Mark 3 - Sa Ugud Apudyus

Sa Tagu We Naangḵet Imana

¹ Sin-aḻgawan ḵad, nipauli'ḵ Jesus atte sinagoga. Inninggaw laḻaḵi ye naangḵet imana.

² Inninggaw os da udume tagu we angitotollong ḵan siya ta ilanda nu ḵaanona saḵitna'tte umillongan te pionda pabasuḻon aḵ Jesus.

³ Pun ḵanan Jesus si naangḵet, “Awwaynu ta tumaḵdogḵa si sinagungḵu.”

⁴ Pun ḵanan Jesus ḵan dida, “Ngai iyunud ni lintog taḵu si umillongan? Sa ḵoon taḵu ambaḻu baḵon nu sa ḵoon taḵu lawweng? Sa taguwon taḵu da tagu baḵon nu sa dadailon taḵu dida?” Ḵingwada ḵad, gummiginnoḵda.

⁵ Nallangḻanga ḵad ḵan dida summanga ya ansigab atte pusuna gapu'tte tummungitong somsomoḵda. Ḵanana si naangḵet, “Uyadom imam.” Inuyadna ḵad, nipaḻ-og.

⁶ Nagangput ḵad, ḵesan da Pharisee woḵ ummoyda nantutuḻag atta grupun Ari Herod nu ngai inondae angongat ḵan Jesus.

Da Adu We Tagu Si Taḻantag Ni Baybay

⁷ Pune sadi, ummoyon da Jesus ya da disipuluna woḵ ummoyda si taḻantag ni baybay. Nibuḻun os ḵan dida da amoamode naḻpu'tte probinsiya'd Galilee ya sa probinsiya'd Judea.

⁸ Ḵad amod os da naḻpu'd Jerusalem. Naḻpu da udum si saḵubna'd Idumea ya sa domang ni tawwang Jordan, ad Tyre ya ad Sidon ya da ili ye sinaḵubda. Pun ummoyda ḵan Jesus te dingngoḻda da losane ḵingwana.

⁹ Gapu ḵad ta amoamode tagu, imbagana'tta disipuluna ta umoyda angngit aḵ bangka ta siya inggawana ta adi misodet.

¹⁰ Gapu ta ḵinaanna da amode saḵit, naaligummu da nasaḵit te pionda oḵyan tokkon aḵ Jesus ta ḵaanona da saḵitda.

¹¹ Innilan ḵad os da naaḻanan aḵ Jesus, ummadanida woḵ nanalluḵuda ḵan siya woḵ ḵanan da aḻane simpopoḵaw, “Siḵa Abeng Apudyus!”

¹² Yaḵon binilibilinna dida ta adida ug-uggudon mipanggob ḵan siya.

Sa Namiliyan Jesus Atta Nasawaḻan Aḵ Duwae Apostol

¹³ Pune sadi, nanagada'ḵ Jesus atte beleg, inayagana da tagu we pionae umali woḵ nitun-udda ḵan siya.

¹⁴ Dummatongda ḵad, pinilina da nasawaḻan aḵ duwae ngannona apostol woḵ ḵanana ḵan dida, “Piniliḵ diḵayu ta inggaw ḵayu ḵan saḵon ta ibuunḵu diḵayu'ḵ umoy angiwaḻagawag si Ambaḻu we Damag.

¹⁵ Ḵad ittaḵ os diḵayu'ḵ ḵaḻabbongane amaḻyaw atta aḻan da naaḻanan.”

¹⁶ Annaya da ngadan da pinilina. Aḵ Simon we nginadanan Jesus aḵ Peter,

¹⁷ da duwae abeng Zebedee ye da James ḵan John we nginadanan Jesus dida'ḵ Boanerges we sa piona ḵanan da abeng ni ḵiduḻ,

¹⁸ Andrew, Philip, Bartholomew, Matthew, Thomas, James we abeng Alphaeus, aḵ Thaddaeus ya aḵ Simon we nginadananda'ḵ Angitaḵdog si ilina

¹⁹ ya aḵ Judas Iscariot we nangituyuḵ ḵan Jesus.

Aḵ Jesus Ya Aḵ Beelzebul

²⁰ Pun ummoyon da Jesus atte boḻoy. Nandatdatong ḵasin da amode tagu woḵ ippun inon da Jesus we angan.

²¹ Dingngoḻ ḵad da ḵabaḻyanna, ummoyda ta itallayda te sa ḵanan da udum natingang.

²² Inninggaw os da mimistulun ni lintoge naḻpu'd Jerusalem we ḵananda, “Inaḻanan Beelzebul we pangat da aḻan. Ḵad siya nangitod atte ḵabooḻanae amaḻyaw atta aḻan.”

²³ Pune sadi, inayagan Jesus dida woḵ ḵananae nangipani, “Ngai ḵad ain inon Satan we amaḻyaw os atte long-agna?

²⁴ Nu awad umili'ḵ ampapatoy, madadail ilida.

²⁵ Isuna bos atta simbaḻyan, nu subboganda, mabuḵaḻda.

²⁶ Ḵaḵna bos aḵ Satan, nu paḻyawona da asin-aḻanna, madadail ampangatana. Ḵad nu ḵatti, ippun ogon ampangatana.

²⁷ Mipani'ḵ Satan si tagu we maasngaan. Te naippun maḵaḻnoḵ atte boḻoyna ya angaḵaw atta ḵuḵuwana nu adina unaon baḻudon. Ḵade sadi asinaot itoddaḵ da ḵuḵuwana.

²⁸ “Ibagaḵ ḵan diḵayu ḵatuttuwaan, losane basuḻ da tagu, maḵwae pakawanon Apudyus, taḵon ay da ibagada si mipanggob ḵan Apudyus.

²⁹ Yaḵon sa angamsew atte Ispiritu Santu, adipun maḵwae mapakawan da basuḻna'ḵ inggana.”

³⁰ Sana imbagan Jesus te ḵanandae naaḻanan.

Sa Inan Jesus Ya Da Sunudna

³¹ Pune sadi, dummatong ḵad inan Jesus ya da susunudna'tte lasin ni boḻoye inninggawana, ummoyda impaayag.

³² Pun ḵanan da amode atuḵtuḵdu we nampaliḵwos ḵan siya, “Andi'ḵ inam ya da susunudnu'ḵ lasine paayagda siḵa.”

³³ Ḵanan Jesus ḵan dida, “Annaya da ibelangku'ḵ tuttuwae inaḵ ḵan susunudḵu.”

³⁴ Nallangḻanga ḵad atta nampaliḵwos ḵan siya, ḵanana, “Annaya da inaḵ ḵan susunudḵu!

³⁵ Te ngaimane angwa'tta pinion Apudyus, dida da inaḵ ya susunudḵu.”