng Apudyus.”

Sa Nangaanan Jesus Atta Saḵit

³⁴ Dummoḻmangda ḵad, dummatongda si ili'd Gennesaret.

³⁵ Immatunan da tagu'ḵ Jesus. Pun nambuunda'ḵ ummoy nangibaga'tta tagu'tta nampaliḵwose ili ta an-idatongda'tta losane nasaḵit ḵan Jesus.

³⁶ Nandagdaguda ta taḵon ay oḵyan nu abuse tokkon da nasaḵit gayadan ni silupna. Pun losan atta nandoḵ, naḵaan da saḵitda.