Matthew 10 - Sa Ugud Apudyus

Da Nasawaḻan Aḵ Duwae Apostol

¹ Sin-aḻgawan ḵad, inayagan Jesus da nasawaḻan aḵ duwae disipuluna. Pun innatodna ḵaḻabbongan ḵan didae amaḻyaw atta aḻan ya angaan atta losane kalasin di saḵit ya da ampaḵaḻaman da tagu.

² Annaya da ngadan da nasawaḻan aḵ duwae apostol Jesus, aḵ Simon we nginadananda'ḵ Peter, aḵ Andrew we sunudna, da James ḵan John we abeng Zebedee,

³ da Philip, Bartholomew, Thomas, aḵ Matthew we andadagup atta bugis, aḵ James we abeng Alphaeus, aḵ Thaddaeus,

⁴ aḵ Simon we nginadananda'ḵ Angitaḵdog si ilina ya aḵ Judas Iscariot we nangituyuḵ ḵan Jesus.

Sa Nangibuunan Jesus Atta Apostolna

⁵ Imbuun Jesus da nasawaḻan aḵ duwae apostolna woḵ ḵananae namilibilin ḵan dida, “Adiyu ayon da daḻane umoyon atta ilin da Gentil ya da daḻane umoyon atta ilin da iSamaria.

⁶ Yaḵon inḵayu'tta buḻun taḵu we ganaḵ Israel we da isudan nataḻaḵe karnero.

⁷ Dinumane ayanyu, iwaḻagawagyu we sinsadi gattoḵe awad ḵan diḵayu ampangatan Apudyus.

⁸ Ḵaanonyu da saḵit, taguwonyu da natoy, ḵaanonyu saḵit da naleprosy ya paḻyawonyu da aḻan atta naaḻanan. Naippun nambayadyu si annae ḵaḻabbongane innatodḵu ḵan diḵayu, pun adi ḵayu bos patangdan.

⁹ Adi ḵayu angawit aḵ buḻawan ḵan pilaḵ,

¹⁰ baḵaḻ, suḻḵud, sandal ḵan ansuḵatanyu'ḵ silup te labbongnae awaton da anḵewaaḻ ḵanonda.

¹¹ “Ḵad ngaimane ili ye ayanyu, singtonyu tagu we ḵamamangili ta siya dawosonyu ḵan inggawanyu inggana'ḵ tenanyu sadi ye ili.

¹² Lumnoḵ ḵayu ḵad atte osae boḻoy, ḵananyu we, ‘Itton Apudyus lin-awa ḵan diḵayu.’

¹³ Ḵad nu pion diḵayu mangiliyon si boḻoyda, aḵ Apudyus angitod si lin-awa ḵan dida. Yaḵon nu umadida mangiliyon diḵayu, adimpun Apudyus itton ḵan dida lin-awa.

¹⁴ Nu awad tagu'ḵ adinapun mangiliyon diḵayu baḵon nu adi dumngoḻ atta ituttuduyu, tenanyu sadi ye ili. Ḵad nu inḵayun, ipaḻpagyu da gabu'tta dapanyu ta igammuwondae dida asi ḵigad si madusaanda.

¹⁵ Ibagaḵ ḵan diḵayu ḵatuttuwaan, nu dumatong anguwisan Apudyus atta losane tagu, nadagdagson dusan da tagu si sadi ye ili nu sa dusan da iSodom ḵan iGomorrah.”

Sa Dumatonge Ampaḵaḻaman

¹⁶ Pinagatupan os Jesus woḵ ḵanana, “Sosomḵonyu anna. Ibuunḵu diḵayu'tta lawweng ya ḵaog-ogyate tagu ḵad isuyun karnero we umoy atte lugar we igaw da tanane asu. Ḵad ḵasapuḻane nalaing ḵayu we isun da uḻog ya adiyu ḵoon lawwenge isun da kalapati.

¹⁷ Ḵad ummanyu bos te doḵmaanda ḵan idaḻum diḵayu'tta ḵuḵunsisaḻ ya ap-apliton diḵayu'tta sinagogada.

¹⁸ Gapu'tte pammatiyu ḵan saḵon, midaḻum ḵayu'tta gobernor ya da ari ta panoḵnoḵanyu Ambaḻu we Damag ḵan dida ya da Gentil.

¹⁹ Ḵad nu sumaḻyaonda diḵayu, adi ḵayu ambinsaw mipanggob si inonyu we anaḵdoḻ si mipanggob ḵan saḵon ya sa isongbatyu te sa sadi ye timpu mipaigammu da ustu we ugudonyu.

²⁰ Te daḵampun ḵan diḵayu maḻpuwan ni ibagayu nu adi sa Ispiritu Santu.

²¹ “Sa sadi ye timpu, awad da udume idaḻumda da sunudda'tta papangat ta gongatonda dida. Ḵaḵna bos atta ama ḵan inae ituyuḵda da abengda'tta papangat ta gongatonda dida. Sasangngaan os da abeng da amada ḵan inada ḵad pagongatda bos dida.

²² Ḵad sasangngaan os diḵayu'tta losane tagu gapu si pammatiyu ḵan saḵon. Yaḵon ngaimane angiyattom atta losane ampaḵaḻaman ya gogomgomana pammatina, matagu'ḵ inggana.

²³ Nu ampaḵaḻamonda diḵayu si osae ili, an-atun ḵayu si osae ili. Ibagaḵ ḵan diḵayu ḵatuttuwaan, nu dumatongaḵe Abeng Di Tagu, daanyupun gangputon da ḵewaaḻe paḵwaḵ ḵan diḵayu'tta losane ili'd Israel.”

²⁴ Pun pinagatupan Jesus we nantuttudu woḵ ḵanana, “Naippun uswila'ḵ nangatu nu sa mistuluna ya naippun os sammilu'ḵ nangatu nu sa apuna.

²⁵ Pun mat-op oḵyan an-adaḻ nu miyisu si mistuluna ḵad isuna bos si sammilu nu miyisu si apuna. Nu ipanida saḵon si simboḻoye aḵ Beelzebul we pangat da aḻan, aaddi ye amo dallu we lawweng angngadanda ḵan diḵayu we niḵamboḻoy.”

Sa Labbongnae Misipog

²⁶ Pinagatupan Jesus woḵ ḵanana, “Adi ḵayu maḵimut ḵan dida te da losane mitataḻu ḵan adipun mipaigammu sinsadi, mipaigammuda'tte umali ye aḻgaw.

²⁷ Sa ibagaḵ ḵan diḵayu'tte umabus taḵu'tta labi, ḵasapuḻane mipaigammu'tta adu we tagu'tta aḻgaw. Ḵad sa iyagapaapḵu ḵan diḵayu, ḵasapuḻan ose iyip-ipḵawyu'tta losane tagu.

²⁸ Adiyu isipog da lamogda gongaton da long-agyu yaḵon naippun lamogdae angongat atta ḵalidodwayu. Sa isipogyu oḵyan, aḵ Apudyus. Te lamogna dadailon long-ag ḵan ḵalidodwa'd infiernu.

²⁹ Annaya oḵyan sosomḵonyu, taḵon ay nu naippun patog da tilin, naippun matoy ḵan maottag atte luta ḵan dida'ḵ taḵon ay ossaan nu adimpun Apudyus we Amayu iyunud.

³⁰ Maguḻaman diḵayu we tagu we igammuna belang da buuḵyu.

³¹ Pun adi ḵayu maḵimut te napatpatog ḵayu'ḵ adayu we tagu nu da pigae tilin.”

Da Angitaḵdog Ḵan Amuḵlit Ḵan Jesus

³² Pinagatupan Jesus woḵ ḵanana, “Pun ngaimane amigbig ḵan saḵon si sinagung da tagu, bigbigoḵ os atte sinagung Amaḵ ad langit.

³³ Ḵad ngaimane amuḵlit ḵan saḵon si sinagung da tagu, puḵlitaḵ os si sinagung Amaḵ ad langit.”

Aḵ Jesus Gapun Ni Ansisinaan

³⁴ Ḵanan os Jesus, “Adiyu sosomḵone ummaliyaḵ ta uḻnusoḵ maḵabuḻbuḻunan da tagu'tta udum sina'd luta. Te sa ummaliyaḵ, ansisinaan ḵan ansusubogan da tagu.

³⁵ Ḵad ummaliyaḵ ta iyyaḵ ambubusuḻon da an-aama ya da an-iina ya da anḵatḵatugangae bubai.

³⁶ Ḵad sa ḵabusuḻ ni osae tagu, da mismu we ḵabaḻyanna.

³⁷ “Sa tagu we amod ayatna'tta amana ḵan inana ya da abengna nu sa ayatna ḵan saḵon, adipun mibelang aḵ disipuluḵ.

³⁸ Ḵad ngaimane adinapun bubuḵḵudon de krosna ya maḵasaganae ampaḵaḻam ḵan matoy ta mitun-ud ḵan saḵon, adipun paat mibelang aḵ disipuluḵ.

³⁹ Te ngaimane angipatog atte long-agna, matoy pos pagay. Yaḵon sa angiḵatoy atte pammatina ḵan saḵon, itton Apudyus ḵan siya biyag aḵ inggana.”

Sa Gungunae Itton Apudyus

⁴⁰ Ḵanan os Jesus, “Ngaimane ammangili ḵan diḵayu, saḵon minangilina. Ḵad sa ammangili ḵan saḵon, minangilina bos nangibuun ḵan saḵon.

⁴¹ Ḵad ngaimane mangiliyona profeta gapu ta profetaḵ, maittan aḵ gungunana'ḵ isuna gungunan ni profeta. Ngaiman ose ammangili si naun-unane tagu, maittan aḵ gungunanae isuna gungunan ni naun-unane tagu.

⁴² Ibagaḵ ḵan diḵayu ḵatuttuwaan, ngaimane ampainum taḵon ay nu abuse sintasae danum atte osa'tta sanae ḵamḵama gapu ta disipuluḵ, aaddi ye magungunaan.”