Mark 16 - Sa Ugud Apudyus

Sa Ummuliyan Jesus

¹ Naḻaḵpus ḵad umillongan, ummoy da Mary Magdalene, Salome ya aḵ Mary ye inan James ngummina'ḵ bangbanglu ta umoyda iyappus si ladag Jesus.

² Dummingit ḵad init atte bigbigat si umunae aḻgaw ni sindumingguwan, ummoyda'tte nilibonana.

³ Sa inggawanda si daḻan, ḵanandae nan-asiimus, “Ngai alligad si batu we onob ni liyang?”

⁴ Dummatongda ḵad, inniladae naligad batu we daḵodaḵoḻ.

⁵ Nillumnoḵda ḵad atte liyange libon, nataagdae nangila si babaḻu we tutuḵdu si madawinane nansilup aḵ itaḵ.

⁶ Ḵanana ḵan dida, “Adi ḵayu maḵimut. Igammuḵe singsingtonyu'ḵ Jesus we iNazareth we sa nipattoḻ atte kros. Naippun sina te tinagun Apudyus ḵasin. Ilanyu ḵad, annaya inninggawana.

⁷ Inḵayu ibaga ḵan Peter ya da udume disipulunae ummuna'ḵ Jesus ummoy atte probinsiya'd Galilee nu diḵayu. Ilanyu sidi te siya imbagana.”

⁸ Pun daguse lummawa da bubai si liyang woḵ ummawiddae simpipilpil te naḵimtanda ya ippun igammuda'ḵ ḵoonda. Pun naippun paat tagu'ḵ nangug-uggudanda te naḵimtanda.

Sa Nampail-an Jesus Ḵan Mary

⁹ Sa sadi ye wiḵwiḵis atte umunae aḻgaw ni sindumingguwan, ummuli'ḵ Jesus woḵ ummuna nampaila ḵan Mary Magdalene, sa bubai ye namaḻyawana'tta pitu we aḻan.

¹⁰ Pun ummoy aḵ Mary atta disipulun Jesus we andomdom ya sin-iibil woḵ imbagana ḵan didae innilana'ḵ Jesus.

¹¹ Yaḵon dingngoḻda ḵade innilanae natagu ḵasin aḵ Jesus, adidapun pinati.

Sa Nampail-an Jesus Atta Duwae Disipuluna

¹² Naabus ḵad, nampaila'ḵ Jesus atta duwae disipuluna si nanadtaddaḻanandae umoy si ili, naobos ḵatollongana.

¹³ Pun nampaulida ta umoyda ibaga'tta buḻunda yaḵon adidapun os pinati dida.

Sa Nampail-an Jesus Atta Disipuluna

¹⁴ Unipun, nampaila'ḵ Jesus atta nasawaḻan aḵ ossaane disipuluna si anḵaḵaḵananda woḵ sinang-ana dida gapu'tte ippun pammatida ḵan tummungitong somsomoḵda te adidapun pinati imbagan da nangila ḵan siya si ummuliyana.

¹⁵ Pun ḵanana ḵan dida, “Inḵayu'tte losane lubung ta iwaḻagawagyu Ambaḻu we Damag atta losane tagu.

¹⁶ Ngaimane amati ḵan saḵon ya mabonyagan, matagu. Yaḵon sa adipun amati, maḵoddongan aḵ madusa.

¹⁷ Annaya da nakaskasdaawe sinyale ipailan da amati. Paḻyawonda da aḻan si angusaranda'tte ngadanḵu ya an-uguda'tta udume ugude adidapun igammu.

¹⁸ Ḵad nu onnanda da uḻog baḵon nu uminumda'tta maḵodotan, adidapun madiwdiwat. Nu ipatayda da imada'tta nasaḵit, maḵaan da saḵitda.”

Sa Nipangatuwan Jesus Ad Langit

¹⁹ Nagangput ḵad da imbagan Apu Jesus ḵan dida, nipangatu'd langit woḵ tummuḵdu'tte madawinan Apudyus.

²⁰ Pun ummoy da disipuluna iwwaḻagawag Ambaḻu we Damag atta losane ili woḵ binadangan Apu dida. Pune sadi, pinanoḵnoḵana ḵinatuttuwaan ni tuttududa'tta nakaskasdaawe sinyale impaḵwana ḵan dida.