Matthew 1 - Sa Ugud Apudyus

Sa Listaan Da Danaḵḵoḻ Jesu Kristu

¹ Annaya listaan da danaḵḵoḻ Jesu Kristu we siya pinilin Apudyus aḵ Anagu ḵan An-ari. Siya ganaḵ Ari David ya ganaḵ os Abraham.

² Aḵ Abraham aman Isaac. Aḵ Isaac aman Jacob. Aḵ Jacob aman Judah ya da sunudna.

³ Aḵ Judah aman da Perez ḵan Zerah ya aḵ Tamar inada. Aḵ Perez aman Hezron. Aḵ Hezron aman Ram.

⁴ Aḵ Ram aman Amminadab. Aḵ Amminadab aman Nahshon. Aḵ Nahshon aman Salmon.

⁵ Aḵ Salmon aman Boaz ḵad aḵ Rahab inana. Aḵ Boaz aman Obed ḵad aḵ Ruth inana. Ḵad aḵ Obed aman Jesse.

⁶ Aḵ Jesse aman Ari David. Aḵ Ari David aman Solomon we inana asawan Uriah.

⁷ Aḵ Solomon aman Rehoboam. Aḵ Rehoboam aman Abijah. Aḵ Abijah aman Asaph.

⁸ Aḵ Asaph aman Jehoshaphat. Aḵ Jehoshaphat aman Joram. Aḵ Joram aman Uzziah.

⁹ Aḵ Uzziah aman Jotham. Aḵ Jotham aman Ahaz. Aḵ Ahaz aman Hezekiah.

¹⁰ Aḵ Hezekiah aman Manasseh. Aḵ Manasseh aman Amos. Aḵ Amos aman Josiah.

¹¹ Aḵ Josiah aman Jechoniah ya da susunudna'tte timpu we nangipatutanda nangitallayan atta iyIsrael ad Babylon.

¹² Sa nagangpute nitallayanda'd Babylon, niyanaḵ aḵ Shealtiel we abeng Jechoniah. Aḵ Shealtiel aman Zerubbabel.

¹³ Aḵ Zerubbabel aman Abiud. Aḵ Abiud aman Eliakim. Aḵ Eliakim aman Azor.

¹⁴ Aḵ Azor aman Zadok. Aḵ Zadok aman Achim. Aḵ Achim aman Eliud.

¹⁵ Aḵ Eliud aman Eleazar. Aḵ Eleazar aman Matthan. Aḵ Matthan aman Jacob.

¹⁶ Aḵ Jacob aman Joseph. Ḵad aḵ Joseph asawan Mary ye nangiyanaḵ ḵan Jesus we awaganda'ḵ Kristu.

¹⁷ Pun nasawaḻan aḵ opate lunap misaḻad ḵan Abraham inggana ḵan Ari David. Nasawaḻan os aḵ opate lunap misaḻad ḵan Ari David inggana si nitallayan da iyIsrael ad Babylon. Ḵad nasawaḻan os aḵ opate lunap si nitallayanda'd Babylon inggana'tte niyanaḵan Kristu.

Sa Niyanaḵan Jesu Kristu

¹⁸ Annaya ug-uggud ni niyanaḵan Jesu Kristu. Sa inanae aḵ Mary, nantuḻagdae an-asawada ḵan Joseph. Yaḵon sa daanda an-asaw-an, nabugi'ḵ Mary mipagapu si ḵabooḻan ni Ispiritu Santu.

¹⁹ Aḵ Joseph we ḵatuḻagna, naun-unan ya adinapun os pione mibabbain aḵ Mary. Pun simsimmoḵnae isinanae adipun maigammu.

²⁰ Sinomsomoḵna ḵad mipanggob si sana, baag-en nampaila ḵan siya anghel Apudyus si in-inop woḵ ḵanana, “Siḵa Joseph we ganaḵ Ari David, adiḵa maḵimute angiḵamboḻoy ḵan Mary te sa bugina mipagapu si ḵabooḻan ni Ispiritu Santu.

²¹ Umanaḵ aḵ laḻaḵi ḵad ngadanam aḵ Jesus te taguwona da taguna ta adida madusa'tta basuḻda.”

²² Naḵwa losan da sana ta mituttuwa inugud Apu we Apudyus si awe atte profetanae an-uuggudonae ḵanana,

²³ “Baag-en, mabugi babaḻasange ippun natnattoḵana. Umanaḵ aḵ laḻaḵi ḵad mangadanan aḵ Emmanuel.” Sa piona ugudon, “Anna ḵan ditaḵu'ḵ Apudyus.”

²⁴ Bummangon ḵad aḵ Joseph, tinuttuwana imbilin ni anghel ḵan siya woḵ inḵamboḻoyna'ḵ Mary.

²⁵ Yaḵon adinapun tintindoḵ si daannapun angiyanaḵan si abengna. Ummanaḵ ḵad, nginadanana'ḵ Jesus.