Mark 7 - Sa Ugud Apudyus

Sa Tinawid Da Judyu Atta Danaḵḵoḻda

¹ Sin-aḻgawan ḵad, ummoy nadagup ḵan Jesus da Pharisee ya da mimistulun ni lintoge naḻpu'd Jerusalem.

² Innilada da udume disipulunae nangan yaḵon adidapun inunud ugali si inondae ambuḻu we intuttudun da Pharisee aḵ mibelang aḵ ampoḻḵas.

³ Te da Pharisee ya da udume Judyu, unudonda ugali ye tinawidda'tta danaḵḵoḻdae adidapun angan nu adidapun ambuḻu.

⁴ Ḵad nu maḻpuda'tte nginginnaan, adidapun angan nu adida umuna ambuḻu. Adu bos da udume ugali ye tinawidda'tta danaḵḵoḻda, isun da ugalida si ḵiwasanda da tasa, da ḵaḵappiyan ya da ḵanting.

⁵ Pun da Pharisee ya da mimistulun ni lintog, ḵananda ḵan Jesus, “Ngaipan da disipulum adi unudon ugali si inondae ambuḻu we tinawid taḵu'tta danaḵḵoḻ taḵu? Ngaipada angane adidapun inunud inondae ambuḻu?”

⁶ Ḵanan Jesus, “Tuttuwa imbagan Apudyus ḵan Profeta Isaiah atte inggilina'tte Ugud Apudyus we mipanggob ḵan diḵayu we ḵapappailae ḵanana, “ ‘Da annae tagu, andayawda ḵan saḵon atta sungadda, yaḵon adayu da somsomoḵda ḵan saḵon.

⁷ Ippun paat daḻat ni andayawanda ḵan saḵon te sa ituttududa abus da ugali ye ḵingwan da tagu ḵad ibagadae bilinḵu.’

⁸ Ḵaḵnat ḵoonyu te nan-awidanyu bilin Apudyus ta siya unudonyu ugalin da tagu.”

⁹ Pune sadi pinagatupan Jesus woḵ ḵanana, “Aginlalaing ḵayu! An-awidanyu bilin Apudyus ta unudonyu ugaliyu.

¹⁰ Te sa inggilin Moses atte Ugud Apudyus, ḵanana, ‘Dayawom da amam ḵan inam,’ ya ‘Ngaimane an-ugud aḵ lawweng atte amana ḵan inana, aaddi ye magongat.’

¹¹ Yaḵon sa ituttuduyu sabali. Te ituttuduyu we miyunud nu adipun tagu bumadang atta amana ḵan inana nu ittona badangna ḵan Apudyus. Iyunudyu we ibagana'tta amana ḵan inana ḵanane, ‘Sa ittoḵ oḵyan ḵan diḵayu, inkariḵe idatun ḵan Apudyus.’

¹² Ḵad nu imbagana ḵaḵnat, adiyupun ogon iyunude bumadang ḵan amana ya aḵ inana.

¹³ Gapu'tte sadi ye ugali ye ituttuduyu'tta adu we tagu, an-awidanyu Ugud Apudyus. Ḵad ḵoonyu bos da adu we ḵaḵna.”

Sa Angaissaw Atte Tagu

¹⁴ Pun inayagan os Jesus da tagu woḵ ḵanana ḵan dida, “Diḵayu losan, dongngonyu anna ta igammuwonyu.

¹⁵ Sa mibelang aḵ angaissaw atte tagu si antotollong Apudyus, daḵampun atte ngaimane lumnoḵ si sungadna yaḵon sa tumoḵwaḻ atte sungadna.

¹⁶ Diḵayu ḵad, gogomgomanyu da dingngoḻyu.”

¹⁷ Tinenan ḵad Jesus da tagu woḵ nillumnoḵ atte boḻoy, inimus da disipuluna nu ngai pion ni impanina ḵanan.

¹⁸ Ḵanan Jesus, “Pun taḵon ay os diḵayu, daanyupun os ay maawatan da ituttuduḵ? Adiyupun ḵamman igammu we ngaimane lumnoḵ si sungad ni tagu, daḵampun aḵ mibelang aḵ angaissaw ḵan siya si antotollong Apudyus?

¹⁹ Te adidapun umoy atte somsomoḵna. Umoy atte buwangna ya niyattayda.” Imbagan ḵad Jesus sadi, piona ugudone losane maḵan ampoḻḵas, maḵwa ḵanon da tagu te daḵampun aḵ siya angaissaw ḵan siya si antotollong Apudyus.

²⁰ Pun pinagatupan Jesus woḵ ḵanana, “Sa maḻpu'tte somsomoḵ ni tagu, siya mibelang aḵ angaissaw ḵan siya si antotollong Apudyus.

²¹ Te sadi puun ni isun da sanae ḵasomsomḵan, adaḻugona daḵampun aḵ asawana, an-aḵaw, pumatoy, maḵadagdagas,

²² andomos atta ḵuḵuwan da udum, ḵoona da lawweng atta asintataguna, umallelaw, ḵoona da ḵababbain, maapos, an-amsew, ansoḵaḻ, ḵad andongdong-og.

²³ Da sadi ye maḻpu'tte somsomoḵ ni tagu mibelang aḵ angaissaw ḵan siya si antotollong Apudyus.”

Sa Pammatin Ni Bubai Ye Gentil

²⁴ Pun ḵesan aḵ Jesus woḵ ummoy atta saḵubna'd Tyre ya ad Sidon. Inniinggaw atte boḻoye indasana ḵad adinapun pione igammuwon da tagu we awad sidi. Yaḵon taḵon ay nu ḵatti, inigammuda.

²⁵ Inninggaw bubai ye naaḻanan abengnae babaḻasang. Dingngoḻna ḵade awad aḵ Jesus, daguse ummoy ḵan siya. Dummatong ḵad, nanalluḵu si sinagung Jesus,

²⁶ woḵ nandagdagu ḵan siya ta paḻyawona oḵyan aḻan atte abengna. Sa bubai ye sadi, niyanaḵ ad Phoenicia we saḵubna'd Syria ya sa ugudna ḵad Grineek.

²⁷ Pun ḵanan Jesus we nangipani, “Unniyan ta umuna massug da abeng te daḵampun aḵ ambaḻu nu ipaḵanta ḵanon da abeng atta asu.”

²⁸ Ḵanan ni bubai, “On Apu yaḵon da asu ḵad, ḵanonda da dadaḵon da abenge angan.”

²⁹ Ḵanan Jesus, “Gapu'tte sanate insongbatnu, maḵwae inḵan. Tinenan ni aḻan abengnu.”

³⁰ Pun ummoyon bubai woḵ indasana abengnae innumbog atte ḵama. Ḵad tuttuwae tummoḵwaḻ aḻan ḵan siya.

Sa Natuḻong Ya Naumoḻ

³¹ Pun tinenan Jesus ad Tyre woḵ nangoy ad Sidon ya da saḵubna'd Decapolis ta mipauli'tte Baybay ad Galilee.

³² Inninggaw da nangiyoy si tagu we natuḻong ya naumoḻ. Pun nandagdaguda ḵan Jesus ta ipatayna oḵyan imana ḵan siya ta maḵaginga ḵan maḵadongoḻ.

³³ Imbattawan Jesus atta amoamode tagu woḵ ummabusdae duwa. Pun insuḻuḵna tammuduna si ingan ni laḻaḵi woḵ tinuppaana tammuduna pun intodoḵna bos atte delan ni laḻaḵi.

³⁴ Pun nantangad ḵad aḵ Jesus ad langit, ummag-os woḵ ḵanana, “Ephphatha,” we sa piona ḵanan, “Mabuḵatanḵa.”

³⁵ Pun daguse naḵadongoḻ ya naḵaan umoḻna woḵ anggodong an-uugudna.

³⁶ Imbilin Jesus ḵan didae adida paat ug-uggudon atta ngaiman. Yaḵon taḵon ay nu binilibilinna dida, amo inuguugudda.

³⁷ Pun gattoḵe nataag da tagu woḵ ḵananda, “Ambaḻu da losane ḵingwana! Te maḵwae ḵaanona tuḻong ya umoḻ da tagu ta maḵadongoḻda ḵan maḵagingada.”