Mark 11 - Sa Ugud Apudyus

Sa Nanaydayawanda Ḵan Jesus Ad Jerusalem

¹ Madam-an ḵad da Jesus ad Jerusalem, dummatongda'tte domangna'd Bethphage ya ad Bethany atte pon-ad ni Beleg Olives. Pun pinaunana da duwa'tta disipuluna.

² Ḵanana, “Inḵayu si umasi ye ili. Ḵad nu dumatong ḵayu, odasanyu nipungode donkey ye daampun aḵ maḵabayuwan. Ḵad uḵasanyu ya indatongyu sina.

³ Nu awad angimus ḵan diḵayu ḵanane, ‘Ngaipayu uḵasan sanat?’ Ḵananyu we, ‘Ḵasapuḻan ni Apu, ḵad ipaulina sinae dagus.’ ”

⁴ Ummoyda ḵad, indasanda donkey atte ḵaḻsae nipungod atte lasin ni boḻoye adani'tte lewangan. Inuḵasanda ḵad,

⁵ inninggaw da asiḵasiḵade ḵananda, “Ngaipayu uḵasan sanat?”

⁶ Imbagada da imbilin Jesus ḵan dida woḵ iyyunud da sadi ye nangila.

⁷ Inniyoyda ḵad ḵan Jesus, iyyap-apda da taḵḵop da silupda si odog ni donkey woḵ nangabayu'ḵ Jesus.

⁸ Ḵaaduwan atta tagu we inninggaw sidi iyyap-apda da taḵḵop da silupda'tte ḵaḻsae ayon Jesus. Da udum ḵad os lummapidda'tta pangan da ḵayu si igid ni ḵaḻsa woḵ iyyap-apda si ḵaḻsae ayona ta idayawda ḵan pasaaḻonda.

⁹ Da ummuna ya da ummun-unud, ḵanandae nanugtug-uy, “Madaydayaw aḵ Apudyus! Madaydayaw oḵyan umali ye imbuun Apudyus!

¹⁰ Madaydayaw ampangatan ni annae ganaḵ Ari David! Madaydayaw aḵ Apudyus we ḵangatuwan!”

¹¹ Dummatongda ḵad ad Jerusalem, nillumnoḵ aḵ Jesus si paway ni templo we boḻoy Apudyus woḵ nallangḻanga'tta losane inninggaw sidi. Gapu ta mummasdom, ummoyda'tta disipuluna'd Bethany.

Sa Ḵayu We Adipun Amunga

¹² Mabigat ḵad, nauḻat aḵ Jesus si nipauliyandae naḻpu'd Bethany.

¹³ Nan-otap ḵad, andi ḵayu we fig we amod de tubuna woḵ ummadani ta ilana nu awad bungana. Dummatong ḵad atte ḵayu, abuse tubu te daampun amungaanda.

¹⁴ Pun ḵanana'tte ḵayu, “Adiḵapun ogon amunga.” Pun dingngoḻ da disipuluna imbagana.

Sa Namaḻyawan Jesus Atta Allaḵlaḵu Atte Templo

¹⁵ Pun dummatongda ḵad ad Jerusalem, nillumnoḵ aḵ Jesus si paway ni templo woḵ pinaḻyawna da nallaḵu ya da ngumina'tta midatun ḵan Apudyus. Binalittuwaḵna bos da lamisaan da ansuḵsuḵat aḵ pilaḵ ya da tutuḵduwan da allaḵu'ḵ kalapati.

¹⁶ Iyyadina bos da ambubuḵude angoy si paway ni templo.

¹⁷ Pun nantuttudu woḵ ḵanana'tta tagu, “Sa nigili'tte Ugud Apudyus ḵanana, ‘Sa boḻoyḵu ngannonda boḻoye luluwaḻuwan da tagu'tta losane ili.’ Yaḵon nambalinonyu'ḵ inggawan da tulisan.”

¹⁸ Dingngoḻ ḵad ay da papangat da papadi ya da mimistulun ni lintog da ḵingwan Jesus, singsingngitda nu ngai inondae ampagongat ḵan siya. Te ummogyatda ḵan siya te nataag da aduadu we tagu'tta intuttuduna.

¹⁹ Lummabi ḵad, tinenan da Jesus sadi ye siyudad.

Sa Maadaḻ Atte Ḵayu We Adipun Amunga

²⁰ Bigbigat ḵad si lummausda'tte sadi ye ḵayu we fig, naḻangu we nidoga da lamutna.

²¹ Pun inḵagasmoḵ Peter imbagan Jesus woḵ ḵanana, “Mistulu, ilam ḵad ḵayu we fig we inaḻawagam woḵ naḻ-uy!”

²² Ḵanan Jesus, “Amati ḵayu oḵyan ḵan Apudyus.

²³ Ibagaḵ ḵan diḵayu ḵatuttuwaan, nu amati ḵayu we adipun anduwaduwa si pusuyu we mituttuwa da ibagayu, maḵwae ḵananyu'tte annae beleg, ‘Ḵumassadḵa ya an-atunḵa si baybay,’ ḵad aaddi ye mituttuwa.

²⁴ Pun ngaimane ḵodawonyu ḵan Apudyus, aaddi ye ittona nu patiyonyu.

^25-26 Ḵad nu alluwaḻu ḵayu ya awad sasangngaanyu'tta asintataguyu te naḵabasuḻda ḵan diḵayu, pakawanonyu ta aḵ Apudyus we Amayu'd langit pakawanona bos da basuḻyu.”

Sa Ḵaḻabbongan Jesus

²⁷ Pun nipaulida ḵasin ad Jerusalem. Nanadtaddaḻan ḵad aḵ Jesus atte paway ni templo, ummoy ḵan siya da papangat da papadi, da mimistulun ni lintog ya da pallakayon da Judyu.

²⁸ Ḵanandae nangimus ḵan siya, “Ngai ḵaḻabbongame nangwa'tta ḵaḵna? Ngai nangitod ḵan siḵa si annae ḵaḻabbongam?”

²⁹ Ḵanan Jesus, “Awad de umunae imusoḵ ḵan diḵayu, ḵad nu songbatanyu, ibagaḵ os ḵaḻabbongaḵe nangwa'tta ḵaḵna.

³⁰ Binonyagan ḵad John da tagu, dinu naḻpuwan ni ḵaḻabbongan John we nambonyag? Aḵ Apudyus baḵon nu da tagu?”

³¹ Pun ḵanandae nan-uugud, “Ngai isongbat taḵu? Nu ḵanan taḵu we, ‘Naḻpu ḵan Apudyus,’ ḵanana ḵan ditaḵu, ‘Ngaipayu adi pinati nu?’

³² Yaḵon adipun maḵwae ḵanan taḵu we, ‘Naḻpu'tta tagu.’ ” Umogyatda nu ngai ḵoon da tagu ḵan dida te pinatida losane gattoḵe profeta'ḵ John.

³³ Pun ḵananda ḵan Jesus, “Naippun igammuni.” Ḵanan Jesus, “Nu ḵaḵnat, umadiḵ os ibaga nu ngai nangitod si ḵaḻabbongaḵe angwa'tta sana.”