Mark 4 - Sa Ugud Apudyus

Sa Pani Atte Nawwagawag Si Bukoḻ

¹ Sin-aḻgawan ḵad, ummoy aḵ Jesus atte taḻantag ni baybay ta antuttudu. Gapu ta amoamod da nangaligummu ḵan siya, ummoy tummuḵdu'tte bangka'tte sissiyae inggaw da tagu si taḻantag.

² Nantuttudu ḵan dida'tta adu we banage impanina woḵ ḵanana,

³ “Dongngonyu! Inninggaw tagu we ummoy nawwagawag si buḵoḻ.

⁴ Iwwagawagna ḵad, naottag udum atte daḻan woḵ ummoy da sissiwit tinuḵtuḵan.

⁵ Da udume buḵoḻe niwagawag, naottagda'tte bibbisil. Taḵon ay nu tummubuda,

⁶ dummingit ḵad ay init naḻ-uyda woḵ naḻanguda te naippun ḵon lamutda.

⁷ Da udum ḵad ose buḵoḻ, naottagda si laslasi woḵ taḵon ay nu tummubuda, nidisan tummubu da lasi woḵ pinsoḻda da muḻa ta adida dumaḵoḻ, pun naippun bungada.

⁸ Da udume buḵoḻ, naottagda'tte alluta. Tummubuda woḵ namungada, da udum namungada'ḵ sintuḵlumpuḻu, sin-oonompuḻu ya da udum singgagasut.”

⁹ Pun ḵanan Jesus we nangiyanungus, “Diḵayu we andodongngoḻ, sosomḵonyu da dingngoḻyu.”

Sa Panggob Da Pani

¹⁰ Ummoyon ḵad da adu we tagu, natenan da nasawaḻan aḵ duwae disipuluna ya da udume nitun-ud ḵan Jesus. Pun ḵananda, “Ngai pion ni sadi ye pani ḵanan?”

¹¹ Ḵanan Jesus, “Diḵayu ḵad, nipaigammu da banage adipun nipaigammu si awe mipanggob atte ampangatan Apudyus. Da udum ḵad, abus ipaniḵ

¹² ta taḵon ay nu iillanda, adidapun maḵaimatun ya taḵon ay nu dodongngonda, adidapun maawatan. Te nu maawatanda, ambabawida nin atta basuḻda ta ansinagungda ḵan Apudyus ya mapakawanda. Siya gapunae ipaniḵe antuttudu ḵan dida.”

Sa Pion Ni Pani Atte Nawwagawag Si Bukoḻ Ḵanan

¹³ Pun ḵanan Jesus ḵan dida, “Ngaipayu adi maawatan annae pani? Nu adiyu maawatan ḵaḵna, ngai ḵad ain inonyu we angigammu'tta udume ipaniḵ?

¹⁴ Annaya pion ni pani ḵanan. Sa buḵoḻe niwagawag, siya Ugud Apudyus.

¹⁵ Da naottag atte daḻan, mipanida'tta tagu we dongngonda Ugud Apudyus. Ḵad umoy aḵ Satan ya ḵinaanna da Ugud Apudyus we dingngoḻda.

¹⁶ Da naottage buḵoḻ atte bibbisil, isuda da tagu we sillalaylayade angawat si Ugud Apudyus we dingngoḻda,

¹⁷ yaḵon adipun nillumnoḵ atta somsomoḵda. Amatida'ḵ sin-aḵitan ḵad nu dumatong ampaḵaḻamanda baḵon nu mapadasda gapu'tte amatiyanda si Ugud Apudyus, daguse iwaḻangda pammatida ḵan Apudyus.

¹⁸ Da naottag atte laslasi, isuda da tagu we dongngonda Ugud Apudyus.

¹⁹ Yaḵon gapu'tta binimbinsawda'tta biyagda si annae lubung ya piondae bumaḵnang ya da udume amaamayonda, adidapun tungaguwon ugude dingngoḻda ḵad adipun mabaliwan da ugalida.

²⁰ Da naottag ḵad atte alluta, isuda da tagu we dongngonda Ugud Apudyus ya namatida ḵad ḵoonda da adu we ambaḻu we banage mas-oman Apudyus we isun da muḻae amunga'ḵ adu. Awad da amunga'ḵ sintuḵlumpuḻu, da udum sin-oonompuḻu ya awad da singgagasut.”

Sa Pani Mipanggob Si Silaw

²¹ Unipun, ḵanan os Jesus we nangipani, “Awad ḵamman tagu'ḵ tonggana silaw ya illonoḵna ya laḵḵobana bos si aḵḵubaw? Baḵon nu iggana'tte dugun ni ḵama? Iggana si sasap-aḻan ni silaw ta allangḻang.

²² Te da losane mitataḻu baḵon nu da daampun maigammu sinsadi, mipaigammu si umali ye aḻgaw.

²³ Diḵayu we andodongngoḻ, sosomḵonyu da dingngoḻyu.”

²⁴ Ḵanan os Jesus, “Imuḻayu'tta pusuyu da annae ibagaḵ. Te nu ḵoonyu ḵaḵnat, amo maawatanyu ya amo dog-an Apudyus igammuyu.

²⁵ Te sa anuttuwa si dingngoḻna, amo madog-an igammuna. Yaḵon sa tagu we adinapun ḵoon dingngoḻna, taḵon ay da awad ḵan siya, misopsop maḵaan.”

Sa Tumubuwan Ni Bukoḻ

²⁶ Pune sadi, ḵanan os Jesus we nangipani, “Sa ampangatan Apudyus mipani'tte tagu we ummoy nammuḻa'ḵ buḵoḻ si umana.

²⁷ Sa masuyopana'tta labi ya bumangonana'tta bigbigat, midisan bumngis da buḵoḻe immuḻana ya dummaḵoḻda. Yaḵon sa inon ni muḻae dumaḵoḻ, ippun igammun ni nammuḻa.

²⁸ Ḵad sa lutae mismu amadaḵoḻ atta muḻa. Umunae matubuwan ḵad amusbus inggana'ḵ maotong.

²⁹ Ḵad nu maḻ-um, aniyona.”

Sa Pani Atte Buḵoḻ Ni Mustasa

³⁰ Pun ḵanan Jesus, “Ngai nin ay angipaniyaḵ atte ampangatan Apudyus? Ngai nin ay mipaniyana?

³¹ Isuna buḵoḻ ni mustasae nimuḻa. Sa buḵoḻ ni mustasa ḵapeetan atta losane kalasin di buḵoḻ sina'd luta.

³² Yaḵon nu mimuḻa ya dumaḵoḻ, ambalin aḵ ḵataḵnangan atta losane matipoy. Danaḵḵoḻ da pangana ya sumuḵbutan da sissiwit.”

³³ Amoamod da impanin Jesus we nangituttudu'tte Ugud Apudyus. Nantuttudu'tta lamogda maawatan.

³⁴ Pasigna impani ye nantuttudu ḵan dida. Abusda ḵad atta disipuluna, impaḵaawatna ḵan dida.

Sa Bibbid Ya Da Tupiyaḵ

³⁵ Mummasdom ḵad, ḵanan Jesus atta disipuluna, “Intaḵu dumoḻmang.”

³⁶ Pun naḵalugan da disipuluna'tte bangkae inninggawan Jesus woḵ tinenanda da tagu. Inninggaw os da nambangkae nibuḻun ḵan dida.

³⁷ Pune sadi, inniggana ampigsapigsae bibbid woḵ nilaḵbungan ni tupiyaḵ bangkada, pun tigangayda milisob.

³⁸ Aḵ Jesus ḵad, namungane nasuyop si odogan ni bangka. Pun binangon da disipuluna woḵ ḵananda, “Anaḵay! Mistulu, adimpun ḵamman ambiyangan nu matoy taḵu?”

³⁹ Nabanangon woḵ ḵananae namilin atte bibbid, “Guminoḵḵa!” Ḵanana bos atta tupiyaḵ, “Guminoḵ ḵayu!” Pun gumminoḵ bibbid ya da tupiyaḵ. Pun bummaḻu taḻun.

⁴⁰ Ḵanana'tta disipuluna, “Ngaipa ḵayu maḵimut? Ippun ḵamman pammatiyu inggana sinsadi?”

⁴¹ Naḵimtanda woḵ ḵananda losan, “Ngai nin ay anna? Taḵon ay bibbid ya da tupiyaḵ tumuttuwada'tta ibagana.”