Matthew 11 - Sa Ugud Apudyus

Sa Imbagan Jesus Atta Disipulun John We Ambobonyag

¹ Ginangput ḵad Jesus binilin da nasawaḻan aḵ duwae disipuluna, ummoyon woḵ ummoy nantuttudu ya iwwaḻagawagna Ambaḻu we Damag atta adani ye ili.

² Aḵ John ḵade Ambobonyag, sissiya si babaḻḻudan. Pun dingngoḻna ḵad da ḵingwan Kristu, imbuunna da udum atta disipuluna

³ ta umoyda an-imus ḵan Jesus, ḵananda, “Siḵa pagay inkarin Apudyus we umali baḵon nu awad udum aḵ uuwayonni?”

⁴ Ḵanan Jesus, “Mipauli ḵayu ḵan John ya ibagayu da innilayu ḵan dingngoḻyu.

⁵ Da naḵuḻap, maḵailada, da napilay, maḵataddaḻanda, da naleprosy, naḵaan saḵitda, da natuḻong, maḵadongoḻda, da natoy, nataguda ḵasin ḵad miwaḻagawag Ambaḻu we Damag atta ḵapus.

⁶ Ḵad ibagayu bos ḵan siyae pian tagu we adipun anduwaduwa si mipanggob ḵan saḵon.”

⁷ Nipauli ḵad da disipulun John, insaḻad Jesus we nan-ugud atta amode tagu mipanggob ḵan John. Ḵanana, “Ngai ummoyyu innila si bumbummaaw? Sa potawe mibibbibbid? Naid.

⁸ Ngai ummoyyu innila nu? Innilayu ḵad ain tagu we nansilup atte ampatoge silup? Naid. Te da nansilup atta ḵaḵnat babaḵnangda ya da boḻoy da ari inggawanda.

⁹ Pun ngai ummoyyu innila nu? Osa ḵad aine profeta? On, ibagaḵ ḵan diḵayu, daldallu nu sa profeta.

¹⁰ Te aḵ John nibaga si nigili ye Ugud Apudyus we ḵanana, ‘Dongngonyu! Awad de ibuunḵu we umun-una nu siḵa ta umoyna isagana daḻane ayom.’ ”

¹¹ Pun pinagatupan Jesus woḵ ḵanana, “Ibagaḵ ḵan diḵayu ḵatuttuwaan, losan atta nibuḵnag naippun tummoḵwaḻ aḵ nangatngatu nu aḵ John we Ambobonyag sina'd luta yaḵon sa ḵamḵama'tte ampangatan Apudyus nangatngatu nu siya.

¹² Inggan ni nangisaḻdan John we Ambobonyag we nangiwaḻagawag inggana sinsadi, awad da angipatut angiwaḻagawag atte ampangatan Apudyus ya awad os da angipatut midoga'tte ampangatana.

¹³ Te losane inggilin da profeta ya sa lintoge inggilin Moses, imbagada mipanggob si ampangatan Apudyus inggana si timpun John.

¹⁴ Ḵad nu tinuttuwayu imbagada, maawatanyu we aḵ John de Profeta Elijah we nipadtu we umali.

¹⁵ Diḵayu we andodongngoḻ, sosomḵonyu da dingngoḻyu.”

¹⁶ Pinagatupan os Jesus woḵ ḵanana, “Ngai angipaniyaḵ atta tagu sinsana? Isudan abenge an-ay-ayam atta pappawayan. Ḵad ḵanandae angiyip-ipḵaw atta asin-abbengda,

¹⁷ “ ‘Nanadoḵ ḵani, yaḵon adiḵayupun nanangni. Pun nanḵanḵanta ḵani'tta ḵanḵanta'tta bagungon, yaḵon adiḵayupun os naḵadomdom.’

¹⁸ Dida da mipaniyan da tagu sinsana te ummali ḵad aḵ John we Ambobonyag, nallaun ya adipun os uminum si bayas, ḵananyu, ‘Ngaipana ḵoon ḵaḵnat? Naaḻanan!’

¹⁹ Ḵan saḵone Abeng Di Tagu, ummaliyaḵ ḵade maḵainum ya maḵaḵan, ḵananyu, ‘Ilanyu, siya ḵad bartekero ya botaḵan! Maḵabuḻbuḻun atta andadagup atta bugis ya da udume ḵabasbassuḻan.’ Yaḵon ilanyu ḵad, mipailae ustu ḵinalaing Apudyus atta biyag da losane angunud atte ḵinalaingna.”

Sa Anguwisan Apudyus Atta Tagu

²⁰ Pune sadi, sinang-an Jesus da umili ye nangwaana'tta adu we nakaskasdaaw te adidapun imbabawi da basuḻda ya adidapun agaye angwa.

²¹ Ḵanana, “Ḵaddagu ḵayu we iChorazin ya diḵayu we iBethsaida! Te nu ḵingwaḵ ad Tyre ḵan Sidon da nakaskasdaawe isun da ḵingwaḵ atta iliyu, dagus nine nansilupda'tta saḵu ya iggada da dapuḻ atta uḻuda ta ipailadae imbabawida da basuḻda ya iyyagaydae nangwa. Diḵayu ḵad, taḵon ay nu innilayu, adiḵayupun nambabawi'tta basuḻyu.

²² Yaḵon ibagaḵ ḵan diḵayu, nu dumatong anguwisan Apudyus atta losane tagu, nadagdagson dusayu nu sa dusan da iTyre ya iSidon.

²³ “Diḵayu ḵade iCapernaum, sosomḵonyu ḵad aine midayaw ḵayu'd langit? Naid! Sa maḵwa, aaddi ye miballu ḵayu'd Hades, sa igaw da natoye madusaanyu! Te nu ad Sodom oḵyan nangwaaḵ atte nakaskasdaawe isun da ḵingwaḵ atta iliyu, dagus nine nambabawida'tta basuḻda ya adimpun nin oḵyan Apudyus dinadail ilida ḵad awad oḵyane sissiya'd Sodom sina inggana sinsadi.

²⁴ Yaḵon ibagaḵ ḵan diḵayu we nu dumatong anḵuwisan Apudyus atta losane tagu, nadagdagson dusayu nu da iSodom.”

Sa Anggappiyaan Jesus

²⁵ Sa sadi ye timpu, ḵanan Jesus we nalluwaḻu, “Ama, ipangatam da losan sina'd luta ya ad langit. Anggappiyaaḵ ḵan siḵa te adimpun impaigammu ḵatuttuwaan atta nalalaing ḵan naadaḻane tagu, siya nangipaigammuwam da napakumbaba ya da antaḻgode isudan abeng.

²⁶ On, ḵingwam ḵaḵna te siya piniom.”

²⁷ Pun ḵanan Jesus atta tagu, “Innatod Amaḵ we Apudyus ḵan saḵon da losane ḵabooḻan ḵan laing. Iniiggammuna saḵon ya naippun udum aḵ nangigammu ḵan saḵon. Ḵaḵna bos aḵ Amaḵ we naippun angigammu ḵan siya malaksid ḵan saḵon ya da ngaimane tagu we pioḵ angipaigammuwan.”

²⁸ “Diḵayu losane naayong ḵan ampaḵaḻam, awwayyu ḵan saḵon ta paillongoḵ diḵayu.

²⁹ Unudonyu da bilinḵu ḵan an-adaḻ ḵayu ḵan saḵon te naanusaḵ ḵan napakumbabaaḵ woḵ maillongan ḵayu.

³⁰ Te da biline ittoḵ ḵan diḵayu we tuttuwaonyu, allasu ya allangpaw.”