Mark 1 - Sa Ugud Apudyus

Sa Tuttudun John We Ambobonyag

¹ Annaya lapun ni Ambaḻu we Damag mipanggob ḵan Jesu Kristu we siya pinilin Apudyus aḵ Anagu ḵan An-ari.

² Inninggaw imbagan Apudyus atte Abengna si awe ye impaigilina ḵan Profeta Isaiah we ḵanana, “Dongngonyu! Awad de ibuunḵu we umun-una nu siḵa ta umoyna isagana daḻane ayom.

³ Sa bumbummaaw, awad de angiwaḻagawage ḵanana, ‘Saganaonyu oḵyan daḻan atte umaliyan Apu ya pagodongonyu daḻane ayona.’ ”

⁴ Pune sadi, nituttuwa te nampaila'ḵ John we Ambobonyag atte bumbummaaw woḵ iwwaḻagawagna'tta losane ummoy nandongoḻ. Ḵanana, “Ibabawiyu da basuḻyu ya agayyu we angwa ya ampabonyag ḵayu ta pakawanon Apudyus diḵayu.”

⁵ Pun adu da naḻpu'd Jerusalem ya da losane ili'tte probinsiya'd Judea we ummoy ḵan siya woḵ imbabaggada da basuḻda pun binonyagan John dida'tte tawwang Jordan.

⁶ Sa silup John, naaboḻe dutdut da camel ya laḻat taḵyadna. Ḵad dudun ya dilu ḵanoḵanona.

⁷ Ḵananae nangibagabaga'tta tagu, “Awad de dumatonge umun-unud ḵan saḵon ya nangatngatu nu saḵon. Ḵad gapu'tte ḵinangatuna, naippun labbongḵu we anguḵas atte sandalna.

⁸ Yaḵon saḵon ḵad, bonyagaḵ diḵayu si danum. Siya ḵad, bonyagana diḵayu'tte Ispiritu Santu.”

Sa Nabonyagan Jesus

⁹ Sa timpu we nambonyagan John atta tagu, dummatong aḵ Jesus we naḻpu'd Nazareth we ili si probinsiya'd Galilee woḵ ummoy nampabonyag ḵan John atte tawwang Jordan.

¹⁰ Tummoḵwaḻ ḵad aḵ Jesus si danum, daguse innilana'd langite nabuḵtan ya sa Ispiritu Santu we dumoḻadoḻae isunan kalapati woḵ nansap-oy ḵan siya.

¹¹ Pun dingngoḻna gingae naḻpu'd langite ḵanana, “Siḵa abengḵu we ay-ayatoḵ ya mamas-omaḵ ḵan siḵa.”

Sa Namadasan Satan Nanulisugan Ḵan Jesus

¹² Pune sadi, impuyut ni Ispiritu Santu aḵ Jesus atte bumbummaaw.

¹³ Inninggaw atte bumbummaaw aḵ opat puḻu we aḻgaw. Ḵad sadi timpu we pinadas Satan sinulisug. Awad os sidi da tanane ayam yaḵon inninggaw da anghel we bummadang ḵan siya.

Sa Nangisaḻdan Jesus We Nantuttudu

¹⁴ Naabus ḵade nibaḻud aḵ John, nipauli'ḵ Jesus atte probinsiya'd Galilee ta umoyna iwaḻagawag Ambaḻu we Damag we naḻpu ḵan Apudyus.

¹⁵ Ḵanana, “Nituttuwa timpu ya gattoḵe sinsadi awad ḵan diḵayu ampangatan Apudyus, pun ibabawiyu da basuḻyu ya agayyu we angwa ya patiyonyu Ambaḻu we Damag.”

Sa Nangayagan Jesus Atta Ummunae Disipuluna

¹⁶ Nanadtaddaḻan ḵad aḵ Jesus atte taḻantag ni Baybay ad Galilee, innilana da duwae ansunude mammaugadiwe anabuḵuḻ, da Simon ḵan Andrew.

¹⁷ Pun ḵanana, “Tun-udonaḵ ta ambalinoḵ diḵayu'ḵ disipuluḵ ya tuttuduwaḵ diḵayu si inonyu we angiyadani'tta tagu we amati ḵan saḵone isun ni inonyu we anabuḵuḻ atta ugadiw.”

¹⁸ Pun daguse imbadongda da tabuḵuḻda woḵ nitun-udda ḵan siya.

¹⁹ Ummad-adayuda ḵad, innilana bos da James ḵan John we abeng Zebedee. Inninggawda si bangkadae nangisagana si tabuḵuḻda.

²⁰ Pun daguse inayagana dida woḵ tinenanda si bangka'ḵ amada ya da tinangdananda woḵ ummoyda nitun-ud ḵan Jesus.

Sa Namaḻyawan Jesus Atte Aḻan

²¹ Pune sadi, ummoy da Jesus ya da disipuluna'd Capernaum. Sa umillongan da Judyu, nillumnoḵda'tte sinagoga woḵ insaḻad Jesus we nantuttudu.

²² Pun nataag da tagu'tte inonae nantuttudu te nantuttudu ḵan didae isun ni osae anna ḵaḻabbongana ya daḵampun aḵ isun da mimistulun ni lintog.

²³ Pune sadi, inninggaw atte sinagogada laḻaḵi ye naaḻanan woḵ ḵananae nantuḵituḵing,

²⁴ “Anii! Jesus we iNazareth, ngaipaḵa umali ḵan diḵani? Ummaliḵa ḵamman ta dadailom diḵani? Igammuḵe siḵa Nasantuwane imbuun Apudyus.”

²⁵ Pune sadi binilin Jesus aḻan woḵ ḵanana, “Guminoḵḵa, ḵumunudḵa ḵan siya!”

²⁶ Pun daguse nanḵulis woḵ nabilaw sadi ye laḻaḵi'tte ḵummunudan ni aḻan ḵan siya.

²⁷ Da tagu ḵad, nataagda losan woḵ sintotoḵoḻda, pun ḵanandae nan-asiimus, “Atopay aḵay anna! Baru we tuttudu we anna ḵaḻabbongana te taḵon ay da aḻan, bilinona dida ya tummuttuwada.”

²⁸ Pun daguse nandinongoḻ mipanggob ḵan Jesus atta losane ili'tte probinsiya'd Galilee.

Sa Nangaanan Jesus Atta Amode Saḵit

²⁹ Pune sadi, lummawa ḵad da Jesus si sinagoga, ummoyda si boḻoy da Simon ḵan Andrew. Naḵaoy os da James ḵan John.

³⁰ Inninggaw bubai ye ḵatugangan Simon we an-atunge uumbog. Pun daguse imbagada ḵan Jesus.

³¹ Ummadani woḵ innonnana imana ta badanganae bumangon. Pune sadi, daguse naḵaan atungna woḵ paḵanana da Jesus.

³² Lummabi ḵad, inniyoy da umili da losane naaḻanan ya da nasaḵit ḵan Jesus.

³³ Nangwa ḵad da losane tagu, nandatdatongda'tte sawang ni boḻoye igaw da Jesus.

³⁴ Pun ḵinaanna da losane kalasin da saḵitda ya pinaḻyawna bos da aḻan atta naaḻanan yaḵon pinaginoḵna didae an-ugud te inigammuda'ḵ Jesus.

Sa Nangiwaḻagawagan Jesus Atte Ambaḻu We Damag

³⁵ Sissiya ḵade anggiḵbot, bummangon aḵ Jesus woḵ ummoy atte bumbummaaw ta umoy alluwaḻu.

³⁶ Bummangon ḵad os da Simon, ummoyda singngit.

³⁷ Indasanda ḵad, ḵananda ḵan siya, “Awad da adu we tagu we ummali ye singsingtonda siḵa.”

³⁸ Ḵanana, “Intaḵu'tta nampaliḵwose ili ta iyyaḵ iwaḻagawag Ambaḻu we Damag te siya panggobḵu we ummali sina.”

³⁹ Pun ummoyda nanggaḵay atta losane ili'tte probinsiya'd Galilee woḵ iwwaḻagawag Jesus Ambaḻu we Damag atta adu we sinagoga woḵ paḻyawona da aḻan atta naaḻanan.

Sa Naleprosy Ye Laḻaḵi

⁴⁰ Sin-aḻgawan ḵad, inninggaw osae laḻaḵi ye naleprosy ye ummoy ḵan Jesus woḵ nanalluḵu nandagdagu, ḵanana, “Nu piom, lamognu ḵaanon saḵitḵu.”

⁴¹ Aḵ Jesus ḵad, ḵinadaguwana woḵ indawawana imana woḵ inappadana pun ḵanana, “On, pioḵ! Maḵaan saḵitnu!”

⁴² Pun daguse naḵaan saḵitna.

⁴³ Ginangput ḵad Jesus ḵinaan saḵitna, pinaḻyawna woḵ ḵananae namilibilin,

⁴⁴ “Inḵa ipaila long-agnu'tte padi ta panoḵnoḵanae naḵaan saḵitnu. Ḵad ittom ḵan siya idatunnu ḵan Apudyus we isun ni imbilin Moses ta amanoḵnoḵan da tagu we ḵawagase naḵaan pagay saḵitnu. Malaksid atte padi, adim paat ibaga ḵingwaḵ ḵan siḵa atta ngaiman.”

⁴⁵ Yaḵon adipun tummuttuwa. Amo ummoyna inuguugud ḵingwan Jesus ḵan siya. Pun sa nambanagana, adipun ogon ampappaila'ḵ Jesus we umoy atta udume ili te amoamod da tagu woḵ inninggaw si bumbummaaw. Yaḵon adu da tagu we ummoy ḵan siyae naḻpu'tta nansabasabali ye ili.