Mark 5 - Sa Ugud Apudyus

Sa Naaḻanan

¹ Pune sadi, pinagatupan da Jesus we dummoḻmang inggana'ḵ dummatongda'tte saḵubna'd Gerasa.

² Lummogsad ḵad aḵ Jesus atte bangka, inabot ni laḻaḵi ye naaḻanane naḻpu'tte lilibbonane

³ nangig-igaw sidi. Naippun paat ḵallabbong maḵaibaḻud, taḵon ay nu ḵawadanda.

⁴ Te nangampigaonda ḵinawadan imana ya ḵinanselan da suḵina yaḵon awwayna gosat atta ḵawad si imana ya piniḵaḵna da ḵanselna. Naippun os maḵaipugod ḵan siya te amod de ḵosdoḻna.

⁵ Inaḻgaw ḵan nilabi, umoy anggaḵagaḵay si lilibbonan ya sa bebbelege ambogbogga ya sinugasugatna long-agna'tta batu.

⁶ Intapna ḵad aḵ Jesus, nanoddaḵe ummoy niyabot woḵ nanalluḵu si sinagungna.

⁷ Pun ḵananae napapḵaaw, “Anii! Ngaipaḵa umali ḵan saḵon? Siḵa'ḵ Jesus we Abeng ni Ḵangatuwane Apudyus! Ibagam ḵappos ḵan Apudyus ta adina saḵon dusaon!”

⁸ Imbagana ḵaḵnat te innilan ḵad Jesus sadi ye laḻaḵi, ḵananae namaḻyaw, “Siḵae aḻan, ḵumassadḵa!”

⁹ Pun ḵanan Jesus we nangimus ḵan siya, “Ngai ngadannu?” Ḵanana, “Nilibu te amod ḵani.”

¹⁰ Pun inḵasinna nandagdagu ḵan Jesus we adina oḵyan pos paḻyawon dida'tte sadi ye ili.

¹¹ Inninggaw da amode boḻoḵ we ansubsubuḵ atte tagada.

¹² Pun ḵanan da aḻane nandagdagu, “Ibuunnu ḵappos diḵani'tta andi ye boḻoḵ ta lumnoḵ ḵani ḵan dida.”

¹³ Ḵanan Jesus, “On, inḵayu!” Pun tummoḵwaḻda'tte laḻaḵi woḵ nillumnoḵda'tta boḻoḵ. Nangwa ḵad da boḻoḵ, nandoḵdoḵasdae nan-osog woḵ naottagda'tte etpang pun naanudda si baybay. Sa amuamung ni iyapda, batug di duwallibu.

¹⁴ Da nanangḵon ḵad atta boḻoḵ, ummawidda woḵ ummoyda imbaga si siyudad ya da ili. Pun da umili, ummoyda ta ilanda bos nu ngai naḵwa.

¹⁵ Dummatongda ḵad si igaw Jesus, inniladae tutuḵdu sadi ye laḻaḵi ye naaḻanan. Nansilup ḵan nanggodong somsomoḵna. Pun naḵimtanda.

¹⁶ Da nangila, inugudda'tta tagu de naḵwa'tte naaḻanan ya da adu we boḻoḵ.

¹⁷ Pun insaḻaddae nandagdagu ḵan Jesus ta tenana ilida.

¹⁸ Summaḵyat ḵad aḵ Jesus si bangka, daguse ummoy laḻaḵi ye napaḻyawan da aḻan woḵ nandagdagu we mibuḻun ḵan dida.

¹⁹ Yaḵon ummadin Jesus woḵ ḵanana ḵan siya, “Inḵan atta buḻbuḻunnu ya ibagam ḵadagun Apu ya sa ḵingwana ḵan siḵa.”

²⁰ Pun ḵesan woḵ ummoy nanggaḵay atta simpuḻu we siyudade saḵub ni Decapolis woḵ imbagabagana da ḵingwan Jesus ḵan siya. Pun nataag da losane nangngoḻ atta imbagana.

Sa Bubai Ya Sa Abeng Jairus

²¹ Nipauli ḵad aḵ Jesus we dummoḻmang, inaligummun da amoamode tagu'tte taḻantag ni baybay.

²² Pun annat aḵ Jairus we osa'tta pangat ni sinagoga. Innilana ḵad ay aḵ Jesus, nanalluḵu si sinagungna,

²³ woḵ nandagdagu. Ḵanana, “Awad de abengḵu we bubai ye madam-an matoy. Awwaynu ḵappos ta inḵa ipatay imam ḵan siya ta lumin-awa ta matagu.”

²⁴ Pun nibuḻun aḵ Jesus woḵ nansussulig da amoamode nibuḻun.

²⁵ Pune sadi, inninggaw os bubai ye dumaḻadaḻa'tte nasawaḻan aḵ duwae tawon.

²⁶ Nampaḵaḻam atta adu we an-aagas ḵan siya ya naaminan yaḵon naippun naḵaagas atte saḵitna. Sa naḵwa, dummallu saḵitna.

²⁷ Dingngoḻna ḵad mipanggob ḵan Jesus, ummoy nidoga'tta adu we tagu si odogan Jesus woḵ tindoḵna silupna.

²⁸ Te ḵanana'tte somsomoḵna, “Taḵon ay nu abuse tokkoḵ silupna, lumin-awaaḵ.”

²⁹ Pun naḵaginoḵ daḻana woḵ giniḵnanae lummin-awa.

³⁰ Pun daguse nallangḻanga'ḵ Jesus atta tagu te giniḵnanae tummoḵwaḻ ḵabooḻana woḵ ḵanana, “Ngai nandoḵ atte silupḵu?”

³¹ Ḵanan da disipuluna, “Ilam ose amoamod da nansussulig! Ngaipam imuson nu ngai nandoḵ atte silupnu?”

³² Aḵ Jesus ḵad, nallangḻanga ta ilana nu ngai nandoḵ si silupna.

³³ Gapu ta inigammun ni bubai da naḵwa ḵan siya, ummadani ye amilpilpil si ḵimutna woḵ nanalluḵu si sinagung Jesus. Pun imbagana da losane ḵatuttuwaane naḵwa ḵan siya.

³⁴ Ḵanan Jesus ḵan siya, “Abengḵu, gapu'tte pammatim ḵan saḵon, bummaḻuḵa. Inḵan lumin-awa somsomoḵnu ḵad adipun ogon mipauli saḵitnu.”

³⁵ Sa nangibag-ana'tte bubai, nadanatong da udume naḻpu si boḻoy da Jairus. Pun ḵananda ḵan siya, “Adim ogon taḵtaḵon aḵ Mistulu te natoy abengnu.”

³⁶ Aḵ Jesus ḵad, ining-ingngana imbagada woḵ ḵanana ḵan Jairus, “Adiḵa maḵimut, abus amatiḵa.”

³⁷ Adimpun Jesus iyyunude awad mibuḻun ḵan siya, abus aḵ Peter ya da James ḵan John we ansunud.

³⁸ Dummatongda ḵad aḵ ḵuwan da Jairus, innilana da amode tagu we sin-oomoḻ ḵan sin-iibil.

³⁹ Nillumnoḵ aḵ Jesus woḵ ḵanana, “Ngaipa ḵayu sin-oomoḻ ḵan sin-iibil? Sa annate abenge bubai, daḵampun aḵ natoy. Nasuyope abus.”

⁴⁰ Pun inem-emesda. Pun pinaḻawan Jesus dida woḵ inayagana da ama ḵan inan ni abeng ya da disipuluna ta lumnoḵda'tte igaw ni abeng.

⁴¹ Pune sadi, innonnana imana woḵ ḵanana'tte ugudda, “Talitha koum.” Sa piona ugudon, “Babaḻasang, bumangonḵa.”

⁴² Natanaḵdog woḵ isaḻadnae anaddaḻan. Sa babaḻasang nasawaḻan aḵ duwa tawonna. Pun da losane nangila, amod pagay nantataagda.

⁴³ Imbilibilin Jesus ḵan didae adida ug-uggudon atta ngaiman da naḵwa woḵ ḵanana bos, “Ittanyu'ḵ ḵanona.”